تعالي (أعلـــــــــــــــــــمك من أنتي)؟؟؟

متاهات

قطعتي قلبي
ياعمري عليك
انتي حنونة وحساسة ورحوم

عندك ذكريات خاصة ماقلتيها لأحد ابد (وش هي؟.......وحدة ملقوفة)
لايمكن تحليل شخصيتك بدون الحديث عن امك واضح امك كانت من النوع الي تضغط على نفسها وتجامل الناس
وماتحب المشاكل وتتأقلم مع كل الظروف وانتي تقلدينها,,
ياعمري الزمن تغير ماعاد ينفع مع الناس الا القوة وخوذي حقك بلسانك قبل ايدك

مادري بس احساسي امك انظلمت كثير وانتي انظلمتي
ومن اقرب اقرب الناس



والله حزنت يوم قريت شخصيتك وأشفقت عليك.. واضح جداً انك إنسانه ,,تتعرضين لضغوط ضخمة من يوم انولدتي من يوم الطفولة يعني
وكان يجيك تهزيء وفضول من الناس ومشاكل,,وانتي ياعمري عليك تحاولين تنجين بنفسك من هالضغوط وماقدرتي
ثقتك بنفسك معدومة
وحيرتك كبيرة
وتعبتي كثير بحياتك
فيه اشخاص كثيرين تدخلوا فيك تدخلات سيئة وشريرة(وانتقادات ومكائد) مريتي فيها .وقيل وقال,,
انتي عندك رغبة شديدة بالحياة ورغم كل الضغوط إلا إنك مؤمنه بالله ,,
مؤمنه بأنك بتاخذين حقك اللي ضاع عن طريق أنه ربي يبي يوفقك عيالك
وكل أملك فيهم

انتي انسانه منطقية
حبيبتي ودك تتحررين من الضغوط اللي عليك ودك ترتاحين

اجمل شيء بشخصيتك ماتهمك المظاهر والاصل والفصل ..والماديات

عندي سؤال (هل انتي مطلقة؟ أو أرملة؟)

انتي صبورة
انتي حياتك مليانه اعمال
انتي رغم كل الي قلناه فوق الا انك تمتعين نفسك
فيك قدرة عجيبة على التكيف مع الظروف الصعبة
عندك عطاء وتضحية وعمل كثير

انتي انسانه المشاكل الي في حياتك سببها الرئيسي انك حساسة جداً
لو ماكنتي حساسة لهالدرجة وتنجرحين بسهولة ماكنتي تعبتي كل هالتعب

(قلبي لاتددقين بكل شيء يصير ترى انتي تهتمين وتفكرين وتشيلين هم وتحرقين نفسك
والناس مادروا عنك) قهروك بكلامهم وراحوا
وانتي مارديتي عليهم بس عشتي قلق وقهر ودموع

HAIFA-KSA
هلا بالي كانت سبب فتح الموضوع

حبيبتي
امك كانت انسانه مضحية وحبيبة بس ماكانت تتدخل بحياتك كثير
كانت تعطي وتعطي وتعطي وتنسى نفسها
امك ماكانت تنتقدك ولا لها دور كبير ببناء شخصيتك
بس انتي بنيتي شخصيتك بنفسك بعصاميه

ومن تجاربك
امك انسانه على نياتها
انتي لأ انتي إنسانه حذرة وغير تختلفين عنها رغم حبك لها طبعاً



انتي انسانه قلقة
متوترة ,

خايفة من المستقبل
ماتثقين من الاشخاص الي خارج نطاق عائلتك أو الغرباء
وعلاقاتك محدودة جداً
انتي انسانه منظمة,
لكنك متشائمة
تتوقعين أسوأ الاحتمالات دايم
تخططين لكل شيء
ماتحبين المفاجأت
بس لو تفاجأتي بذكائك تعرفين تتصرفين صح

غريبة شخصيتك
تحبين الشخص الي يثقل عليك
ماتحبين الشخص الي يندلق عليك ويحبك كثير



واثقة من نفسك,لكنك ماتثقين بأحد ثاني
حياتك فيها مسؤوليات بس انتي بترتيبك ونظامك وذكائك مرتبتهم ترتيب حلو,
عندك وقت للراحة ووقت للعمل

عندك أمل او طموح أنك تتخلصين من كل الأشياء الي مضايقتك بحياتك وتسافرين لدولة ثانية

انتي من الناس الي يؤمنون إن الإنسانه يصنع حياته بنفسه
وإن الانسان مسؤول عن نجاحة وفشلة
ماتعترفين بشيء اسمه ظروف ومعوقات
انتي بعد بنيتي حياتك بنفسك وبعصاميتك وتتوقعين ان الاشياء الي خططتي لها من بدري بإرادتك القوية,
بتكون هي
سبب سعادتك وتفائلك بالمستقبل

تحبين التميز والأشياء الصعبة

ماتحبين المظاهر
في المناسبات تحبين لبسك يكون رسمي وتقليدي ماتحبين الصرعات والموضات الجديدة واللبس العاري
بالعكس تكرهينها بشدة

عندك قلق كبير بحياتك بسبب أنك ماتحبين تسوين شيء ويخرب أو يفشل خصوصا الطبخات الفاشلة تعتربينها كابوس


فيك شيء شين

قليل ماتقولين شكراً
أو الحمدلله

دايم بالك مشغول,

شخصيتك قوية

بسم الله الرحمن الرحيم,,, عاد لا تتأخري علينا,,,,

السؤال الأول:

كنت في يوم من الأيام تمشي في غابة أوصف لي الأشجار الي في الغابة؟

طويله خضره ومتزاحمه

تابع السؤال

كنت تمشي بسهولة ولا بصعوبة
كان الطريق واسع وامشي بسهوله ومتعرج شوي والأشجار جحم عادي

كان الطريق مستقيم ولا متعرج؟

متعرج شوي

كانت الأشجار ضخمة ولا عادية؟

عاديه



السؤال الثاني:
صادفت بالغابة حيوان .
عصفور ابيض جميل




السؤال الثالث:
ايش سويت لما شفت الحيوان . وشلون تصرفت؟

تأملته وبعدين كششته يعني طيرته



السؤال الرابع :
دخلت بيت في الغابة

البيت من خشب وداخله كله خشب الصاله متوسطه الحجم وفي سجاده عجميه وفوقها طاوله من زجاج وعليها مزهريه فيها ورود والنافذه كبيره مطله على المنظر الخارجي

السؤال الخامس:
التفت وشفت في الجدار لوحة .
ماذا كان مرسوم في اللوحة(( ابي وصف دقيق ابي على الأقل ثلاث سطور)

عباره عن رسمه بحر لون ازرق فاتح وعاصفه في السماء الغيوم كثسفه وسوده والبحر متهيج



الوان اللوحة كيف كانت كانت قوية ولا باهته؟

اللوان غامقه بس البحر فاتح لونه


السؤال السادس


فتحت صندوق.


ماذا وجدت في الصندوق؟


سجاده صلاه

السؤال السابع



التفت إلى الجدار الأول



فشاهدت


ثلاث براويز للصور فوتوغرافية لثلاث أشخاص على الجدار . صور من شاهدتها؟

رجل كبير في السن وام ومعها فتاه صغيره

السؤال الثامن


على الجدار كانت نافذة مغلقة قمت وفتحت النافذة ماهو المنظر الذي شاهدته عندما فتحت النافذة؟

(ابي الوصف تقريبا سطرين)

أشجار ومعه يمر بينه نهر جميل وهادئ


انتهى الاختبار

ومشكووووره انتظر نتيجتي بفارغ الصبر

يابنات لاتحطون اكثر

لأما راح أفسر لاحد غير اللي حطوا(أول عشرين بنت) بالاضافة للأخت رغودي


تحليل الشخصيات ياخذ وقت طويل فلا تستعجلون
إذا الله احيانا والحقنا خير على مدى الاسبوع كامل
فمان الله