بصراحه شفت ولا ألف موضوع امهات يدد يسألون شنو اول بنتي او ولدي اول مره او باي عمر ابدي اوكل البيبي فحبيت افيدكم بما اني كنت مهووسه بسالفه الاكل لعيالي الله يحفظهم ما في كتاب او دكتور او موقع مختص الا تلاقيني داشه و مستفيده منه
اول شي البيبي لغاية 3 شهور ما ياكل ولاشي الا الحليب و الماي بكميه معتدله و ماء التمر المخفف
متى ابدي اوكل البيبي ؟
الاكاديميه الامريكيه لطب الاطفال تنصح الامهات بتقديم الطعام الصلب عند بلوغ الطفل 6 شهور بحال انه كان يرضع طبيعي فقط اما اذا كان يرضع الحليب الصناعي او رضاعه مختلطه فممكن ان تقديم الطعام من عمر 4 شهور اذا حسيتي ان الطفل ممكن يتقبله يعني من طفل لاخر يختلف في يهال ماشاءالله من عمر 4 شهور تحسه الام ما يشبع من الحليب و يعطي اشارات ان مستعد للاكل
شلون اعرف ان البيبي مستعد للاكل ؟
اول شي لازم يكون الطفل يقدر يتحكم براسه بانه يخلي راسه مستقيم ( يعني يكون شاد مو رخوو )
لما تعطينه الاكل ما يستخدم لسانه بانه يطلع الاكل بره
يكون يقدر يقعد بروحه او مع استخدام مساعده ( مثل مساند) المهم ان يكون قاعد علشان عملية البلع
يكون قادر على دفع الطعام الى جزء الخلفي من فمه
وزن البيبي يكون دبل وزنه عند الولاده
تحسينه يوعان حتى بعد شرب الحليب 8-10 مرات باليوم اتحسينه ما يشبع
الفضول اتشوفينه يشوف شنو قاعده تاكلين و يحاول بحركات مختلفه ان يقولج ان يبي من اكلج
اشلون ابدي اوكل البيبي...؟
ينصح الاطباء ان يبدأ مع عيش ميلوبا ( خالي من الحليب) او اي ماركه ثانيه المهم يكون ارز ، وهي خالية من الغلوتين وأقل حساسية من غيرها من االأطعمة و الارز سهل الهضم و بنفس الوقت لذيذ.
بعد الرضعه عطيه ملعقة شاي من السيريال مخلوط مع حليب الام او حليبب التركيبه يكون شبه سائل ( لضمان ان ما يصير فيه حساسيه من الحليب تاكدي ان العلبه مكتوب عليها اضيفي الحليب و قدمي للطفل )
و استخدمي ملعقه مصنوعه من المطاط او الربل علشان لاتعورين لثة البيبي و حطي كميه قليله بطرف الملعقه
طفلك لا يأكل كثيرا في البداية ولكن امنحيه الوقت ليعتاد على هذه التجربة الجديده
ممكن استخدام ايد الام لاطعام الطفل بس هالله هالله بالنظافه و لا تشوفج الشخدامه لانهم بقلدونج
قدمي الطعام له مره وحده باليوم و زيدي عدد المرات على حسب شهية الطفل
لا تحطين السيرلاك او سيريال الارز بالرضاعه ( المميه) علشان يتعلم مفهموم الاكل غير عن الحليب
لا تعطينه الاكل لما يكون قاعد يبجي او متعسر لانه ما راح ياكل اختاري وقت يكون الطفل فيه رايق لتقديم الطعام الصلب له
اشلون اعرف ان البيبي شبع ؟؟
لا تنصدمين من الكميه القلييييله الي يبدي ياكل فيها الطفل و هذا شي يختلف من طفل لاخر يعني لا تقارنين ولدج باعيال غيرج
اذا شفتيه قام يوخر ويهه او قام يلعب بالملعقه او مو راضي يفتح حلجه يكون يعني شبع
تاكدي ان فمه خالي من الاكل قبل تقديم اللقمه التاليه له ( يعني لا تزغطين الياهل نفس البط )
متى و شلون اشكل نوع الاكل للطفل ؟؟
إدخال المواد الصلبة الأخرى تدريجيا ، واحدة في كل مرة ، والانتظار ثلاثة أيام على الأقل بعد كل جديد في الغذاء. وبهذه الطريقة ستحصل علىمتابعة طفلك إذا كان قد الحساسية واحد منهم (علامات حساسية قد تشمل الاسهال ، انتفاخ البطن ، وزيادة الغازات ،). إذا كان هناك تاريخ عائلي من الحساسية ، أو تطور طفلك الحساسية أثناء هذه العملية ، والانتظار حتى بداية الأسبوع بين الأطعمة الجديدة.
أغذية جيدة للبدء مع تشمل البطاطا الحلوة ، ، وعصير التفاح والموز والجزر ودقيق الشوفان ، والخوخ ، والكمثرى. ينبغي أن تكون جميع المواد الغذائية مهروسه بحاله شبه سائله
لا تستغربين اذا ولدج كان يحب البطاطا الحلوه و مره وحده ما قام ياكلها عادي خلييه فتره ( اسبوع مثلا) و بعدبن رجعي عطيه مره ثانيه
طبعا يفضل الاكل المعد بالمنزل او اذا ما تقدرين ولا تكونين بالزواره او طالعه عطيه من العلب الجاهزه بس تاكدي ان غير مضاف عليها الملح او السكر .
منتجات الحليب ممنووووووووووعه لغاية السنه ماعدا الروب قدميه لطفلج وايد زين بس لا تعطينه الروب المحلى او الي بالفاكهه لانه فيه سكر و طعمه وايد حلوو راح يخليه يرفض الاطعمه الاقل حلاوه
اكل الطفل خالي من البهارات و السكر و الملح ( لاتقولين لا الاكل ماصخ الياهل ما يعرف شنو ماصخ او حلو الا لما انت اتذوقينه )
تجنبي البرتقال في اول الاشهر لانه يسبب حساسيه لمعدة الطفل
العسل يفضل بعد السنه ( انا اعطي عيالي عسل العويد لانه مخصص للاطفال شايلين من البكتريا الي اتسبب حساسايه لمعدة الطفل )
