عمري 17 سنة تقدم لي رجال الكل يمدح فيه وباخلاقه ومتمسك فيني .. احترت اوافق ولا ارفض؟

السلام عليكم ورحمة الله وبركاته

يسعدلي يومكم بنات وجمعة مباركة

بدخل بالموضوع من دون مقدمات

انا بنت توني داخلة 17 سنة ادرس ثاني ثانوي وتقدم لي رجال الكل يمدح فيه وباخلاقه ما شاء الله وطيب وما يدخن
وبار بامه وقايم باهله وما عنده لف ودوران :35:

طبعا انا قبل كل شي استخرت وما خاب من ااستخار
بس بعد لازم افكر بالمستقبل قبل كل شي
انا عارفة ان الزواج مسؤولية كبيرة وحياة جديدة واستقرار ما يحتاج اقولكم وخاصة اول سنة ولازم اعود نفسي اني اتكيف واحاول افهمه وافهم طبايعه وطبعا مع العشرة راح افهمه اكثر واكثر
و واهتم بالبيت من طبخ وتنظيف وكل شي ولازم انظم وقتي بين بيتي ودراستي وانسى انو ببيت اهلي افل واروح واجي على كيفي متى اما ابي ومع مين ما ابي
وما يخفى علي فترة الملكة انها احلا فترة لان كلها نصب واحلام وردية خخخخخخخخخ :hahaha:
وانا حاطة ببالي ان الزواج مو وناسة وطلعات ورومانسية الزواج استقرار وتفاهم واحترام متبادل بين الطرفين وحب ووفا وعلى هالاساس يكون زواج ناجح

طيب مع كل هذا وين المشكلة ؟
انا اقولكم طال عمركم انا وحدة مالي بشغل البيت ابد ببيت اهلي الخدامة مسكينة تطلب الرحمة
تدرون اذا مرة تطورت وصرت حرمة سنعة وش اطبخ ؟ بيتزا محروقة بالتوست

والله لو تسالوني القهوة العربية كيف يسوونها ؟ بقولكم يجيبون مويا ويحطون كركم وبس :hahaha:
يعني اكيد بتعلم الحين ولا بعدين وغصبن عني
بس ابي اعيش حياتي واهلي يبوني اوافق يقولون رجاااال ما يتفوت والي متقدم لي شاريني ويقول انا بساعدها بكل شي
لا يروح بالكم بعيد ترا ما بيني وبينه شي ربي شاهد بس انه حب اخلاقي وطيبتي من كلام الناس :39:
عشان كذا متمسك فيني

ساعات افكر اقول انا توني صغيرة وفي سن مراهقة خليني اعيش حياتي لاحقة على وجع الراس وادري الاغلبية بيقولون كذا والي بتقول هم وقلق ومدري ايش
وساعات اقول اوافق يمكن القاه الشخص الي اتمناه ويسعدني

واخر شي هو نصيب والي كاتبه ربي بيصير

حبيت اخذ رايكم لانكم خبرة والاغلبية كبيرات وانا صح بحكم سني مالي ذيك الخبرة بس رجاء لا تجي وحدة تقولي بزر ولا ردود الي ودها تقوم تكفخني لاني ابصم بالعشرة فيه عجايز بالمنتدى عقولهن مراهقات للحين :27: والعكس صحيح



تحياتي لكم