تسلفت اليوزر عشان ارد عليك
انا مراقبه بحكوميه
وصديقتي مراقبه باهليه
اللي تقول المراقبه بالحكوميه مرتاحه وفلة حجاج مو صحيح
عموما راح يختلف الامر على حسب ادارة المدرسه والموجهه
صديقتي اللي بالاهليه .. مافيه شغله اداريه ماتشتغلها بالمدرسه
هذا غير انها ماسكه مرحلة ابتدائي كامله الحالها
الاحتياط معاها .. مع ان الاحتياط بالاساس هو عمل الوكيله .. والاحتياط اكبر مشكله .. كل شي يهون عنده ... لانك راح تتصادمين مع المعلمات كثير .. وصديقتي كثير تشكي خصوصا انها هااااااااااااااااديه وماينسمع لها صوت .. فالمدرسات دايم يهاوشونها ويقلون ادبهم عليها.. هذا غير اللي تسفها وماتقوم لاحتياطها فتضطر هي تنتبه للفصول لين ماتتكرم الاخت وتجي لحصتها
عمل المراقبه المفروض فقط يتعلق بالفصول والطالبات عملها ميداني ومكتبي
مجرد مايدق الجرس لازم تتواجد عند الفصول وتتاكد من دخول المعلمات واللي ماتدخل تناديها لازم ماتترك اي فصل فاضي
ولو حصل وصارت مشكله في فصل راح تكون مسؤوليتها .. لانها هي اللي اهملت شغلها ومادخلت المعلمه لحصتها
لازم تاخذ غياب الطالبات وتتصل عليهم وتسجله بالسجل ... ايضا الطالبات المتاخرات بالصباح تسجل اسمائهم بالسجل
تجمع اعذار غياب الطالبات وتحطها بالملفات .. لازم تتابع غياب الطالبات بحيث انها راح تسلمهم انذارات وتعهدات اذا وصلوا لحد معين ..
واذا تعدوها ممكن يحتاج الامر انها ترفع فيهم للاشراف للنظر بحالة الطالبه وتحويلها للمنازل
لازم تنتبه لنظام الفصول وقت الحصص وتتاكد ان مافيه بنات يدورون ويتمشون .. خروج الطالبات وهروبهم من الحصص لازم تتابعهم فيه وتعطيهم تعهدات عليه
مخالفات الطالبات لازم تتابعها وهي المسؤوله عن محاسبتهم
ملفات الطالبات .. هي المسؤوله عنها
لايجيك احد يقول الارشيف والمستودع والصادر والوارد ولا الاحتياط ولا حضور وانصراف الموظفات ولا ادخال الدرجات ولا احوال الموظفات ولا الجدول من شغل المراقبه
ايضا البنت الضعيفه واللي تسبب مشاكل مع الطالبات او المعلمات مو مسؤوليتك .. هذي لازم تتحول للمشرفه الاجتماعيه هذا شغلها
الطالبه المريضه ايضا تتحول للمشرفه الاجتماعيه او الصحيه اذا في المدرسه مشرفه صحيه
المرحله المتوسطه والثانويه بما ان فيها درجات مواظبه معناها لازم تحسب غياب الطالبات والدرجات اللي تنقصهم وتتنزل عالكمبيوتر ببرنامج معارف
مو المراقبه بنفسها اللي تنزله ... بكل مدرسه الا مايكون فيه اداريات خاصات للكمبيوتر مهمتها ادخال جميع درجات الطالبات ومن ضمنها درجات المواظبه
عموما درجات المواظبه مو مشكله لان اغلب المدارس لا حكوميه ولا اهليه ماتطبق النظام فيها
الاعمال اللي راح توكل لك بالغالب راح يعتمد الامر على الاداره و على شخصيتك .. اذا انت تسكتين لهم من البدايه وترضين تاخذين شغل مو لك راح يعلونك
ايضا لو ما اوكل لك غير اعمالك اللي انت مسؤوله عنها راح يختلف الامر على حسب الاداره و الموجهه الاداريه اللي هي اكبر مشكله
طريقة المتابعه وشدتها وتعقيدها بالتطبيق
يعني مثلا لو غابت بنت ودقيتي وماحد رد
ممكن تجي موجهه تقول اكتفي بعدد معين من محاولات الاتصال اذا ماردوا بسلامتهم
ممكن تجي وحده ثانيه تقول خذي الرقم معك البيت ودقي لو العصر او الليل لازم يكون فيه رد
وممكن تجيك ثانيه تقول اذا انتهى اليوم وماردوا من بكره حتى لو البنت جايه مو مشكله دقي على البيت وقولي لهم ترا بنتكم غايبه امس .. حتى لو كانت البنت جايبه لك خطاب من ولي امرها
يعني الموجهه اكبر مشكله
المعروف ان الوكيله تتابع شغلك كل شهر مره .. تاخذ جميع سجلاتك وتتاكد من صحة البيانات ومن وجود خطابات الطالبات الغايبات
المديره تقريبا مرتين بالترم
الموجهه مره واحده بالترم .. يعني مرتين بالسنه
هذا اللي ببالي الان ..
اعتذر ان كان فيه اي اخطاء او اعاده بكلامي وعدم ترتيب اكتب وانا مستعجله لاني طالعه الان عندي مشوار
لكن ان شاء الله اني اكون افدتك
يا معلمات ويا بنات ما هي مهام المراقبة في المدرسة..افيدوني؟
متابعة النقاش، صفحة 2