سلفتي مغرمه بزوجي

السلام عليكم ورحمة الله وبركاته
بنات بدخل على طول في الموضوع
انا الحمدالله تزوجت وانا عمري 20 سنه وزجي جدا محترم وخلوق الله يحفظه لي والحين كملت 6 سنين من زواجنا وعندي 3 اطفال الله يحفظهم لي يا رب
الزبده .........
عشت اول سنتين مبسوطه حبيت زوجي بجنون عانيت في بداية زواجي بسبب اختلاف الشخصيات يعني متخالفين في الراي مثل الاكل اللبس الطلعات بس ما كنا نزعل من بعض الاقليل جدا اول 7 شهور عشنا بشقه لحالنا وبعدين طلب مني ننتقل لبيت اهله بسبب المصاريف بصراحه ما مانعت لاني كنت افكر اني اتحمل شوي لحد ما نكون نفسنا ونبني بيتنا
وانتقلنا والحمد الله ما امدح نفسي حبيت امه وعاملتها زي امي بالضبط ما اطلع من البيت الا بشورها روحاتي وجياتي بعلمها وهي كمان حبتني زي بنتها واكثر حتى خواتها دايما يقولون لها يا حظك بزوجة ولدك يعني علاقتنا كانت عسل في عسل حتى زوجي يقولي مشاء الله عليك خليتي علاقتي باهلي وعماتي وخلاتي ممتازه انا كنت قبل لا اتزوج نادر ازورهم ودائما يعتبون علي وانجبت طفلي الاول وام زوجي تمممممووت عليه كل ما راحت مكان جابتله لبس والله ما كنت اشري ملابس كثيره لولدي لان جدته مغرقتنه بالملابس الله يحفظها ........... الى هنا تمام
قرر اخو زوجي الي اصغر منه انه يتزوج بنت خالته سلمى وهذه البنت كانت مرشحه لزوجي بشكل كبير بس هو رفضها طبعا انا ما كنت اعرف هذا الشي المهم تم الزواج وشاركتهم بالفرح من هدايا ومساعدات في الحفلات وغيرها بكل فرح وسرور وقلبي يحمل لهم كل الحب والتقدير في هذه الفتره كنت حامل حملي الثاني وكنت اتجهز للسفر مع زوجي لتحضير الماجستير زوجي كان مسافر قبلي عشان يجهز الامور هناك من بيت وغيره وعشان اولد عند اهلي وبعدين اروح معه ........... رجع زوجي من السفر وكنت والده انتظرني اكمل 40 وسافرنا طبعا ام زوجي حزنت كثير لسفرنا وبكت وكانت تترجانا نترك لها ولدي بس طبعا انا وزوجي رفضنا خوفا ان الولد بعدها ما يبغانا ووعدنها انا راح نكلمها يوميا بالنت ونشوف بعض وان الولد مستحيل ينساها .....
طبعا واحنا في السفر زوجي كان معطني الباسورد حقة ايميله عشان اتواصل مع اهله وانا كنت اخلصله شغلات كثيره بالايميل يعني ما في اسرار بيننا ...... بعد 5 شهور جات رساله من سلمى لايميل زوجي تعبر فيها عن حبها لزوجي وانها تزوجت اخوه عشان تكون قريبه من زوجي وانها تعاني بزواحها ومشتاقه لزوجي ...........طبعا ان شفت الرساله وانا كلي ثقه بزوجي ....... بس ما تحملت الكلام المكتوب ولما واجهت زوجي قالي انها كانت المرشحه الاولى له عشان يتزوجها حتى خالته قالت له خذ سلمى بدون مهر وانه رفضها ... انا انهرت اول مره بحياتي احس بشعور غريب ما ادري كيف اوصفه .....اتصلت على اخت زوجي وعلمتها بموضوع الرساله بصراحه ما دافعت عن سلمى ابدا ولا قالت مستحيل بالعكس قالت انها كانت حاسه بشي غريب من تصرفاتها في اول ايام زواحها كانت تنام ببيت اهلها هيه بغرفه مع خواتها وزوجها بغرفه الشباب وهم عرسان وانها اتجرأت ونامت بغرفة نومي هيه وزجي بغيابنا في الغربه ................:mad:وقالت لي اخته انها راح تكلمها ولما واجهتها انكرت وقالت مب هيه الي ارسلت وما تدري من الي دش ايميلها وارسل ......... في هذه الفتره اهل زوجي كانو يستعدون لزيارتنا في الغربه وكانت الدنيا ما واسعتني من الفرحه ام زوجي الي انا دائما اناديها بامي بتزوني ببيتي هيه وابو زوجي واخته يعني الحبايب وكنت كل وقتي احط البرنامح وين بنروح وايش راح اطبخ لدرجة اني حطيت المنيو من فطور وغدا وعشاء لكل يوم يعني عملت جدول .....وجهزت وجيوا بس كانت الصدمه لي ام زوجي ما هيه امي الي تركتها بدموعها وحزينه لفراقي متغيره علي كثير ولما سالت اخت زوجي قالت انها درت بموضوع الرساله وتضايقت بس انا ايش ذنبي قلت لزوجي لازم نكلمها ونفهما الموضوع يمكن فاهمه غلط وكلمنها وقالت لنا انتم كيف تصدقون ان سلمى تسوي شي زي هذا هذه فتنه وكان لازم ما نعلم احد فيها حاولت افهما ان سلمى ما تسال عنا ابدا وعمرها ما كلمتني بغربتي وانا ابدا ما عاملتها بسؤ قالت لي هيه طبعا بارده وسلمى بنت اختي وانا ما ارضى عليها واصلا هيه حامل لو كانت تبغى زوجك ما كانت فكرت بالحمل ......... يعني حسستني اني اتبلى عليها وان الموضوع مو صدق مع ان الايميل موجود
مع ذلك قال زوجي خلاص ما نكبرها وطبعا رضى امه فوق كل شي وانا كنت ناويه اشري اغراض لبيبي سلمى وارسلها بس لما دريت بالرساله انكسر خاطري وكنسلت الفكره وهذا الشي قلته لاخت زوجي وهيه ما قصرت علمت امها وزعلت مع ذلك طلعنا انا وزجي وشرينا اغراض للولد طبعا كنا عارفين ان ببطنها ولد وعطيت امه وقلتلها سلمي عليها واني راح انسى الموضوع وكان شي لم يحصل ................
بنات تعبت اعذروني بكمل بعدين

مرحبا ........ اشكر كل الاخوات الي رد علي .........
وراح اكمل ...
راحو اهل زوجي يعني رجعو للبلد واحنا بعدههم بشهرين نزلنا عندهم اجازه وجات المفاجأه في يوم وصولنا ولدت سلمى وانا طبعا من المطار لبيت اهل زوجي يعني لساني ما شفت اهلي وتعب السفر طبعا رحت لاهلي وما رحت ازور سلمى بالمستشفى هيه قعدت يومين بالمستشفى وبعدها بقت عند اهلها فاجأتي برسالة جوال *** هلا اخبار فلان الي هو زوجي والاولاد مشتاققتلهم *** طبعا في المسج ما سالت عن اخباري ولا شي كانها تبغى تقهرني وانا لحد الحين ما علمت اهلي بالموضوع ما ابي اسوي مشاكل .. بلعت الموضوع ورحت ازورها انا وزوجي والاولاد طبعا زوجها ما كان موجود بولادتها كان مسافر ......... ولما رحت قابلتني ببرود شديد طبعا كانت عامله توزيعات للبيبي وقدمو لزوجي منها وقام زوجي وجلس يمدح بالتوزيعات الي عاملتها زوجة اخو بدون ما يراعي مشاعري انا لما سويت توزيعات بولادتي عمره ما مدحني ما اني عمري ما كلفته شي اسويها بنفسي بس ما كنت ازعل لاني عارفه طبعه بس بصراحه انقهرت من تصرفه كثير ولما رحنا قلت له ما كان له داعي تمدح في التوزيعات لانك اصلا من المعارضين لها على حد علمي بتصرفك هذا انت جرحتني ... اخذتها بخاطري بصراحه ........
نسيت اقولكم ******* في مره قبل لا اسافر جات هيه وزوجها بينامون عند اهل زوجي لانهم كانو ساكنين بشقه وفي بيت اهل زوجي فيهغرفه للضيوف وهيه نفس الغرفه الي انا احط اغراض عيالي البسيطه لما اكون في الطابق التحتاني لان غرفتي فوق كنا انا وزوجي جالسين بالصاله مقابل غرفة الضيوف زوجي قاعد يطالع مباراه بعدين انا طلعت غرفتي وخليت زوجي وتذكرت ان نسيت غرض ولدي في غرفة الضيوف ونزلت اجيبه طبعا الباب كان مفتووووووووووووووووح يعني مو مسكر دخلت واتفاجأ ان سلمى طالعه من الحمام بقميص نوم وباب الغرفه مفتوووووووووووح وزوجي هناك طبعا استغربت من الموقف بس صرفت ابليس ولا تكلمت مع احد ولا حتى مع نفسي قلت سبحان الله يمكن نست طنشت .............
اكمل بعد ما طلعنا من زيارتها وبعد ما قلت لزوجي اني اخذت على خاطري بتصرفه هو اعتذر انا سامحته بس بصراحه ما قدرت انسى لاني اعتبرته جرح ...
رحنا البيت وفي اليوم الثاني اشوف صور سلمى والمولود بالكمبيوتر وزوجي طول وقته بالكمبيوتر قلت اكيد زوجي شاف الصور رحت وسالته ليش صور سلمى وولدها بالجهاز قالي انا حطيتها لاني ابرسلها لاخوي عشان يشوف ولده
قلت طيب من حقه يشوف ضناه بس انت ارسلت صور سلمى بعد صح ؟ ايوا ايش فيها زوجته ..... :eek::eek: وانا وجهي كذا قلت له انا ما ارضى انك تشوف صور حريم مو من محارمك وكيف انت ترسل صورة سلملى يعني تقعد تكبر وتصغر في الصوره قالي امي طلبت مني ارسلها لان هذا طلب سلمى تبي زوجها يشوفها ويا البيبي وهيه ما تعرف ترسل ولا حد من اخوانها يعرف حسيتها جرح ثاني كيف انه ما يفكر في مشاعري ........
بعد اسبوع من ولادة سلمى قال لنا ابو زوجي احنا معزومين ببيت اهل سلمى بمناسبة المولود انا رفضت اروح وتحججت اني ابي اروح لاهلي طبعا عمي ما يدري بالموضوع وزوجي قال ما بيروح ام زوجي ما علقت وهيه عارفه سسب رفضي لروحه ........
جاء عاليوم الثاني يوم العزومه طبعا بعد ما خلصت العزومه اتصلت سلمى علي تسالني ليش انتي وفلان الي هو زوجي ما جيتو ... وانا ساعتها خلاص البركان اشتعل قلتلها كل الي في قلبي لما خرجت بقميص نوم ولما سمحت لنفسها تنام بغرفتي بسريري انا وزوجي واقولها انتي كيف تسمحين لنفسك تنامين بفراش رجل !!!!!!!! قالت والله ما انا الي اخذت المفتاح هذه خالتي هيه الي طلبت مني ادخل غرفتش وابات فيها انا وزوجي وقلتلها طيب انتي ليش ما رفضتي هذا الشي وماكان في سبب قوي يخليش تباتين بغرفتي وبيتك على بعد 10 دقايق يعني حضرتها ما حاسه انها غلطانه وما فكرت تعتذر وبديت اناقشها وطبعا ما ادري فصل الخط ولا هيه سكت بوجهي ........
بعدها بدقايق اتصلت خالت زوجي بس مش ام سلمى وطبعا تدافع فيه عن سلمى وانا تصرفاتها سليمه ما فيها شيء عادي تنام بغرفتش هيه ما زنت بغرفتش وعادي ترسلك مسج تسال عن زوجك لانه ولد خالتها ومتربين مع بعض
المهم كل انواع الدفاع عنها ........... كان ردي لها قلتلها يمكن اعتبره عادي لو ما فيه ايميل غرامي منها لزوجي بس بعد الايمل ما اظن انه عادي ......!!!!!!!!!!!! وانهينا المكالمه
رجعت ام زوجي البيت بالليل وحتى ما ودها تناضرني بس ما توقعت ابدا انها شايله علي وكل واحد منا راح ينام وجينا لبكره لما اروح اجلس معاها تقوم لمكان ثاني رحت المطبخ راحت الصاله رحت الصاله راحت المطبخ وقتها حسيت ان في شي وزوجي مو موجود قلت انتظر زوجي لما يرجع واكلم امه واشوف شو الي مزعلها مني
لما جاء زوجي رفض في البدايه وقلت له انا بروح لحالي بعدين وافق وجاء طبعا انا الي بديت الكلام وسالتها خير امي عسى ما شر ايش فيه شو صاير ؟؟ طبعا بدت تصيح وقالت انتي جرحتيني ليش تضايقتي لما سلمى باتت بغرفتك انا الي سمحت لسلمى تبات بغرفتك حاولت ابررلها انها مملكتي ومش ممكن رجل غريب ينام بسريري طبعا هيه تفهمت طيبت خاطرها وقبل لا اسافر رحت وشريت هديه للبيبي وزرت سلمى طبعا كل هذا عشان خاطر ام زوجي الله يحفظها ابيها تكون راضيه وتدعيلنا وتدعي لولدها بالنجاح والفلاح .............. ورجعنا لغربتنا حاولت انسى الموضوع وما افسد حياتي زوجي واولادي دنيتي كلها للحين اهلي ما يدرون بشي ..... جاء ايميل ثاني من سلمى لزوجي ايميل حب ووله وشوق بس هذه المره بيوزر نيم مختلف يعني مش نفس ايميلها الاصلي وبين كل شهرين وثلاثه يوصلنا ايمل حب لمدة سنه وخلال هذه الفتره انا حملت بالثالث ونفسيتي زفت غربه وحمل واطفال صغار طبعا ما اتحملت الوضع تكلمت مع اختي وصار تدخلات كثيره في الموضوع ولاول مره ارفع صوتي على ام زوجي وصارت لي حاله نفسيه غريبه اصرخ واحس بضغوطات نفسيه لا نهم كلهم واقفين بص سلمى طيب وانا ايش ذني خلال هذه السنه ام زوجي طنشتني ما عادت تتصل فينا وتتطمئن على احفادها ولما ارسل لها مسجات اقول لها العيال يستنوكم عالنت يبغو يشوفوكم ولا ترد المهم علاقتنا تغيرت كثير من العسل الى البصل
خلصنا غربتنا ورجعنا واستقرينا وبعدنا ما افتكينا من هذه المشكله خلصنا من الايميلات جاتنا رسائل وبطاقات مكتوبه بتوقيع سلمى وهيه تنكر ذلك ......................
طبعا عمي ابو زوجي عرف بالموضوع وواقف بصف سلمى
زوجها يدري وما اعرف شو موقفه بالضبط
الحين انا ساكنه لحالي ببيت وعلاقتي باهل زوجي سطحيه وهذا الشي زاعجني كثير لاني انسانه اجتماعيه
المشكله زوجي يشك فيني بس ما يشك في زوجة اخوه غير موقفه اتجاهي والحين يطالبني اني اروح استشاري نفسي يقولي انتي التسوي يمكن عندك انفصام في الشخصيه
اهلي تدخلو من بعيد ويحاولو يصبروني لانهم ما يريدو المشاكل تكبر
المهم الموضوع هذا له 3 سنوات
احداث كثيره صارت ضدي تعبت كثير
فقدت ثقتي في نفسي
اهم شي عندي ابغى اكسب ام زوجي مثل قبل عشان اكسب رضى زوجي الهدايا والعزايم سويتها ولما اروح عندها اخذ عشانا ونتعشى مع بعض بس ماشي فايده لدرجة انهم سو عزيمه في بيتهم ولا عزمونا
الي عندها حل تفيدني بيه والي ما عندها تدعيلي ربي يسخر لي زوجي وترجع المياه لمجاريها

400 تعليق 79,328 مشاهدة

شاركي في النقاش

سجلي الدخول لإضافة تعليق.

التعليقات

382
  1. كان كلمتي زوجك و تناقشتي معاه و بس
    لانه اكيييد حماتك ما بترضاها على بنت اختها زوجه ولدها
    المهم الله يهنيك انت و زوجك و يسعدكم و جاولي توددي لام زوجك و ترجع المياه لمجاريها

    في انتظار التكمله

تابعي تجارب أخرى من هذا القسم.