متمنية الجنة...
أهلا بيكى يا قمر.....طبعا متأخرة بس نوفى و ريمو قاموا بالواجب...واسمحيلى طبعا أعبر عن إعجابى باسمك الجميل و ربنا يكرمك و يكرمنا و يحسن خاتمتنا و ينولنا الجنة بأمره و يحرم وجوهنا على النار....
انتى لما دخلتى قلت مشكلتك مشكلة.....و قلقت كتير....لكن يا شيخة ده انتى على رأي نوفى طلعتى زمل.....انا كمان زمل بس الحمد لله ربنا أكرمنى و اخدت إفراج و بأمر الله أنتى و باقى أخواتى هتحصلونى قريب و الزنزانة تبقى فاضية على التكيس اللى ربنا يمحيه من الوجود ده....(على فكرة احنا بنكرهه بس هو الى حد ام أليف و لو احسنا التعامل معاه هيلم عزاله و يسيبنا نحقق الحلم الجميل)
فانا ليا عندك طلب...اولا ....ترجعى للأول و تقري موضوعنا عن التكيس اللى فى الصفحات الأولى علشان لو فيه حد اتبع معاكى خطوات ملهاش لازمة يبقى تقوليله طظ فيك...
و بعدها بصفحة كده هتلاقى نموذج تعارف....امليه يا قمر و ده هيريحك و يعرفنا عليكى اكتر و يوفر علينا الأسئلة و يجيبلك التعليقات لحد عندك.....
و أخيرا هاقولك كلمتين نونو من واقع تجربتى....التكيس من أسهل الأمراض اللى بتؤخر الحمل و عايز تعامل سليم معاه و خطوات علاجه بسيطة...و على فكرة مش محتاجين حقن و لا عمليات لو المشكلة تكيس بي (يعنى لو مطمنين على الانابيب و تحليل الزوج يبقى نظبط التكيس و كله هيبقى تومام)
1- اول علاج للتكيس فقد الوزن....لانى اخدت العلاج و مخستش و كانت النتيجة حمل بجنين بدون نبض و طبعا انتى عارفة بقية الحدوتة...
2- يتزامن مع فقد الوزن تناول دواء الميتفورمين (سيدوفاج او جلوكوفاج او اي شئ بينتهى بقاج) و ده يستمر عليه كذا شهر لحد ما نخس و بعدين نبدأ تنشيط و نفضل مستمرين عليه لما يحصل حمل لحد ام نشوف نبض الجنين و نطمن عليه...
3- بعد الخطوات ديه ممكن نحمل لوحدنا و ممكن نحتاج كام كورس تنشيط.....
4- و لازم بس نطمن ان البرولاكتين مش عالى لانه ساعات بيرتفع مع التكيس و بيحتاج دوا ينزل مستواه و دوا يثبته لحد ما يحصل حمل علشان ميطلعش تانى.
5- طبعا مش هتنفذي الخطوات ديه لوحدك لانك لازم تكونى مع طبيب محترم و فاهم و انا كمان بانضم لنوفى و أرشحلك دكتور عادل فاروق...لانه فعلا محترم و امين و شاطر و كل نصايحه فى الجون...وواضح ان كل اللى رحتيلهم ضيعوا من وقتك كتير و مادوكيش العلاج الصح و آخر المشوار كانوا هيدخلوكى على عمليه حقن و انتى اصلا مش محتاجالها لانك محتاجة تظبيط هرمونات ممكن تبوظ العملية و لو اتعالجت صح هتحملى من غير العملية.....
و أخيرا انتى يا بنتى احتسبى السنين اللى مرت ديه عند ربنا و حسبى الله فى كل طبيب ميفهمش فى تأخر الحمل و يفتى و يضيع على الناس عمرها و فلوسها و يعطلها عن حلمها.....و كمان احمدي ربنا كتير انك و لله الحمد بعد السنين ديه لسه نونو على رأي نوفى و ان شاء اللله ربنا يجعل وشنا حلو و يرزقك بدستة عيال و انتى معانا
تجمع الموقنات برحمة الله ( خبرات متبادلة حول مراكز تأخر الحمل في مصر ) ج 11
متابعة النقاش، صفحة 314