~~ ليه أنا غيـــــر عن كل الناس وكل البنات ؟؟ أنا شابة بجسد عجــــوز ! ~~

السلام عليكم


منتدى عالم حواء بكل صراحة من اروع المنتديات اللي تعرفت عليها وصرت ادخله كل يوم واقرا واتثقف فيه

لذلك حبيت اني اشارككم عن نفسي يمكن الاقي عندكم حل لي

انا مدري بالضبط


مشكلتي مشكلة وحده ولا مجموعة مشاكل اجتمعت فيني


احس نفسي غير عن بنات جيلي .. حياتي لا طعم ولا لون

تفكيري دائماً في الامور الشينة .. ابي اكون انسانه متفائلة وراضية بقسمتي ونصيبي

احد المشاكل اللي عندي

هي صحتي

من يوم كنت صغيرة وانا من مرض لمرض ماعشت طفولة نفس الاطفال احس اني عجوز حتى العجايز ماتجيهم الامراض اللي تجيني

ولما كبرت صارت تجيني امراض الاطفال !!

بدون مبالغه اغلب اجهزة الجسم عندي فيها مشكلة هههه والحمدلله على كل حال

وانا طفلة كان اكثر الامراض تجيني هي الالتهابات تملأ فمي ولساني وحرارة وثقل راس ما اطيب منها الا ورجعت لي مرة ثانية واصير ما اكل ولا اشرب من الالم الفظيييييييع ( ماشفت احد مثلي لا في عائلتنا ولا صديقاتي ولا احد احس اني غير عنهم )

وبعدين لما صرت مراهقه تكاثرت الامراض

جاني مرض في القلب ( مو اقول لكم عجوز ههه ) حتى لما اروح لمراجعاتي القاعه كلهم كبار سن وانا الطفلة الوحيدة بينهم ولما ادخل على الطبيب يستغرب يقول لي معقولة انتي جاية تراجعين عندي ( كلامه حطمني اكثر ) وبعد الحمدلله على كل حال

وبعدين صارت تجيني امراض غريبة ماا عرفها وصرت ماحب اروح للدكاترة منها مرض في راسي تنميل وخدران ما اعرف انام على المخده في الليل تخيلو هذي الحالة صار لها عندي الحين اكثر من 8 سنوات ولا فحصت عنها

هذا غير امراض الظهر والالامه والركب

والمعده والقولون تعبانين

والكلى والمسالك البولية تعبانه منهم

والمنطقة النسائية من مرض لمرض

والتنفس والكحة اللي صار لها عندي فوق 15 سنة بدون علاج


والحين تطلع لي اورام تحت الابط وساكته لاني مليت من الوسواس

لما يجيني اعراض جديدة على طول اوسوس بالخبيث واعيش في هم ومااروح للاطباء من الخوف وبعدين يطلع شي ثاني ويروح لوحده واحتقر نفسي لاني عشت بخوف وبكاء وحزن وصرت اقول حتى لو اشوف اي شي ماراح افكر في هذا المرض وارجع افكر فيه :(

هذا غير العيون والشعر والجلد

وغيره من امراض بعضها شخصتها وبعضها لين الحين

ادراجي كلها مليانه حبوب وأدوية :(

استغفر الله مرات اقول ليه انا غير عن الناس ليه انا الامراض ماتفكني وماحصرتني ما اشوف احد مريض حولي او يشتكي ماشاء الله على كل من حولي بعضهم عجايز وصحتهم احسن من صحتي وبعضهم سمان وشحوم ولحوم ومايشتكون من شيء

مرة سألت امي انا كيف كانت تغذيتي وانا طفلة قالت لي انتي اكثر وحده عذبتيني في الاكل وانتي صغيرة ماكنتي ترضين تشربين الحليب الطبيعي ولا الصناعي تقول اي شي اشربه كنت ارجعه وعذبتها كثير

وانا لين اليوم اكره اي شيئء مفيد لا احب الحليب ولا التمر ولا الخضروات

كل مرة اقول بس لو تحسنت شوي بعدل من نظامي
وألعب رياضة واكل شيء مفيد بس ماتمهلني الامراض الا وجاتني مرة ثانية

ودي اعرف نصائح منكم

كيف ممكن اقدر انسى الامراض وما افكر فيها واعيش حياتي مثل أي شابة بالعشرين
والله صرت اطالع في يدي كلها تجاعيد ولحمي رخو مو مشدود فعلا عجوز

كيف اهتم بنفسي وتغذيتي

بالنسبة لي اكلي وانا صغيرة كان كله من الدكان حلويات ملونه وبيبسي وشيبس وخرابيط وكنت عووود وزني مايتعدى الثلاثين لين صرت في العشرين
الحين اخربط شوي بس بعد نظامي مو صحي ومناعتي ضعيفه

اعتقد ان مشكلتي نفسية وصحية واجتماعية لاني صرت اكره احد يعرف بأمراضي واخبيها عن الناس حتى اهلي ما احب اشتكي لأحد فصارت الوسواس تطاردني بدون مساعدة من احد

التفاؤل وحب الحياة شيء حلو لكن انا بديت افقد كل معاني الحياة

جمالي راح وذاب بعد ما كان الكل معجب فيه

ذكائي خلاص انتهى وصرت احس حتى قدراتي العقلية نقصت قبل كنت من اشطر البنات في المدرسة واذكاهم الحين حتى رقم جوالي عجزت احفظه

تغيرت حياتي 180 درجة الى الاسوأ