الاعراس سابقا تعالوا كلن يدلي بدلوه
مساء الخيرات منتدانا الغالي وقبل ادخل على الموضوع اتمنى من المشرفات انهن مايشوتنه برا قصدي ماينقلنه ويثبتنه بس الساعات القادمه>>>صدقت نفسها انهن بيطيعنها بس فيه امل من حبيباتي المشرفات يحققن امنيتي ======================== =========== ~~~~~~~~ خواتي بنات المنتدى الاكثر من رائع الموضوع كله للفرفشه والوناسه وتذكر اعراس اهلنا سابقا وعاداتهم وابغى كل وحده تعصر ذاكرتها و تقول عادات اهلها او مدينتهم او قبيلتهم ودنا نتذكر الايام الجميله خبركم اللاعراس الان صارت تضيق الصدر كلها عادات دخيله علينا واغلبها تشابه وحتي لو مر سنه وتذكرها الواحد مافيها شي يونس مانذكر الا الحساد والي نفوسهم شينه>>>اصلح شاعره ههههه======= وابدا على بركة الله وسامحني اذا ماعرفت اعبر او مافهمتن شي من كلامي يمكن تلقن خربطه وعدم تعبير ========= انا من اهل نجد العرس عندنا زمان اول مع اني ماني كبيره ع31>>>ايه مااحد نشدك====== بس ابقول الي اذكره= يبدا فعالياته من اول الاسبوع من السبت و الناس مرتزه خوالها وعمانها واقاربها عند اهل العروس وطبعا العرس لازم يكون عند اهل العروس وغدا وعشاء طبعا ذبايح ومافيه مانع العروس تطبخ الذبايح>>> حرام عليهم حاكرينها طول الاسبوع بالمطبخ تطبخ لهم لانه عيب تطلع العروس عند الناس واذكر عمتي كانت كذا المهم على هالحال الي الليله الي قبل العرس يزينن الحنا ويحننها وتنام وصباح اليوم الي فيه العرس تدخل العروسه الغرفه المخصصه لها وماتطلع تنتهي مهمتها ببيت اهلها وطبعا بعد الفجر مافيه احد ينام يزينون القهوه والرجال يروحون يم مكان العرس والعرس بمخيم لانه ماكان فيه استراحات يستاجرون مخيمات الي معها طباخينها و يبنونها خارج المدينه او القريه على حسب المكان الي يسكنون فيه- والحريم يلبسن وينتظرن بقية اقاربهم الي ماجو واذا جت الساعه سبع او ثمان جاء الفطوروالفطورطبعا كبدة حاشي من المخيم للحريم لانه لازم يذبحون بعير بالنهار والرجال يصير عندهم جلسة شعر ومحاوره وسوليف والحريم بعد يتجمعن-قهوه تروح وقهوه تجي وبعد الظهر يجي الغداء للحريم ويعطن العروسه غداها وياويل الي يدخل عليها من ا لحاضرات بس امها وخواتها واذكر ياما كنت امنيتي اشوف العروسه[عمري ان ذاك 7او8 س] بس مدري من كثر ماهن متحفظات عليها احسها غير عن الحريم كلهن ودي اشوفها --- واذا تغدن جابن مسجلهن او استريوهن على حسب المسمى وقامن يسون بروفه للعرس وهاتك يارقص الين العصر وبعد العصر يتقهون ويبدا عاد الشغل الحاسم ويجون الرجال ويركبون العقود اي اللمبات الصفر القديمه اذا تذكرونها ويطلعن الحريم كلهن يفرشن الحوش لانه كما قلت سابقا مااااااافيه استراحات يسوون العرس ببيت اهل العروسه ويزينن القهوه والماء-- مشاء الله على زمان اول مافيه حسد ولا غيره ولاكره كانوا كلهم على قلوب بعض بعد كذا يلبسن ويلبسن بناتهن ولا كان فيه مشاغل ولا حوسة هالزمان وكانن هن الي يقوم بمهمة العرس كله مافيه لا صبابات قهوه ولا شي المهم اذا جاء المغرب يبدون الناس يجون وعلى طول يبدا الرقص ونرجع للعروسه اذا جاء المغرب استحمت لبست وجلست تطالع الحريم يوم يرقصن من السطح اذا كان فيه سطح وبعد العشاء يجي العشاء ثم يجي موكب المعرس ويدخلونه من وسط الحريم يعني يسوون له زفه ياعيني وفيه تفاصيل ثانيه انا ماقلتها بس اذا فيه من بنات نجد يافنكم بالي ماقلته ============ وسامحني مره ثانيه على الخربطه لانه اكيد مانتن فاهمات علي بس اذا حابات اسفسار انا جاهزه والله الله بالردود المشوقه عن عادات اهاليكم الحين استاذن ابروح اعشي عيالي وانيمهم واذا مادخلت الليله بكره ان شاء الله بعد مايروحون عيالي المدرسه ادخل اشوف ردودكم ================