الزوجات الثانيات.. هنا منزلكن الجديد غالياتي..فلتتفضلن بالدخول

الله يفرج عنك وأدعي الله هو القادر على كل ضالم ولازلت أقول لاتتنازلين صدقيني راح تعيشي طول عمرك مقهوره

ههههههههههه

انا زوجه اولى

وداخله هنا لان عندي سؤال

المفروض اسأل بموضوع الزوجات الاوليات

بس ما اشوف الموضوع مدري وينه او يمكن سكروه مدري شسالفه

طيب حبيباتي

قبل كل شي اسلم على الجميع متأخره هههه

وام سامح كيف حالك عساك طيبه ان شاء الله

خواتي انا تعرفت على زوجته فتره محدده لمجرد التعارف وبعدين كل وحده تروح لحالها

يعني لظروف مرضيه والحمدلله سوت العمليه زوجته ونجحت عمليتها ووقفت معها قلبا وقالبا

للاجر فقط لا غير ويكفي ان يجمعنا زوج واحد وكمان انها يتيمه وما لها احد

بعدها بمده انا حسيت انها تتقرب اكثر واكثر

مع العلم ان عيالي ما يدرون بزواج ابوهم بطلب من زوجي ما كان يبي هالشي

وانا ادري ان عيالي حساسين من هالموضوع فخذنا هالقرار انا وهي وزوجي طبعا

المشكله الآن ان انا مشغوله بعيالي وبيتي وحياتي واهلي

و طبعا زوجي الي لسه مو راضي ان ينقل ليله عندي وليله عنده

يعني صرت احسد الحريم الي تقول ليله عندي وليله عندها

واشوف الموضوع من منطلق اني بفضى اني ادرس او اروح واجي زيارات وغيره

زي ما يسون الحريم الي ازواجهم معددين

زوجي السبب الوحيد الي يمنعه ما ادري ايش هو ؟؟

لما اتناقش معه يقول لي مثلا انا خذيتها واتفقت معها على كذا

قلت له خلاص دام عرفت على قولة ام سامح يعني الحين وش يفرق لما يعدل

يقول انا مرتاح ببيتي وهي لها بالفتره النهاريه وانا لي بالليل

بس اتصالها صار مزعج بالنسبه لي لان كله شكاوي

وانا ما ابي اسمع شكاويها

مثلا لو عنده اجتماع ما يروح لها ويكون تعبان الين الليل يرجع بيته ويريح وينام

يعني انا ما تغير علي لان كثير كان يجيني تعبان وينام وما يعطينا وقت للجلسه معنا

يعني احسبها من منطلق ان زواجه ما غيره هو هو نفس الانسان الي من سنين

ثم شي ثاني الزوج مهما يكون ما يقدر ينظم وقته على حسب مزاج غيره

يعني انا صابره ومحتسبه

لكن صار اتصالها يزعجني من هالناحيه

تقط كلام بطريقة غير مباشره

بعدها بفتره بعد ما طابت ولله الحمد وصارت قايمه ببيتها

فتحت لها الموضوع

اني مشغوله ويمكن ما اقدر اكلمها كل يوم

فقلت لها ابكلمها بين فتره وفتره للاطمئنان عليها

حسيتها كأنها تبيني اتواصل معها عشان ما تفقد الامل بالصلح

ففهمتها ان العكس بالنسبه لي ان نيتي صافيه من ناحيتها

وبعد كم يوم ارسلت لي رسايل وراء بعض

حرام عليك تحرميني منك ومن هالكلام

اتصلت عليها

قلت لها عزيزه وغاليه بس العيال عندهم امتحانات

واساسا لما زوجي يدخل علي ما اقول له اني اكلمها ولا اجيب سيرتها

ابدا بس احيانا يسألني يقول كلمتيها اليوم

اقول له ايه الحمدلله اطمنت عليها ويقول لي الله يعطيك العافيه

وبس ما اعطيه تفاصيل

بعد اتصالي الاخير منها

ارسلت رسايل ثانيه فيها ادعيه تدعي علي بالموت وغيره

ما قلت لزوجي

سكت وما ابي اسوي مشاكل

بعدها بمده هذا الي حصل حبيباتي

حطت رقم اختها برقمي بتلفونها

يعني بدل ما تكتب اسم اختها كتبت رقمي وحفظته

واختها هذي ساكنه معها ببيت اهلها يعني مخطوبه

وصارت ترسل كلام يخجل الواحد يكتبه وترسل من تلفون اختها على تلفونها الشخصي

ولما الواحد يفتح الرساله يلاقي رقمي

وجه زوجي وقال لي ما توقعتك كذا وكل الي سويتيه الشي الطيب لها خربتيه

انا عمري ما قلت لها عنك كلام مو زين تجين انتي بعد ما كنت انشد فيك من تربيتك

تكتبين هالكلام

قلت له هذي تلفوني شوف ارسلت وله لا

قال انا شفت بعيني وزوجتي قاعده تبكي ومدري ايش

جبت القرآن احلف

وهو يعرفني اني ما احلف كذب من سنين انا معه عمري ما كذبت عليه بشي

راح اليوم الثاني وسبحان الله كانت هي مغيره خلاص الرقم وكاتبه اسم اختها

وكشفها

وصار ما يروح لها على اساس هاجرها عشان تعرف انها غلطت وجاني وسلم على راسي

خواتي الآن انا جيتها بالحسنى عشان اتفادى المشاكل ونفس الوقت احافظ على بيتي

خايفه واحس بقلق الآن وتوتر

يا ترااا وش كايده لي مره ثانيه

خصتا انها ترسل لي رسائل تهديد لما هجرها اول يومين

وبعدها انقطعت

والان اقول لزوجي روح لها خلاص اخاف فيها شي

يقول خلاص ابغير رقمك و ما ابيها تتصل عليك ولا ترسل لك

انا ما عندي اشكال

صحيح اني عايشه برعب بعد حركتها الجريئه وممكن لا سمح الله

على حسب الكلام الي قاله لي زوجي الي هي كاتبته بالتلفون وراسله لنفسها

ان كلام مره مره جريء و الله لو ما جبت القرآن يمكن كان بيطلقني من صدمته فيني

بالله كيف ما احس بالخوف

هل كان المفروض اشيل شنطتي واروح بيت اهلي من اول يوم عرفت انه متزوجها بالسر

عقلت روحي واستهديت بالله وقعدت وصبرت ووقفت معها وشلت احساسي بالقهر من قلبي

وقلت ان شاء الله خيره انها تكون زوجته

لكن انا كنت احاول ابعدها عني لان كنت اسمع منها كلام ما كان المفروض

اسمعه منها يعني مثلا تقول اليوم تهاوشنا

وقال كل الحريم ......

لما يدخل علي زوجي ما يكون عندي مزاج اني انسى كلامها

فأكون مو رايقه

فكان المفروض اني ابعد عن نفسي التفكير واعيش بسلام

طبعا راح تقولون لي ليه عطيتيها مجال تتعرف عليك وتتقربين منها

سويت هالشي بس لظروف صحيه فيها

صحيح اني ما عرفت لها طريق

وجبتها بطريقتي وخليتها هي تتواصل معي

بس عشان كانت رافضه عمليتها وانا خليتها تقتنع بالشي

هذا وتمت العمليه والحمدلله اطمئنينا عليها

ولو ما سوتها كانت بتموت لا سمح الله ..

شيروا علي يا خواتي

وش اسوي كيف اعيش بدون خوف من بعد ما سوت هالحركه

تعبانه ...

زوجي يقول غيرانه طيب مو انا كمان اغير

بس ليه ما سوت حساب ان هالشي يغضب الله

مشت وراء هواها و كانت تبي تسوي فتنه وتخرب بيتي لو ستر الله علينا

ما في وحده ما تغار سواء الاولى وله الثانيه كلهم زوجات رجل واحد

بالنسبه للعدل

خلاص ما عاد بيدي هو ما يقصر عليها بشي الا المبات يقول ما اقدر ولا تناقشين

بس اكيد المصروف يفرق لان كل العزايم عندي وانا عندي عيال

وهي الله ما رزقها لان شالوا لها الرحم بالعمليه ..

فصار مصروفها اقل على حسب احتياج كل بيت

انتظر ارائكم

يعني هو يغلط وانتي تراضينه..

مااقول الا ربي يعينك

حظ زوجها وولدها

ما ادري وش اقول لك يا اختي

بس حسيت انك تعبانه من فراقه وهجره لك

وهذا ظلم لانك ما اخطأتي

عموما السلام لوجه الله

وهي اذا ما تبي على راحتها لا تسلمين

اما زوجك يا اختي يمكن هو بفترة نقل البيت عشان كذا مشغول

بالترتيبات وغيره وتعرفين نقل البيت يبي له تجهيزات كثيره

بالنسبه لزوجته الاولى

انا بقول لك شي يا حبيبتي على اني زوجه اولى

صدقيني يا اختي تراا زواجك منه

صار له مردود جميل على علاقتهم الزوجيه على حسب ما مريت فيه من هالتجربه

ان العلاقه لا اراديا بأغلب حياة المعددين تتجدد بالنسبه للاوليات وانا دايما والله لما اذكرها بيني وبين نفسي

اقول انها خيره بحياتي وعسى الله اكون بخيره بحياتها

وش اقول لك بس ما ادري اخاف اتكلم وتزعلون

بس انتي قلتيها ان زوجته صارت تتدلع او تتفنن عشان تجذبه

يا اختي هالشي مو عيب الا من حقها ومن حقه بعد يستمتع بتغيرها

لكن عشان الفت انتباهك لنقطه معينه

انتي كمان المفروض تجددين حياتك معه

يعني تغيرين طبيعة كلامك معه اسلوبك استايلك طبخك كل شي

كأنك زوجه جديده ولا تقولين له انت ندمت خلاص انتو تزوجتوا وصار الي صار كل الي عليك تحافظين على حياتك الزوجيه وبيتك

ولا تجيبين سيرتها ابدا ابدا

صدقيني هالشي انا ريحني قبل ما يريحه

ان هو فتح الموضوع وله قال اسمها

ابتسمي واسمعيه لكن لا يجرك بالكلام وتطلعين ما بقلبك ان كنتي شايله عليها من حركتها بالنسبه للسلام وغيره

مثل ما قلتي هو قادر يلعب على الحبلين فأنتي خليك مستمعه بس

وحاولي تصرفين موضوع زوجته وبناته بليلتك

نفس ما قالوا الكثيرات من زوجات المتعددين

استمتعي بليلتك وخليك هاديه

لكن مشكلتك ما افضل انك انتي تباشرين تتصلين فيه

عطيه مجال وبالنهايه يعني وين بيروح اكيد انتي على ذمته

ما راده الا بيرجع بيجيك ليله هنا وليله هناك

اشغلي نفسك حاليا واستغفري الله

والله يرده لك ردا جميلا ان شاء الله

بس بالنسبه لراتبك والله حرام انك انتي تصرفين على نفسك وما يعطيك مصروف

اما حركته على اكل البسكوت عشان انه ما يصرف بالبيت والله قويه

انصحك بعد ما يرجع تناقشينه بهدوء

وابتدي بكلامك بكلمات حب وغزل وبعدها ابتدي قولي له الي تبين بطريقه حلوه

وذكريه بالله عسى الله يهديه ان شاء الله تراا الرجال يفقد نص عقله بعد التعدد ههههه من الضغط

زوجي كان ما ينسى صار نساي درجه اولى

حتى ارقام مهمه مثل بطاقته او رقم الشنطه الي كل يوم كان يفتحه ما عاد يتذكره هههههه

ترااا هم كمان حالهم ما يسر ههههه بس ان شاء الله الامور تتعدل ضغط ببيتين يراضي هذي وله يراضي هذي وله عمله وله عياله وله ربعه وطبعااااااااااا صلة رحمه وش يسوي المسكين

اما زوجك المفروض خلاص
صار الي صار وش ينفع الندم الآن المفروض يكون قد المسؤوليه

و يرحم حالك ويسوي الي يقدر عليه عشان ما تحسين بالظلم