♥ஐ☼ {{{ تجــــمع جــــديـــــد لــبنــوتــات جـــــــده غـــ☼ـــير }}} ☼ஐ♥

يا بنا من تعرفلي محل في جدة يسوي لي شريط زفتي؟

هذا رقم صالون سهير -6756778-6757716

للرفع

للرفع

السلام عليكم ورحمة الله وبركاته ..

صباح الخير يا بنات يا حلوين :) ..
وسلام إسبشل لبنات جدة ..

أول شي أنا زعلانة إنو الموضوع أنفتح من ورايا و أنا
ماني موجودة وما قدرت أشارك في الموضوع الأول
ولسة ما لحقت أقراه كامل ..
بس إن شاء الله حأكون معاكم ونتشارك في هادا الموضوع ..
لأنو أنا برضو محتاجة أعرف أشياء كتيررررررررررر ..
ومستعدة أخدم بكل إللي أعرفه إن شاء الله ..
من منطلق : أحب لأخيك ما تحب لنفسك ..

وقبل كل شي تحية لبنت أمها و أبوها وشكرا عالموضوع :) ..

نبدأ بسم الله ..
توكلنا على الله ..
************************************
فتاة الأزهار .. الصناديق الخشب مليانة في
محمود سعيد إللي فيه الكنب ودي الأشياء
وكمان في البلد في الهنداوية برضو مليان ..
والأشكال حلوة .. وغالبا نفس الأحجام ..
؟؟؟؟
بس أنا كمان أبغا صناديق بس شوية أكبر
من الحجم حق السوق وتكون قوية وصلبة
فين ممكن ألاقيها ؟؟
************************************
أم أتوري .. زهور الريف في مركز التحلية الجديد
إللي لونه بمبة .. و أجمل في سيتي بلازا الجديد
الكبير إللي في الأمير سلطان ..
*************************************
ريفال .. البلايز الحلوة حقت الغسيل واللبس والإستهلاك
في سيتي بلازا .. وإذا حظك حلو حتلاقي أشكال و ألوان
و موديلات حسب الموسم ..

وبالنسبة لدكاترة النساء .. سمعت عن فاطمة العتيبي كتير ..
ويقولو في دكتورة ممتازة في عرفان .. وكمان في بخش بس هي
دحين مسافرة ولدت عندها أختي وتقول طيبة ..
وكمان سمعت عن سامية العمودي يقولو ممتازة وأخلاق ..
وكمان فيه في التخصصي كذا وحدة .. وفي غسان فرعون كمان ..
بس عشان الحق كلهم عالسمع أنا شخصيا ما جربتهم ..
جربت أسماء شحرور عشان مشكلة هرمونات وأنقرفت في الإنتظار ..
وكمان ما تبغا مرافق يدخل معاكي وقت الكشف ..
وأدتني دواء وقالت لي خديه شهرين وبعدين تعاليلي !!!!!!
وأخدته يومين وبطلته لأني تعبت منه!!!!!!!!!!
ودكتورة شيقان زي ماقالت بنت أمها وأبوها
أظن باكستانية وبرضو طيبة .. أعرف وحدة كانت تراجع عندها
ومدحتها .. بس أستغفر الله المستشفى الألماني مواعيدهم مدري كيف ..
وأنا أتعقدت منهم ومن إنتظارهم .. بس في برضو عندهم كذا دكتورة ..
وبرضو أسألي وشوفي إللي يريحك ..
وبالذات في المستشفيات سبحان الله الراحة النفسية
وإنشراح القلب مرة مهمين .. الله يعينك وتلاقي دكتورة بنت حلال ..
ولمن تلاقي قوليلي :) ..
************************************
أم ملوكة أنا و إنتي في الهوا سوا ..
أبغا أماكن مفروشات وتأثيث بيت كامل ..
وتكون شي حلو وفخم ومرتب و نقدر نشتريها
وما نشحت من بعدها :55: ؟؟؟؟
لأنو بصراحة الأسعار نااااااااااااااااار ..
بالذات غرف النوم والصوالين .. غـــالــيــــــــة ..
************************************
با بنت أمها وأبوها جيتي عالجرح ..
أنا كنت ما أقص غير عند بشرى في كارمن إللي في
التحلية .. و ماشاء الله تبارك الله يدها كانت طيبة
وبدأ شعري يطول نوعا ما بعد ما كان أستغفر الله
منحوس ومو راضي يطول .. وقصيت عندها و أرتحت كتير ..
ودحين يقولو راحت وما رجعت ..
؟؟؟؟
مين في هناك غيرها وبنفس مواصفاتها ؟؟
لأنو بصراحة من يوم سافرت أنا ما حطيت رجلي
عندهم .. لأني كنت أروح عشان هي تقص لي و تسشور لي
وتسوي لي تسريحات ..
وقبل كم شهر قصيت عند صالون الله يقرفهم
وشعري رجع أتنحس تاني وماهو راضي يطول ولا ملم
وسار خفيف ومعدوم ..
؟؟؟؟
أبغا وحدة زي بشرى يدها خفيفة وفيها بركة ؟؟؟؟
************************************
حمودتي .. و ريفال .. وأسرار 81 ..
تبغو دكاترة جلدية ممتازين ..
وعلاج 100% بـإذن الله ؟؟؟؟؟؟؟
مالكم إلا أوباجي .. بس بصراحة غالييييييين
نااااااااااااار .. بس والله بعد النتايج حتدعولي ..
بس لا تدعو عليا عشان الفلوس :) ..
بس هادي من تجربة شخصية والله العظيم ..
************************************
أم نونة .. إنتي قصدك على سبوزا بيلا ؟؟
إللي هو العروسة الجميلة إللي جنب المدى ؟؟
عندهم فساتين تجننننننننننننن .. كلها موديلات
أوروبية فخمة وأنيقة وبسيطة وشي جنان ..
بس يالهووووووييييي الأسعار نااااااااااارررررر ..
كل ما تسألي عن فستان لازم تسمعي ؟؟؟؟عشر ألف !!!!
ونادرا إذا لقيتي تحت العشرة آلاف .. سواء عرايس
أو سهرات .. بس في الخياطة ما أدري والله ماجربتهم ..
روحي وأتفرجي عالكاتالوجات وأستفسري ..
و شوفي بنفسك ..
************************************
فتاة الأزهار .. إنتي تسألي عن دار الحافظات
حقت تحفيظ القرآن إللي في السلامة مدري في صاري؟؟
كويسة وأسمعهم يمدحوها كتير ..
وإذا تبغي تحفيظ قرآن روحي التحفيظ إللي في مسجد الشعيبي
في السلامة ..
************************************
بنت شيك .. بالنسبة لمنة سنتر أنا ما أنصحك بيه ..
لأنو شفت عروستين قماري طلعو من عندهم معوقين ..
والله البنات زي القمر حلوين ماشاء الله .. والله طلعوهم منة سنتر
زي القرف .. لا مكياج ولا شعر ..
أنا ما أدري على أيش السمعة دي ؟؟
فيه ناس يحبوه عشان يقولو مكياجهم خفيف ..
بس أنا والله ماعجبني أبدا أبدا أبدا ولا يمكن يجي يوم وأنطس في
دماغي و أروحلهم أبـــــــــدا ..
و لاتقولو إني بأقطع رزقهم .. روحو وشوفو وأحكمو ..
بس والله أنا شوفت بعيني 3 عرايس راحولهم وكلهم أخس من بعض ..
بس كانت فيهم وحدة مقبولة نوعا ما (نوعا ما) مو مقبولة كتير ..
أما التانيين أستغفر الله ..
وبرضو الناس أذواق .. وإللي تبغا تروح تشوف وتحكم ..
************************************
وبالنسبة للشيخة شغلهم حلو .. وشغل أميرة وأروى جنان ..
بس مواعيدهم زفت .. وتنسيقهم زفت .. وبعض الأحيان تسير الأخلاق سياحية .. وزحمة ماشاء الله .. وغلبة .. والمحل صغير .. وكله بيبان مقفلة ..
تحسي إنك ماشية في بيت جحا .. بس صراحة شغلهم حلو
وأنا جربت أميرة وأروى .. بس قــلــق .. والتنسيق و المواعيد BAD ..
وبرضو روحو وشوفو قبل ما تحكمو ..
************************************
وبالنسبة لريما كتبت عنهم فيلم هندي في رد من ردودي في موضوع
قديم دورو له .. أنا مأقول إنو شغلهم مو حلو .. بالعكس شغلهم حلو
وبالذات كذا وحدة عندهم .. بس المواعيد والأخلاق BAD BAD BAD ..
************************************
كوكو شانيل 5 .. أعرفلك وحدة مصرية تسوي محاشي وورق عنب وزي كدة ..
تنفع ؟؟
والله ما بأسوي دعاية ولا أعرف الحرمة بس دقت أكلها عند وحدة و تمدحها ..
بس أبغا الدعوة الصالحة لأني والله محتاجتها ..
رديلي ..
************************************
مريام .. بالنسبة لمحلات مفروشات الأطفال .. فيه محل في شارع صاري
جنب كمبيومي .. عنده سراير ملونة وحاجت غريبة .. تنفع للصغار ..
وفيه أظن لو إني ما خرفت :23: فيه محل قريب من مفروشات العمر برضو
عنده أشياء أطفال زي كدة بس ماني متأكدة بس كني شفته قبل كم يوم ..
وروحي شوفي إيكيا برضو حلو وفيه أفكار حلوة ..
وقبل فترة شوفت في سيتي بلازا كم شي حلو بس إذا إنتي ما ناسبك شوفي غيره ..
************************************
قرنفلة .. تبغي مدرسة أهلية ممتازة وتأسيسهم يعتمد عالدين واللغة والنشاطات وصراحة مدرسة راقية وتعليمهم ممتاز .. مالك إلا الأندلس .. لأننا مجربينها بنات وأولاد في عيلتنا .. وبالذات البنات محافظين جدا ومديرتهم الله يقويها .. ماهم زي باقي المدارس الأهلية ماعندهم فلتان .. وروحي وشوفي المستوى ..
************************************

وإللي عندها سؤال تسأل وأنا مستعدة أخدمها قد ما أقدر ..
وكمان أنا عندي أسألة كتيرة بس حبة حبة :) ..
كلو جاي في الطريق :) ..

تحياتي ..
جــــــداويـــــــــــــة

يا أخواتي يا حبيباتي الله يسعدكم لا تكتبو ( إنشاءالله )
عشان لا تاخدو ذنوب لأنها غلط .. والصح ( إن شاء الله )