عآآآجل.. بنتي أصابها إمساك بعد تعليمها الحمام.. ما الحل؟!

السلام عليكم ورحمة الله وبركاته..
أخواتي.. بنتي عمرها سنتين وثلاث شهور.. من أسبوعين تقريباً بدأت أعلمها عالحمام.. والمشكلة أنها هالأسبوع صارت تمسك نفسها عن البراز الله يكرمكم!!.. ما أدري هو خوف أو ما أدري ليه!! وجاها إمساك ونزل معها دم بسيط مرة وحدة.. وبصراحة تضيق الصدر لما تتوجع وتتألم.. فياليت بحل يصلح لحالتها..
مع العلم أني أعطيها برتقال وعصير وحلويات أبغاها تسوي شيء في الحمام إلا أنها ترفض.. يا أنها تسويه على ملابسها أو على كلوت تعليم الحمام..

الله يسعدكم ويخلي لكم أحبابكم،،،

5 تعليق 10,241 مشاهدة

شاركي في النقاش

سجلي الدخول لإضافة تعليق.

التعليقات

5
  1. @am_nany_4

    عاادي اختي اكيد هي خايفه لانه شي جديد عليها وحده من قريباتي ولدها زي بنتك كذا مع انه اكبر من بنتك عمره 3سنوات صار اذا لبسته الحفاظ فالليل يسويها على طول الله يكرمك وبعدين صارت تخليه بالحمام لحاله وتقوله اذا خلصت نادني والحمدلله مشت اموره كذا مع انه تجيه حالات مايسويها الا بالحفاظ واعذريني اذا طولت عليك
  2. @ampagml_hoaaaamp

    انا عندي نفس الحاله بنتي عمرها سنتين وسبع شهور وعلمتها على الحمام من عمرها سنه وثمان شهور بس ماادري ايش صار لها بعد سنتين وثلاث شهور تقريبا صارت تبكي وماتبغى تخرج في الحمام الله يكرمكم وبعد هالحال رجعنا للبامبرز فقط وقت البراز
    وصارت تتعصر وتبكي وخايفه ..وديتها للدكتور قال معها شرخ ياعمري عليها واعطاني علاج بس مانفع وهي كان معها امساك من يوم عمرها ست شهور واحنا بالعصيرات وزيت الزيتون والملينات وكل شي استخدمته رغم انها الآن ماتعاني من الإمساك لكن الأكل قليل مادري اش اسوي ياليت احد يفيدنا ....والله اني تعبت الله ياجرنا
  3. انا نفس حالت بنتك ياأجمل حواء تدري انو بنتي توها داخلة 5سنة وتمسك برازها الله يكرمك من عمرها 2 ونص رحمتها وديتها خاص خسارة من دون مايعرفون وش عندها مرة يقول شرخ ومرة التهااب مع انو سوينا كل التحاليل وطلعت سليمة ومدري وشفيها ساعات ادخل عليها القيها في الحماام تلف رجولها وتمسك ولما اشيلها واشيل سروالها واحطها على الكرسي وتقول لا ياماما والله ترحمينها تحزن ابكي عليه من هالحالة مع انو ماعندها امسااك مدري وش اللي عندها يناس لي على هالحال3سنة وش اسوي صرت ما اطلع من البيت الا لما تتبرز علشان ماتحصل مشاكل بعدين واالله تعبت اي احد يلاقي حل يقولنا
    والله يعينا ويعينك يا ام مارية ويشفي عيالنا يارب
  4. @rynas_1

    يابنات الغذا له دوور امنعو عنهم الخبز الابيض استبدلوه بالاسمر خليها تفك رقيها بعسل سوي لها مغلي نعنااع وحطي معه يانسون حليبها اللي تشربه حطي معه ملعقه زيت زيتون عطيهم كيوي كل يوم وكماان التين اذا ماتحبه اخلطيه مع اي عصير
  5. @am_mary_2

    صاحبة الموضوع
    الله يجزاكم الجنة، المعذرة كتبت مشكلتي وخرب الجهاز ثم تعطل النت.. والآن زين..
    الحمد لله حالها تحسن شوي وصرت أعطيها كيوي وأخليها تسوي على ملابسها بكيفها لحد ما حسيت أن إمساكها خف وراح شوي من الخوف بعدين صرت أشجعها على الحمام بالحلويات اللي تحبها حطيتها في علبة زينة وأخليها تختار..

    وبالنسبة للأخوات اللي في بناتهم شرخ أو بداية بواسير لا تهملونهم أبد.. خلوهم يستانسون بطفولتهم وعالجوهم..
    الله يشفي الجميع،،،

تابعي تجارب أخرى من هذا القسم.