تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15

حبيبتى انتى ممكن من اليوم العشرين تاخدى الابر اللى تحت الجلد وتيجى مصر تانى او تالت يوم الدورة
تعملى تحليل e2 وتروحى المركز علشان تبتدى ابر التنشيط ... من التوقيت ده لحد الارجاع بتستغرقى حوالى 15 يوم يعنى مش شهر ولا حاجة
بس لو عاوزة نصيحتى بلاش المركز المصرى علشان زحااام ومعدش زى الاول ... انصحك روحى مركز آدم

السلام عليكم و رحمة الله و بركاته.....

والله ما عارفة أقول إيه و لا أعيد إيه......
إيه اللى بيحصل من الصبح ده......
ينفع كده يا بنات...
تجمع مفتوح للحب فى الله و التعاون و التخفيف على مكروب سواء بكلمة طيبة او بمعلومة مفيدة يتقلب كده و كأنه معسكرات......
أنا بجد آسفة جدا إنى وصلت لليوم ا للى شفت فيه الأوضاع ديه...غضب و تسرع و تفرقة و كلام مش تمام!!!!!!!!!

أولا...انا عمالة أقاوم من بدري و اقول خلى لسانى جوه بقى...بس مش قادرة......
نيفين....أنتى عارفة غلاوتك عندي...لكن لو هأقولك حاجة فى الموقف ده مش هأزود عن اللى قالته هيا ننشر الخير....وهى اسم على مسمى فعلا....

ثانيا....وده الأهم....انا فيه كام كلمة محشورين فى زوري و استحملونى فيهم ....والكلام بأوجهه لنفسى قبل ما أوجهه لحد تانى....
بس الأول بأشكر بوبا على كلامها المتزن الراقى اللى قالته فى الأول.....وبأؤيدها فى كل كلمة نطقت بيها.....هدف الملف ده و هدف كل كلمة اتكتبت فيه هو المنفعة لوجه الله و الحب فى الله.....واللى يحيد عن هذا الهدف يبقى هو الغريب سواء كان قديم أو جديد (ويا ريت بقى ننسى الكلمتين دول و نلغيهم من قاموسنا خالص....)...وكمان حاجة....محدش هنا له فضل على حد.....ولا حد هنا أهم من التانى....وولا كمان حد هنا مستنى نتيجة اي حاجة بيعملها من الناس....

واستحملونى فى كلامى ده......
نفسى يا بنات يبقى شعارنا فى الملف هنا (حب لأخيك ما تحب لنفسك).....فى كل شئ من أبسط حاجة لاكبر و أهم شئ.....من الأمانى الطيبة بخصوص العلاج و نتائجه...لحد المعاملة و السلام البسيط اللى بنرميه على بعض كل يوم.....
يعنى لو كل واحد بطل يعمل الحاجة اللى هو مبيحبش الناس تعملها معاه....محدش هيزعل حد و لا حد هيدوس لحد على طرف....
لو مبحبش حد يتجاهلنى يبقى ماتجاهلش حد....
ولو باحب الناس تحترمنى وتراعى مشاعري يبقى أحترم الكل و اراعى مشاعر الكل....
ولو ماحبش حد يلقح عليا بكلمة...يبقى أخلى كلامى واضح و مالقحش على حد بالكلام.....
وزي ما ماحبش حد يظلمنى...ماظلمش حد....

نفسى كل واحد فينا لو حس بحيرة من تصرف حد تانى ....يسأله ليه اتصرف التصرف ده.....
ولو حد شك فى حاجة..يستفسر عنها بكل وضوح.....
ولو حد قرر يزعل من حد....على الأقل يواجهه بأسباب الزعل ده من الأول......
ساعتها هنتفادي غموض كتير و زعل كتير و نتفادي إننا نشيل النفوس من بعضها......

وأهم شئ...نفسى زي ما الكل بيدخل و يقول انه بيحب التجمع ده و متعلق بيه......يبقى كمان نحترمه و كأنه تجمع حقيقى قدامنا.....وكأن الناس الموجودين ورا الشاشات دول قاعدين قدامنا و شايفينهم.....ساعتها كل واحد هيعمل حساب لكل كلمة بتطلع منه ......وهيراعى كويس إنه ميجرحش فى غيره......

سامحونى لانى طولت عليكم........بس بجد انا تعبت كتير علشان أرغم نفسى أقول الكلمتين دول....لانى بجد من فترة عندي حالة قرف من اللى بيحصل بين الناس و من اللى الناس بتعمله فى بعض....وآجى دلوقتى ألاقى الكلام ده بيحصل هنا.......
الدنيا مش مستاهلة يا جماعة.............وربنا يرحمنا و يهدينا جميعا......

اولا مبروك التجمع الجديد وان شاء الله يكون الجزء ده افضل من الجزء السابق
ثانيا : نوفى حبيبة قلبى انا كتبتلك مشاركة فى التجمع اللى فات واتصلت بيكى فى البيت رد عليا عبد الله وقال انك نايمة ... نوم العوافى ....
عاوزة اقولك ان البنات فى الملف بدون استثناء بيحبوكى جداجدا جدا وميتصوروش انك تزعلى من حد منهم
انا فكرت فى كلامك وعرفت ايه اللى زعلك غير حكاية السى فى ...ووصلت للسبب تقريبا
معلش انا عارفة انك زى الجبل وعاوزة اقولك ... ياما دقت على الراس طبول ... وعارفة كمان ان مخك كبير قوى
لكنك حساسة ومشاعرك رقيقة ...
بطلب من البنات ان من هنا ورايح مش حيتفتح ملف جديد من غير نوفى ما تقول مين البنوته اللى تفتحه
معلش محدش يزعل منى ... لكن دى اقل حاجة نقدمها لنفين على مجهودها اللى عملته فى الملف وخلتهخ متميز