تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15

بسم الله ماشاء الله ولا حول ولا قوة الا بالله
ربنا يباركلك فيهم يالالا ويجعلهم ذرية صالحة
زيحفظهم لك ولابوهم من كل شر
وحمدا لله على سلامتك ودى اهم حاجة وان شاء الله بنوتاتك الحلوين يبقوا فى حضنك قريب هم كمان

بوبا الحمل خارج الرحم بيعمل ألم فظيع متقدريش تستحملي فأرجوكي متحطيش في دماغك الكلام دا ان شاء الله يكون حملك سليم و يكمل على خير وبلاش هسهسه

ساره ايه المفاجأت الجامده دي احنا عاذرينك ياحبيبتي ولا يهمك
ربنا يباركلك في البيبيهات و يحفظهملك و يكونوا قره عين لكي ولزوجك

يارب يانيفو يارب

انا ان شاء الله هروح للدكتور بتاعى انهاردة وهشوفه هيقولى ايه
ماشاء الله عليها كوكر والله انا حاسة كانها عينى اللى بشوف بيها هنا وعقلى اللى بفكر فيه
الغربة وحشة قوى يابنات ولما بيكون فى صاحب مخلص معاكى هو اللى بيهون المرارة دى شوية

كوكر كلمتنى وقالتلى اتصل على الدكتور وانا كلمته وهروح له بالليل

والله يانيفو انا عارفة انه بقى سيناريو رخم ان كل ماحد يحمل يبقى قلقان وهسهس ويروش الناس معاه
انا برضه كنت بواسى كل واحدة كانت بتقلق وبقولهم انتو عيال نكدية مابتعرفوش تفرحوا بس والله طلع الموضوع اصعب من انتظار الحمل نفسه
اهو الواحد بيبقى زى العطشان بس كده كده عارف ان مفيش فى ايده المياه دلوقتى
وفجاة بيحس انه قدامه كوباية ميه بس الكوباية هشة قوى لو حاول يمسكها ممكن لاقدر الله تتكسر
ومايحصلش ولا حتى نقطة ميه عشان كده بيبقى خايف جدا ومرعوب لحسن يفقد الحلم اللى عاش طول عمره يحلم بيه

والله العظيم انا عندى كلام كتير قوى عاوزة اقولهالكو كلكم ونفسى ربنا يكرمكم كلنا وزى ماقولت لنيفين نفسى نتقابل كلنا واحنا حوامل ان شاء الله وان شاء الله هيحصل لان مفيش حاجة بعيدة على ربنا

على فكرة بعد فضل الله وكرمه كوكر هى اللى اديتنى الدافعة بتاعة الرياضة دى
انتو فاكرين اخر فترة كانت نفسيتى تحت الصفر وكنت متضايقة جدا ودخلت قولتلكم
لقيت كوكر اتصلت عليا بالتليفون واديتنى دش ميه بارد فوقتنى لنفسى ووانا بكلمها قررت اروح للدكتور واروح الجيم وابدا رجيم عشان اساعد نفسى وسبحان الله كان كلامها على طول بيرن فى ودنى وانا بلعب عشان اتشجع
ربنا مايحرمنى منها
انا بقول لكم كده عشان تعرفوا احنا قد ايه ممكن نبقى عون لبعض ونساعد بعض

على فكرة قبل ما انسى انا عاجبنى موضوع الرياضة ده قوى
وهنزل لكم ان شاء الله الرجيمات اللى انا عملتها خلال الشهر
بس اللى اهم فعلا من الرجيم كان مشروب كده الدكتور واصفهولى عشان يساعد على حرق الدهون وبعد فضل الله يمكن ده يكون سلك البلاوى اللى كانت جوايا وانا مش عارفة

كنت بحط 3 كوبايات ميه كبيرة وعليهم معلقتين من ( الجنزبيل _ القرفة - نعناع- شاى اخضر - كمون - بردقوش - شمر ) وبحط عليهم لمونة مقطعة 4 ارباع واغليهم لمده 10دقايق وبعدين اصفيهم واشرب كل يوم كباية قبل كل وجبة من غير سكر ولا شى هى طعمها مش وحش قوى بس فعلا كنت بحس انها بتحرق دهون كتير وبتشد الجسم فى نفس الوقت وسبحان الله يمكن يكون فيها عناصر منشطة للمبايض احسن من الكلوميد

حاولوا تجربوها مش هتخسروا شئ
وهقول لكم على سر كمان بس اوعو تقولو لحد
انا طبعا مكنتش بلعب رياضة كل يوم انا كنت بروح يوم ويوم ساعتين بس والايام اللى مكنتش بروح فيها كنت بعمل فى البيت حاجة احسن من الرياضة وبتخسس اسرع وتظبط الجسم احلى ومش مجهود قوى عارفين ايه

كنت برقص
اه والله زى الهبلة كده لما جوزى ينزل اشغل الكاسيت واحط اى حاجة ظاقة اعرف ارقص عليها واديها رقص بلا توقف لمدة 20 دقيقة او نص ساعة كنت بجيب ميه من جسمى كله واهو مود حلو ورياضة وحاجة تساعدنا نبقى عندنا مهنة تانية
هههههههههه
بجد والله انا نفسى افتكر اكلت ايه وشربت ايه سبحان الله يوضع سره فى اضعف خلقه يمكن كلمة تطلع منى وبدون قصد تكون سبب بعد فضل الله فى حمل واحدة حتى من المنتدى

والله العظيم والله العظيم انا عمرى مابنساكم فى الدعاء ابدا بصراحة انا بدعى لنفسى وبعدين ادعيلكم وبعدين ادعى لاخواتى البنات ان ربنا يكرمهم بازواج صالحين وذرية صالحة ان شاء الله

مش عارفه يا كوكر ردك علي دوعه عجبني اكتر
انا هسال جوزي فعلا اذا ممكن يتصرف وينزل مصر يومين صد رد كده بدل بهدلة سفري انا في بلد مخيفه
ويكون الكيس راح ان شاء الله وعرفت اعمل تنشيط من غير قلق
يارب ينفع

بس ماما 1983 قاليتلي علي فكرة تجميد الحيوانات المنويه ولما قلت لجوزي استغرب كده ومحستهوش مقتنع
وباين كده 80% انه مش هيرضي

ايه رائيك في الفكره؟؟؟
عايزة اعرف حاجه كمان هو تطعيمات ضد الكوليرا والتيفويد والحمي الشوكيه ليها تاثير ضار علي التبويض او الحيوانات المنويه؟؟؟

اللي يعرف يتوصل علي معلومات عن كده ياريت يلحقني بيهااااااا

الله اكبر الله اكبر
ما شاء الله
لا قوة الا بالله
الف الف مليوننن مبروووك يا ساره
ربنا يباركلك فيهم ويجعلهم ربنا ليكي الذرية الصالحه

وعلي فكرة اساميهم جميله ما شاء الله