ابغى تخطيط مايخرش الميه

قريت الردود ونفسي أعرف شيء واحد يا أم سطام وهو وشو اللي تبينه وانتي ترفعين الموضوع وكان ردود البنات العقلانيه مو عاجبتك؟!

بالمناسبه ماتوقعت فيه وحده يوصل الإستسلام عندها لتصرفات زوجها نفس الي وصلتي له ولما قريت مشاركاتك تفاجأت بان فارق العمر بينك وبين زوجك19 سنه!!

دافنه حياتك وكرامتك مع واحد كبر ابوك وياليته يستاهل والا أهله يا الله لك الحمد والشكر!!

أعرفي قيمة نفسك خاصة انك متعلمه تعليم عالي يعني مو انسانه بسيطه وكمان عمرك لسه صغير الي بعمرك لسه ماتزوجوا وانتي خايفه من مدري وشو!

ياقلبي ما ابي اكون قاسيه عليك لكن واضح انك مسلمه بهالحياه وكرامتك في اخر ركب أهتماماتك،صدقيني أنتي بحاجة جلسه صادقه مع النفس تعيدين فيها حسابات نفسك ولاتصدقين الي يقولون ان المرأه بدون رجال ماتسوى لان واضح ان هذا تفكيرك وانتي رافضه تطلعين من الجحيم الي انتي فيه.

البنات الي يرفضون يطلعون من بيت ازواجهم تلاقين ان ازواجهم فيهم خصال عدله او ممكن من داخله يحبها لكن واضح ان زوجك دمار ومافيه شيء عدل ويكرهك والا فيه واحد يحارق زوجته بالخادمه؟!

صدقيني كرامة الرجل من كرامة زوجته وشخص وصل مستواه للخادمه والتحرش فيها قدام عينك وش ترجين من وراه؟!

يختي والله دافنه عمرك وقاهره نفسك على الفاضي وعيالك حتى لو تطلقتي ماراح يضيعون،الحسره عليك بكره لما يكبرون ومايحط ربي فيهم بركه حسرتك لحظتها بتصير حسرتين.

ولاتقولين زوجك مايعرف منو الغلطان!

معقوله انتي؟!

هو يعرف عدل لكن فيه نوعية ناس لما تلاقي الضعيف تتسلط عليه وتستعبده وتفرغ فيها عقده وزوجك من النوع ذا وهو يدور اي شيء علشان يستمر في أهانتك.

اما تهديده لك بالطلاق علشان الشغاله فو الله ابرك الساعات لافتكيتي من هالانسان الي لا حافظ لك كرامه ولا قدر ومو شايفك شيء.

جد انتي وصلتي نفسك لهالمستوى والمؤمن القوي خير عند الله واحب من المؤمن الضعيف،وبيت ماتقدرين حتى تسكرين فيه دورة المياه على نفسك افضل لك تركه.

خايفه تطلقين والله ماتدرين وين الخيره وممكن الله يرزقك بشخص يحترمك ويحترم اهلك ويعوضك ربي خير بدال هالي مو شايفك نهائي.

يمكن محد علمك،ويمكن عشتي في عائله تقدس الرجل حتى لو هو غلط،وممكن خايفه من شماتة الأعداء،وممكن تفكرين في عيالك وممكن وممكن وممكن لكن اخذيها من أخت مانصحتك الا مهتمه فيك في يوم يجي وتنضجين وراح تكرهين نفسك لانك ارضيتي كل هالعالم الا نفسك.

حنا في زمن القوي الي مايترك حقه،اتركيه والله مايستاهل ظفرك ولو واحد ثاني وعنده وحده مثلك كان احترمها وما اهانها.

خليه تجيه خبيثه مثله تربيه وتربي امه واهله الي وراه،اما انتي فطيبه ويعوضك ربي بالي اخير منه.

اتمنى فقط تحلين قيدك بيدك واذا حابه تتواصلين معي فارسلي لي ايميلك على الخاص فما يحزني الا انك مو عارفه قيمة نفسك وعاطيه قيمه لناس وربي ماتسوى.

حسبي الله على كل شخص مايحافظ على بنات المسلمين.

اذا قريتي حديث فالله يقول من فوق سبع سموات...( الزاني لا ينكح إلا زانية أو مشركة والزانية لا ينكحها إلا زان أو مشرك وحرم ذلك على المؤمنين ).

ممكن الي يفرق بين شخصين اسوياء لكن ذا زاني ومجاهر بالمعصيه ووقح لأبعد الحدود ويخاف على النشأ انهم يتربون عند شخحص مثله يتحرش بالخادمه يعني كيف يطلعون أسوياء وابوهم قدوتهم انحرافه وصل للحد ذا؟!

بعدين كل أمتي معافى الا المجاهرون وهذا يجاهر امام حتى أطفاله ولايردعه لادين ولا حياء.

حراااااااااام الي يصير وشخص فوق الاربعين بالله متى ينضج يعني لاطاح عن حيله؟!

واذا شاكه دقي على شيخ وقولي له هالبلاوي الي يسويها صدقيني بيقولك تطلقي منه لان الي يسويه مايرضي الله ولا اي شخص عنده ذرة خوف من الله.

بعدين اطفالك أمانه عندك ولو كنتي في دوله كافره حتى الدين ماتعرفه صدقيني عيالك بياخذونهم ويعطونهم عائله قادره تربيهم ببيئه مستقره لان ابوهم مو كفؤ للتربيه وامهم مو قادره توفر لهم بيئه أمنه.

من جد الله يكون في عون هالأبرياء.

حمدالله والشكر ليش تسكتين؟؟؟؟؟ تواصلي مع الأخت:هيفاء خالد . في موقع /الجمعية الألكترونية للطلاق السعودي
بتعطيك حلول تناسبك لكن لازم تكونين قوية سكوتك هذا ماني فاهمته؟؟

جزاكن الله خير انا متمسكة في بيتي وماابغى اطلع منه لان عندي بنات واخاف عليهن وابوهن مادري عنهن وحنا في زمن كثرت فيه الفتن على فكرة كانن على طول ماني بعيدة عنهن وهن يبكن ولا احد داري عنهن كاسرات بخاطري وخايفة عليهن وانا عارفة اني مظلومة اكيد ربي بينصرني والا مالاقي طريقة لحل مشاكلي وآخر العلاج الكي بس ابغى طرق من طرق كيد الحريم وان شاء الله القى من يساعدني منكن اما من ناحية زوجي والخادمة فلا يروح تفكيركن لبعيد هو اساسا بس يبغى يقهرني والا هو مابينظر لها ولا بينزل نفسه لمستواها