ربنا يكرمك يا اوكسى ويبارك فيكى ياقمر ويجعل المحاولة دى وشها حلو عليكى ويكرمك بعدها بالحمل ياااارب .. المهم ياستى انا مكنتش عايزة اقول ايه الظروف اللى شغلتنى عنكم الفترة اللى فاتت لانى شايفة ان حال الملف فيه شوية سواد فا قولت بلاش اظلمها اكتر بس لما انك انتى وكوكر وباقى البنات عايزين تعرفوا هحكيلكم الحكاية وبالمرة تدينى رأيك انتى وماما فى الحالة دى وتطمنونى ...
الحكاية ان بنت اختى الصغيرة 5 سنين عندها نوع انيميا مولودة بيه وسبب الانيميا دى هو الطحال اللى بيكسر كرات الدم الحمرا اللى فى جسمها وبيخلى على طول الهيموجلوبين بتاعها مش بيزيد عن 7... ومن ساعه ما اتولدت واحنا متابعين مع دكتورة مناعه شاطرة اوى وقالت لنا انها هتبقى ضعيفة وحركتها قليله وهنضطر نعمل عمليه لما يبقى عمرها 5 سنين وهتشيل الطحال وهيكون ده معاد العمليه بس طبعا طول السنين دى واحنا كل شهر نعمل لها تحاليل نطمن على حالتها ونشوف الانيميا وصلت لفين واخر شهر عملت التحليل فيه طلع الهيموجلوبين 5 تخيلى ..
ساعتها الدكتورة قالت خلاص معادها جه ولازم نعمل لها العمليه ونشيل الطحال خصوصا انه كل سنة كان بيتضخم وبيتعبها اوى وبيعمل لها مغص شديد .. وفعلا عملت العمليه الفترة اللى فاتت بس تعبت جدا فيها وحصل لها مضاعفات كتير بعد العمليه سخونة وترجيع وبهدلة مش قادرة احكى لك عليها ولحد دلوقتى مش فكت السلك واختى نفسيتها كانت تعبانه جدا لان البنت دى جت بعد تعب طويل ومشوار علاج مع د حسام فا غاليه اوى عليهم ..
ودلوقتى هى بقت الى حد ما كويسة بس المفاجأة انها بدأت تاخد حقن بنسلين بعد العمليه كل شهر حقنة لمده سنه تقريبا لان المناعه عندها دلوقتى مهددة طبعا لان مخزون الكرات الحمرا عندها فقد بفقدان الطحال .. وهى دى الظروف اللى فعلا كانت مخليانا كلنا مع اختى ليل نهار ومكنتش عارفه ادخل اطمن عليكم
تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15
متابعة النقاش، صفحة 168