تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15

ماما حبيبتى ... ما فيش داعى ابعت ميل لدكتور عادل علشان انا لما رحتله العيادة قالى بالحرف الواحد ... منظار ... مفضلش ... لأنه مش حيضيف كتير ... حتى لو فيه نقط حيه للأندو على المبايض منصحش انها تتكوى لأن الرصيد اصلا شوية والسن مش فى الصالح ... انا بنصحك تكررى الحقن المجهرى لحد ما ربنا يكرمك
عشان كده لغيت المنظار ... وبعدين عندك بوبا ماهى حملت طبيعى وعندها اندو
تخيلى ان الدكتور عملك منظار وشوفى كل التباديل والتوافيق اللى ممكن يكتشفها او يعالجها
اندو - اورام ليفية - مشكلة فى الانابيب
اعتقد المشاكل الثلاثة دول ميمنعوش نجاح الحقن المجهرى ... ولا انتى رأيك ايه ؟

السلام عليكم
كيفكم يا اخواتي
اسفه علي عدم دخولي و تقصيري حقكم عليا
اخر الاخبار انا بدات اخد سيدوفاج 850 و تاعبني موت
اسهاااااااال و فرقعه في البطن هههههههه
زفت خالص و لله الحمد

يارب يا سومية ... لربنا معانا كلنا يا حبيبتى
الف سلامة عليكى

اهلا بيكى يا قرنفلة ... ربنا يتمملك حملك بخير يارب

ماشاء الله عليكى يا اوكسى انا معاكى فى كل حرف قولتيه
وانا عارفة انه للتذكرة فقط بس اكيد مننا اللى محتاج للتذكرة دى جل من لايسهو

شوفى انا ببقى متيقنة ان ربنا فاكرنى كل مابيبتلينى
وسبحان الله مفيش حد على وش الدنيا دى خالى من الهموم وفعلا لو خليت بليت
والله يا اوكسى انا امبارح حصل معايا بلاوى وكلها مرة واحدة لما حسيت ان فى حاجة غلط وبعدين قلت
سبحان الله محدش عارف الخير فين ولا اللى بيحصل ده بيحصل ليه بس اللى متأكده منه انه كله خير وربنا له حكمة فى كده
انا اول حاجة امبارح لقيت مشكلة كبيرة فى شغلى مش عارفة ايه سببها ولا مين وراها سبحان الله ربنا يهدى الجميع

وبعدين لقيت جوزى بيتصل عليا انه هيتنقل من مكانه فى الشغل لمكان تانى هو مش هيستريح فيه وفضلت اصبره واقول له يمكن يكون احسن محدش عارف الخير فين؟ بس جوايا متضايقة مع انها حاجات بسيطة وهتعدى

وختمت بالليل بأن عربيتنا ولعت واحنا راجعين من برة ومقدرناش نعمل حاجة نزلنا منها نجرى فى وسط الطريق وجت المطافى وكانت شغلانة وفضلنا للساعة واحدة بالليل برة فى الشارع
ورجعت البيت كنت هموت من التعب لقيت النور فاصل بقفلة لان الكهربا زادت وحرقت التلاجة والديب فريزر والسخان

مش هتتخيلى من كتر ذهولى جاتنى هستيريا وفضلت اضحك والله واقول ايه ده كله سبحان الله يعنى القرشين اللى كانوا بيتجمعوا عشان العملية هيروحوا فى 100 طريق تانى سبحان الله بيقفل باب ويفتح باب

وفضلت اعيط واضحك زى الهبلة وجوزى واقف مذهول وفى الاخر لقيته بيقولى تعالى نصلى ركعتين شكر لله اننا ما حصللناش حاجة فى موضوع السيارة ولا الشقة ولعت بماس كهربائى لاقدر الله

شوفى بقى لما ربنا يثبتلك انه فاكرك وبيبتليكى وفى نفس الوقت تدركى انه برضه الحمد لله اننا لسة عايشين
والله صدق اللى قال اهم حاجة فى الدنيا الصحة والستر
ربنا يسترها عليكو وعلينا