تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15

الحمد لله يا بوبا ربنا يكمل الايام الجاية على خير ويبعد عنى شبح القلق والتوتر يارب
على فكرة عشبة القمح من الاسباب اللى بتهدى الاعصاب وتبعد عنك الكآبة والملل
ياريت يا بوبا تزرعيها عندك وتاكليها حلوه جدا علشان البيبى وعشانك كمان
ممكن تحطى شوالى الزرع فى مكان فيه تكييف عادى بس المهم يكون فيه ضوء مستمر

ميكو خلي بالك من مايا كويس
وبصي يا حبيبتي أنا هقولك على كام نصيحه من تجربتي
لأني إتبهدلت في موضوع الغازات والإمساك ده بهدله ما يعلم بيها إلا ربنا
1- ياريت تنظملها الرضاعات بتاعت اللبن في أوقات محدده لأن ده بينظم نومها وينظم عملية الإخراج
2- تاخد كل يوم رضعة يانسون ومتخلطهاش باللبن ولا تحليه بسكر ولا عسل ولو مقبلتوش ممكن تحليه بمنقوع التمر ( تجيبي التمر تنقعيه في ميه وتغليه على النار وتصفيه وتصبيه على اليانسون وتغطيه علطول ولما يبقى دافي إديهولها ) ومتكنش قبل النوم لأنها مبتشبعش والأحسن اللبن قبل النوم علشان تنام شبعانه
3- تاخد ماء غريب دواء سايمسكون كل واحد ثلاث مرات يوميا بالتبادل (يعني هتاخدهم 6 مرات في اليوم ثلاثه ماء غريب وثلاثه سايمسكون بالتبادل مره ده ومره ده ) أنا كنت بستخدم بدل سايمسكون دواء عباره عن أعشاب وبس إسمه هيمالايا بس أعتقد إنه مش موجود في مصر
4- لما تيجي تعملها التواليت دلكي بطنها بحركه دائريه حوالين السره بإتجاه عقارب الساعه ،،، وبعد كده دلكي بطنها من فوق لتحت مع ضغط خفيف ،،، وكمان إضغطلها برجلها على بطنها برفق ،،، لو كل ده منفعش إديها لبوس جلسرين وخليكي ماسكاها لحد ما تعمل وإنت بتدلكيلها بطنها بس ده يكون آخر حاجه تلجإلها
5- نيميها على بطنها على قد ما تقدري ****لله اليوم كله بس طبعا مع مراقبتك ليها علشان متتخنقش لاقدر الله
ده كل اللي أنا فاكره دلوقتي ولو إفتكرت حاجه تاني هقولك
معلش هما أول ثلاث شهور متعبين قوي ومفيش نوم نهائي أنا جنة جننيتني أربع شهور لحد ما إبتدت تتحسن
الحاجات ده هتهديها شويه إن شاء الله
وربنا معاكي يارب

اوكسي يا سكره وحشااااااااااني اووووووووووووووووي

مسلمه يا حبيبتي ربنا يخلي لك بنتك
صباحكم سكر

ام التؤامان تصدقى انا اكتشفت اننا مانعرفش حاجة عنك ؟
فين السى فى بتاعتك يعنتى انتى عندك كام سنة وايه اللى عندك ؟
ومن مصر ولا منين وعايشة فين
انا اكتشفت انك بتشاركى على مزاجك ياقمر كل فين وفين؟
يلا عرفينا عليكى الاول عشان فى كلمتين كده عاوزة اقولهوملك فى ودانك
بصى ياستى وماتزعليش من كلامى اللى هقولهولك عشان مطلوب من كل واحدة هنا تسمع التانية بقلبها لا بعنيها ولا بودانها ولا حتى بعقلها لان من واحدة لواحدة حتى العقل بيختلف
بصى يا تومى انتى طبعا معانا تقريبا من الجزء التالت وفجأة انقطعتى خالص ودخلتى تانى فى الجزء التاسع صح؟
يعنى ممكن ده يكون سبب نلتمس لك بيه عذر انك ماتعرفيناش قوى وعشان كده ممكن ماتقدريش تفسرى طريقتنا فى الكلام مع بعض او تفهمينا غلط
على فكرة انا مش هنا عشان اتهمك او حتى ادافع عن شوشو ولا العكس طبعا انا بس لما بشوف اتنين ممكن يكونو مش فاهمين بعض تلاقينى كده اتحشر فى النص واحاول اقرب وجهات النظر مع ان شوشو ماشاء الله عليها دخلت ووضحت موقفها بكل حيادية ورورو كمان من غير ماتعرف حتى شوشو تقصد ايه دخلت ووضحت لك الموقف صح ياجميلة؟
يعنى رورو اهه مع انها مش معانا من زمان بس زى مابيقولو قريانا واحدة واحدة يعنى من غير حتى ماشوشو تدخل وترد عليكى رورو لقطتها وهى طايرة والمفروض انتى كمان تبقى كده وتتأكدى ان مفيش حد هنا بيتضايق من حد ولا بيعمل تصرفات بحيث انه يقلل من حد ولا يتجاهل او يهمل حد ومرة تانية لازم تكونى متاكده على كده وبصمة بالعشرة كمان
وبعدين انتى ماشاء الله عليكى باين عليكى عقلك كبير وقلبك كمان والدليل على كده انك استوعبتى كلام رورو بسرعة وفهمتى توضيحها واعتذرتى على طول لشوشو مش كده؟ طيب مش من حق شوشو بقى انها تدخل وتدافع عن نفسها مع انها مش فى وضع اتهام اصلا
ومن حقها ترد على كلامك بالطريقة اللى هى شايفاها لانك اتهمتيها ظلم حتى لو انتى اعتذرتيلها قبل ماتدخل وترد
انتى اهه قولتى اللى جواكى فى الاول ورورو وضحت وبعدبن اعتذرتى يعنى اخدتى حقك مرتين مش كده ليه بقى زعلانة من رد شوشو وعلى فكرة ياتومى انتى اللى فرضتى لهجت الحديث بالرغم من انك من حقك زى ماقولتى انك تسألى عن السبب
وعلى فكرة كلنا هنا معذورين لاننا بنقرا بعينا بس مش شايفين رد فعل اللى قدامنا بسي زى ماقولتلك جربى تقرى بقلبك وانتى هتشوفى الملف بشكل تانى خالص
يارب ما يكونش كلامى ضايقك واكون قدرت اوصلك اللى جوايا
يلا بقى مستنيين السى فى بتاعتك

أوشي يا حبيبتي
ربنا يباركلك في كوكي وبودي يارب
بصي يا ستي فتق السره إن شاء الله مفيش منه خوف وإن شاء الله هيلم لوحده بس أنا أعرف إنه المفروض بيتاخدله دواء زي القطره كده وتحطي بعدها بودره بتسك الجرح في بعضه هيه بودره طبيه بس أنا للأسف مش فاكره أساميهم
ولو لاقدر الله منفعوش ممكن تعمللها كي بنترات الفضه ده سهله قوي ومش متعبه زي العمليه
بس إنت إسألي على موضوع القطره والبودره ده حتى لو تعرفي صيدلي مصري إسأليه ممكن يفيدك
وربنا معاكي غن شاء الله ومتضطريش للعمليه خالص بإذن الله بس إنت أمانه عليكي إصبري عليها ومتمشيش وراء كلام الدكاتره في كل حاجه يقولوها
وربنا يوفقك ويكرمك فيهم يارب ويباركلك فيهم يارب ويحفظهملك من كل سوء