سألتني فما عرفت اجاوب ودليتها على المسجد و....... زعلت

كنت بالسوبرماركت مع اولادي ........ وطبعا كنت معصبة كتير كتير لانهم دوخوني ...المهم وانا عم حاسب اجت وحدة وسألتني انتي مسلمة ...فقلت لها نعم ... واتجهت الانظار لنا ..فقالت لي وانا كمان مسلمة قلت لها اهلين ....فقالت ممكن اسألك ليش كل وحدة بتلبس حجاب على كيفها " انا كنت لابسة تنورة وجاكيت واسع وطبعا مغطية راسي".... قالت لي انا لما اسلمت زوجي قال لي البس هذا البس "كان لبس مثل الباكستانين مثل العبائة طويلة وتحتها بنطرون واسع" ...كان شكلها مو عاجبها ...

والله ماعرفت شو اقول .... اتمنيت لو اشرح لها ان اهم شي يكون الحجاب ساتر لانها كانت مغطية راسها بربطة صغيرة ورقبتها كلها بانية وجزء من كتفها بس الصراحة ماعرفت احكي بالاضافة الى ان نظرات الناس لبكتني والاولاد عم يدوروا حولي هون وهنيك وانا خايفة عليهم ....مابعرف كل شي فوق بعضه منعني من الكلام

قالت لي انا بروح على المسجد بس ما بشوف اخوات ..ماعرفت شو اقول لها لان انا ماشفت اخوات مسلمات هون غير 3 ....2غير متحجبات ووحدة محجبة .... فدليتها على يوم الاحد وقلت لها ان في مدرسة اسلامية وان اذا اجت رح تلاقي اخوات بيعرفوا انجليزي وبساعدوها بكل اسئلتها لان انا ما كتير منيحة بالانجليزي ...قلت ان شاء الله تساعدني المدرسة المصرية لانها محجبة وعندها لغة ...

الصراحة بيني وبينكم بعد ماراحت وللان حاسة اني متضايقة ....... ما بعرف شو السبب .... يمكن تمنيت لو كنت لابسة عباية .... او يمكن لان ماقدرت اشرح لها ... والله مابعرف قلت اكتب لكم ... حتى افضفض عن نفسي

انا نفسي كثيييير ارجع للجلباب ....مشكلتي الوحيدة ان الدنيا شووووووب وغير هيك ماعندي غير جلباب واحد ..... ادعوا لي الله يقويني واكتبوا لي كل شي بيخطر على بالكم وانتو بتقرؤا....واذا عندكم مواقع بتبيع جلباب مو كتير سميك مشان الحر ...ياريت تعطوني

21 تعليق 2,207 مشاهدة

شاركي في النقاش

سجلي الدخول لإضافة تعليق.

التعليقات

21
  1. السلام عليكم ..يا اختي مو مشكلة انك لابسة تنورة وقميص ..بس المهم انهم يكونون شرعيات ..وما يبينوا تفاصيل الجسم ..وانت ماغلطتي مع الست الي شفتيها ..لان الاولاد بيلبكو الواحد ..وبعدين انت ما كنت بتجيدي اللغة كتير ..فلا تحسي انك قصرت معاها
  2. @dmaa_hzn_6

    مومشكله حبيبتي اهم اشي انك دلتيها علي المدرسه وعاد هي وبكيفها اذا اجت او لا وان شالله تيجي وتريحي بالك بعدين مو حلو تقعدي تشرحيلها عن هيك امور في وقفه وقدام الناس بحسهم في هذه الحاله والله باكلوكي في عيونهم وهم جالسين يشوفو ويسمعو شو ببتكلمو
    بعدين وين جوزها عنها ليش مو هو يشرحلها ويعلمها اكثر اصول الدين ... صح او لا

    علي كل الله يهدي الجميع
  3. @althlg_almtsakt

    وعليكم السلام ورحمة الله

    اولا فى نظرى ان الجلباب اكثر حشمة للمراة من التنورة

    اعرف كثير هنا نساء تلبس التنورة بس تكون ملونة وضيقة عليها

    فتظهر مفاتن جسمها والى اعجب من العجب تشوفى هنا وما اكثرهن

    للاسف واحدة لبسة بنطلون ضيق وحاطة مكياج كامل وعطر بيفوح

    وقميص تحسى ان ازرارة راح يتقطعين من كثرة ما هو ضيق

    وطبعا ما تنسى الحجاب ولما تكلمهن فى الموضوع تقول كل زمان لة لبس

    ويكلمينك بمنطق غريب وعجيب وذ فكرتى بالبس الحجاب فهو افضل بكثير

    وكما لاحظت من كلامك انك تلبسين جاكت صدقينى الجلباب راح يكون اخف

    واذكر مرة فى يوم كان عندنا حر شديد وخرجت شوى البلكونة وعندى جارة

    ايطالية المهم زارتنى فى هذ ك اليوم وكانت فانيلية خفيفة وبنطلون قصير

    وانا بلجلباب كلعادة واحجاب ولله الحمد قالت لى ليش ما تبعديهم حر

    قلت لها بكلامات متقطعة بحكم لغتى الضعيفة انا مسلمة واحب ان البس

    هكذا ولا احس بلحر ابدا نظرت الى بتبسم وتعجب وسكتت

    فكم اتمنا ان اتعلم اللغة الانجليزية لكى استطيع ان افهم الناس ديننا

    اعذرينى اذ كنت قد اطلت عليكى وجزاك الله الف خير على مشاعرك النبيلة

    الصادقة .
  4. @sham_1

    لا تحزني عزيزتي

    فموقفك كان صعب فعلا الله يعينك

    مشان الجلباب عزيزتي ......

    صدقيني أن لبسه اريحلك كتير من اللبس العادي

    كيف :

    يعني ممكن تلبس تحته كنزة كم قصير أو ملابس البيت مثلا لو مستعجلة أو بنطلون وكنزة ...يعني أي لبس بس فوقه الجلباب أو المانطو نحنا منسميه رح يكون مرتبو محتشم ولو شوبت شوي معلش ... ربنا بعوضك خير وأجر وثواب

    أنا بالصيف بلبس ترانشكوت من بورلنغتون ......الترانشكوت بكون على قماش خملة يمكن وخفيف كتير

    يعني جربيه وشوفي وزنه عليك كتير خفيف

    مرة رحنا اجازة على فلوريدا وكانت الدنيا الحرارة فوق التسعين وأنا لابسة بانطو سميك وما انتبهت عليه كان أول لبسة

    والله والله رح مووووووووووووووووووووووووووت من كتر ما شوبت

    كان الناس لابسين شورتات طولها شبر بس ومن فوق بس هي شقفة قماشة وعم يموتوا من العرق والشوب

    وكلهم يطلعوا فيني ويقولوا : مالك مشوبة ........؟؟؟؟؟؟؟

    فعلا الله يجيرنا من جهنم

    بس سبحان الله مشي الحال وما صرلي شي

    مشان هيك بدي ياك تتشجعي وتلبس بانطو مشان تاخدي راحتك وتحققي اللبس الشرعي مية بالمية بإذن الله تعالى
  5. @nbaa_alhb_2

    حبيبتي فتاة سورية

    أنا بقول الحمد لله اللي عدا فيك هدا الموقف قبل لا ترجعي من الغربة.. هدا هو الموقف الوحيد اللي ممكن يشجعك على انك تتصرفي حيال موضوع اللغة.. لا تقولي لي ما بتعرفي كيف وان عندك ولاد.. أنا اللي ما بعرف وانت اللي لازم تعرفي..في على الانترنت.. في كتب ..في أخوات هون ممكن يدلوك على طرق أو يعطوك تجارب .. في زوجك ممكن يعلمك أو يساعدك...بس لا ترجعي وانت ما اتقنت اللغة..ولسه قدامك شي سنة ونص على الأقل..والله فينك تحققي فيها شيء وتعوضي اللي فاتك..هلأ الموقف عدى وانتهى.. رح تنقهري أكتر اذا بيرجع بعد شي كم شهر هيك موقف بعدي فيك وانت لسه ما اتخذت اجراء تجاه هالموضوع.. صدقيني..

    رجاء أعطي الموضوع اهتمام ولا تخليه مجرد موقف زعجك وانتهى.. ما في شيء بيحصل بدون سبب.. الله سخر لك هالإنسانة لتسالك من بين كل الناس.. اسعي .. واجتهدي .. وتوكلي على الله..ولا تنسي الدعااااااااااااااااااء ان الله يعينك لتعلم اللغة مشان تفيدي أخواتك المسلمات عندك.. هدا دورك لا تضيعيه .....

    أختك .. نبع الحب*

تابعي تجارب أخرى من هذا القسم.