تجمع الموقنات برحمة الله ( خبرات متبادلة حول مراكز تأخر الحمل فى مصر ) الجزء 15

السلام عليكم ورحمة الله وبركاتة
ازيكم يا كل البنات الحلوين عاملين ايه ..
اوكسى ...
يارب يارب العالمين ياكريم يارحيم ارزق اخيتى اوكسى (علا) الذرية الصالحة ..
اللهم إرزقها الذرية الصالحة من حيث لاتحتسب ووبارك لها فى رزقها ياكريم ..
ان شاء الله يا اوكسى موفقة بعون الله وهتيجى تبشرينا كمان اسبوعين ياحبيبتى .. ربنا يطمن قلبى عليكى يارب

وداع ..
انتى عاجبانى اليومين دول على فكرة ومعجبة بيكى جدا وبإنك كسرتى النفسيه السودا اللى سيطرت عليكى مده طويله ودخلتى فى مود جميل وحلو كله بهجه .. اوعى تقلبى القناة من فضلك يارب يفرح قلبك ويجعل ايامك كلها فى سعادة يارب
نادو ..
بقى بتقولى محدش بيسأل عليه .. انتى وحشة ومش بتقرى المشاركات على فكرة وياريت تراجعى المشاركات هتلاقى بنات كتير سألين عليكى يا توهان ..
احلام بسيطة ..
ازيك يا لومى عاملة ايه ياقمراية
عزيزة ..
مش عارفه اقوللك ايه انتى صعبانه عليه من اللى انتى عاملاه فى روحك ده .. اجمدى شويه هو انتى لسه شوفتى دورة علشان تقولى خلاص مليش نصيب والكلام اللى قولتيه ده ان شاء الله ربنا هيخيب احساسك ده ياشيخة ثم ان قولنا تلات الاف سبعمية مرة ان محدش يتكلم عن اعراض وكلام من النوع ده لانه بيلخبط جدا وانتى كده ممكن كمان تلخبطى نفسك اولا وباقى البنات بكلامك عن الاعراض وفى الاخر هتلاقى ان ملهاش قاعدة خالص ولا الحامل بتعرف انها حامل من الاعراض ولا اللى مش حامل برده بتعرف ..
ابوس ايدك اعقلى كده وبطلى الكلام ده لانه مفيهوش اى توكل على الله .. حاولى تتماسكى وتسلميها لله هو أعلم بينا وأحن علينا من اى حد تانى .. مش عايزة اشوف التوتر ده تانى يازوزة اتفقنا

النفسيه في الارض والله
ربنا كريم
سبحان الله متقوليش النفسيه فى الارض فين حسن الظن بالله يا مصرية ربنا كريم اوى اوى ارضى باللى ربنا كتبه لك واحمدى ربنا انك مش عندك مشاكل تانيه غيرك يتمنى لو يكون عنده تكيس بس


جزاكي الله خيرا علي نصيحتك ربنا يجعلها في ميزان حسناتك
انا الهرمونات التانيه sh تقريبا 8,lhتقريبا 6 علي ما اتذكر وقالتلي فيهم لخبطه وفعلا انا مستمره علي السيدفاج وقالتلي حاولي تخسي وتلعبي رياضه بس المشكله ان سيدفاج دا عملي هبوط ومش بقدر اقوم من مكاني
كلام مظبوط فعلا انتى محتاجة تظبيط لان الهرمونات فيها شوية لخبطة وده محتاج منك تنفذى التعليمات اللى اخدتيها بالحرف الواحد يا مصرية لان ده هو علاجك وملكيش غيرة ولو قصرتى فيه يبقى انتى بتطولى المده بتاعه تأخر الحمل ومش هتستفادى بشئ .. يبقى الافضل انك تستمرى على الخسسان وده ضرورى ضرورى ضرورى يابنتى وبالنسبه
للسيدوفاج فا من اعراضة الدوخة وتعب فى المعدة اتحملية واسبوع وهتتعودى عليه ومش هتحسى بأى اعراض خالص يامصرية ولما تبدأى تتعودى عليه اعملى دايت والعبى رياضة وهتبقى زى الفل

بس فيه حاجه محيراني
انا اعرف اللي هرموناتهم ملخبطه الدوره ما بتكون منتظمه
انا دورتي منتظمه
التكيس درجات يا مصرية منهم الدرجة بتاعتك اللى هى وجود تكيس لكن الدورة منتظمة وده درجة او مرحلة من مراحل التكيس وعندك شوشو مكانتش تعرف ان فى عندها اى تكيس وكانت دورتها منتظمة ولما عملت التحليل فوجئت بردو زيك كده واتعالجت وربنا كرمها ماشاء الله اللهم بارك ..
بلاش انتى تزيدى الموضوع سوء واشتغلى مع نفسك شهرين بس وهتلاقى الدنيا اتظبطت وهتعملى العملية بدون اى مشاكل خالص مشكلتك زى ما قولت لك بسيطة بس محتاجة التزام علشان تحليها قوام قوام ومش بعيد جدا وانتى فى نص المشوار تحملى طبيعى ..

وفيه حاجه تانيه مخوفاني جدا
الدكتوره لما قلتلها انا حبدا العلاج بالسعوديه واتابع معاكم بالفاكس وحبقي انزل اعمل العمليه قالتي معظم اللي عملوا كدا كانت النتيجه سيئه
خلتني في حاله احباط وهو دا الحل الوحيد امامي
وزوجي العدد في تناقص مستمر
والله حاسه ان جبال الدنيا فوق راسي من التفكير وكل خطوه فيها مشكله ومش عارفه اعمل ايه

سيبك من الكلام ده دلوقتى هى يعنى هى اللى هتديكى الحمل ولا ربنا .. انتى اعملى اللى عليكى وخدى بالاسباب واكيد ربنا هيعينك على ده وبالنسبه لزوجك شوفى ايه الوضع بالنسبه له فى فترة علاجك انتى يعنى هل فى ادوية ياخدها بحيث يقلل نسبه تناقص الحيوانات المنوية ولا ايه يعنى هل فى علاج يحجم الموضوع شويه عقبال بس ما تتعالجى انتى من التكيس .. وعلى فكرة فى حاجات طبيعية بتزود العدد كتير اسألى عليها البنات اللى كان عندهم نفس المشكلة وان شاء الله هتتحل وربنا كريم بس توكلى على الله وخدى بالاسباب الاول وبعدين اطلبى من ربنا الفرج

توفى حبيبتى ازيك ياجميلة عاملة ايه معلش المرة اللى فاتت دخلت وخرجت بسرعة ملحقتكش اسأل عليكى .. بصى يا قمر احنا مش هنختلف على ان الهرمونات بصفة عامة بتتغير فى جسمنا نتيجة شوية عوامل منها النفسيه لكن ياقلبى مش معقول كل واحده هرمون اللبن او اى هرمون تانى يعلى عندها نقول لها اصله علشان النفسيه وهى اساسا لو عادت نفس التحليل فى وقت نفسيتها فيه كويسه هتلاقيه نفس النسبه او هتلاقى تغيير طفيف فيه ولو كان فعلا النسبه بتختلف تبعا لموضوع النفسيه مكناش هناخد علاج وكنا نحسن حالتنا المزاجية وكنا هنبقى حوامل .. لا التغييير اللى بنتكلم عليه فى هرمون اللبن مش بالشكل اللى احنا متصورينة ابدا .. فاهمانى انا اقصد ايه .. انتى عارفه انى لما عملت التحليل كان ده اول تحليل اعمله وكنت مرعوبة جدا ولما عملته مش فاكرة كان 19 ولا 20 ومع ذلك د عادل ادالى العلاج بتاعه مع انه كان ممكن يقول انه مش عالى وانه طبيعى بس الدرجه ولا الاتنين العاليين دول من التوتر لكن ما اهملش الموضوع .. وعموما المعلومة دى وزى ما قولت ووضحت المعلومة وصلتنى منين ونقدر نشوف مع بعض ونتأكد الصح فين انا يهمنى فى الاخر اننا نعرف فين الصح ياقمر وممكن هى تسأل برده وتطمننا قالوا لها ايه فى المركز

ام مايا
سلامات
عاملة ايه ياجميل
سلام كبير لمايا
اوكسي
ان شاء الله ربنا يكرمك باحسن بويضات ويباركلك فيها ويرزقك منها اجمل اطفال يارب
شيمو
ربنا يكتبلك الشفا في الحقن دي ان شاء الله ويكرمك بعدها يالحمل السليم الي تتمنيه
عزيزة
ربنا يخلف ظنك ويرزقك من حيث لا تحتسبي عاجلا غير آجل يارب
هدي
ايوة كده
ارجعي نورينا تاني
يوسف عامل ايه سمي النونو ولا لسة
اتهيالي نيفو مسمتلكيش لسة؟؟؟
بندقه
منورة ياجميل
ربنا يوفقك في خطواتك يارب
توفي
معلهش ياتوفي تعددت الاسباب
بس كل ده من التكيس اعتقد كده مبايض مجنونةبعيد عنك ربنا يهديها عندنا كلنا
مصرية
انا هرموناتي تقريبا مظبوطة ودورتي منتظمة بس مفيش تبويض واستجابة التنشيط ضعيفة يعني التكيس فيه حاجات كتير بتثبته بس مش شرط كلها تكون موجودة
السيدوفاج انتظمي عليه ولما يعمل هبوط خدي سكريات انا كنت كده برده ودلوقتي متعايشة معاه الحمد لله
دوددة
اهلا بيكي ورتينا
رمال
ربنا يفتح نفسك يارب
انا مش حقلب القناة بس يارب متتقلبش لوحدها
ههههههههه

قولى بس يارب ده اللى عليكى تعملية