الله يالدنيا تذكرون لبسكم العيد أول ياليت كل وحده توصف لنا خلاقينها

السلام عليكم


خبركم أبلة تاريخ وأحب الماضي التليد والزمن الجميل >>> يالحبيبه بتتكلمين عن فساتين وإلا عن فتوحات



أختكم مالها بالمقدمات الطويله


مدري وش طرى على بالي

بس تذكرت لبس كنت لابسته يوم عيد الأضحى وأنا في سادس إبتدائي

مدري ليش إذا تذكرته ضحكت مع إنه كان بذيك الفتره كشخه


أذكر كان فستان مشجر بألوان الورود بس اللون البارز أخضر فاتح

وكانت آبته مثلثه على كل جهه وحده على اليمين ووحده على اليسار وكانت طويلة لين تحت الصدر وهي بيضاء وعليها ورود



من الوصف تحسونه قمة القرونة بس عاد أذكر إنه كان كشخة


يمكن في عيني مدري


وأذكر لبس عيد الفطر كان بنطلون فستقي ومعه جليه والبلوزة بيضاء <<<الله يهدي أمي مهنا بياض وملبستني فستقي



يالله يافساتينا كانت تحفه

بس والله كنا نفرح فيها


الله يالدنيا يوم مانشتري إلا من طيبه والعويس

يوم محل خالد وخلود والأخوين أيام عزهم


مايحاكيك خالد إلا ب200 ريال


وألحين

الله يحلل ال200 على الأسعار النار



بنات يالله كل وحده توصف لنا فستانها في أحد الأعياد اللي تذكرها



وأنا كاني تذكرت لي خلق كنت أحسبه كشخه وصفته لكم

يمكن يعجبنا موديل وإلا شيء ونفصله ماتدرون



دعواتكم لي بالتوفيق

68 تعليق 6,065 مشاهدة

شاركي في النقاش

سجلي الدخول لإضافة تعليق.

التعليقات

67
  1. @dr_algman

    مااذكر بالحيل بس في احد الاعياد كنت لابسة فستان بخصر نازل وتحت كلوش من تحت مثلثات والصدر قماش مطاط من زينه علي بعصاقيلي ...لونه اصفر منقط باسود ثاني يوم ارسلوا مع ابتي بنات عمي ...>>>اللــــــــــــــــــــــــــــــــــه من الذوق >>>بس مبسووووطين
  2. @rymaaasss

    انا اذكر واحد من ملا بسي العيد اظن كنت بسادس بلوزة مشجرة و تنورة ضيقة زرقاء و طويله >>>> احسه لبس كباااار بس كشخه بالنسبة لي خخخخخخخخ
    لا و البلوزه طبعاً مدخلته جوا التنورة واذكر شعري ملففته بقصدير ايام القصدير اللي طحنا فيها

    :)

    وكل ملابسي تفصيل ما اشتري جاهز >>>>> مسويه فيها مصممة ما يعجبني الجاهز
  3. هههههههههههههههههههههههههههه

    انا اكشخ منكم كان عمي الله يطول بعمره مبتعث لبريطانيا وكان يجيب لبسنا من هناك والله موديلات رائعه الان تنلبس يعني رجعت موضتها
    وعمي الثاني كان في امريكا اول من لعب في باربي كان انواع اللبس والالعاب الله لا يحرمنا منهم
  4. @hyaty_tghyrt

    يالله زمن يجنن في عيد من الأعياد شرت أمي الله يرحمها طاقة كاملة قماش سماوي وفية لولو كاتي ((وجه يقول الله من الكذب))المهم ماعليكم من الوجه ....وأنا وأخواتي وبنات عمي طقمنا بموديل واحد قبة والفتحة دائرية الكم منفوشة وكمر وقصة بوسط الخصر ويجي من تحت نصف كلوش

تابعي تجارب أخرى من هذا القسم.