تجمع الموقنات برحمه الله (خبرات متبادله حول مراكز تأخر الحمل في مصر) الجزء16

صباح الخير ياقمرات

اوكسي قدر الله وماشاء فعل ياحبيبتى ربنا يكملك بعقلك ويزيد ايمانك بجدانتى قدوة لينا كلنا

حبيبتى ماما ربنا ما يحرمنى منك ... ونعم الاخت فعلا
انا بإذن الله لما الدورة تيجى وتخلص حروح للدكتور واقعد معاه واكلمه بشأن الاقتراحين بتوعك واشوف حيقولى ايه ؟؟

شوشو – ريمو – نيفو – ام اياد – ماما – ام مريم – وداع – رورو – احلام بسيطة
ام انس – ميزو - توتا – توفى – بندقة – سومية – رجاء الغفران - متمنية الجنة...كل اخواتى الطيبين اللى فى الملف
فعلا انتم نعم الاخوات بلاقيكم جنبى فى كل الاحوال
ربنا ما يحرمنا من بعض واشكركم على كلامكم ليا

على فكرة محدش يحسب ان اوكسى دى سوبر ومفيش حاجة ممكن تضايقها
لكن احب اقولكم انى بفضل من ربنا دى طبيعتى ... انا لما كنت فى ثانوية عامة كان فاضلى 0.2 % على صيدلة او طب اسنان والطب البشرى كان فاضلى 1 %
ناس كتير كان يقولولى انا لما منك كنت اتقهرت وكنت برد واقول وانا فى سنى الصغيرة دى ان ربنا عاوزنى ادخل كلية العلوم وهى كلية مش وحشة واكيد هو ده الخير ليا
طبعا مافيش حد كامل غير الرسول عليه افضل الصلاة والسلام
العيوب اللى فيا بقى انى ممكن اتنطط واتقهر واتنكد ومعرفش انام كمان بسبب حكاية تافهة جدا زى
1- دخلت مع حد فى حوار وضايقنى وقالى كلام بايخ
2- حاجة باظت منى فى الشغل بقعد الوم واقول يارتنى ... الخ
فى الحالات دى بصراحة بحس انى شخصين مش شخص واحد
واحد فى قلب الفيلم نفسه والتانى بيتفرج عليه ويقوله ايه الهبالة دى الموضوع مايستحقش كل اللى بتعمله فى نفسك ده ... بس للأسف مبقدرش اسمع كلام الشخص التانى وابطل مضايقة او نرفزة

طب احكيلكم على موقف فى الشغل كان حصل معايا من 5 سنين من قبل ما اتجوز
كنا فى رمضان واليوم عندنا بينتهى الساعة 2 ظهرا ... وانا فى شغلى معرفش اشتغل من غير ما آخد كل حاجة على اعصابى خصوصا عندى مديرة ربنا يهديها
كان فيه عينات شامبو لازم تخلص عشان حتسافر اليمن ولازم نخلص الورق بتاع تحاليلها كمان
المهم هى نصف ساعة اللى فاضلة والشغل لسة كتير ... انا لما اتنشن صوتى بيعلى وبتوتر ومحبش حد يقاطعنى ... المهم فى الوقت ده مديرتى اتصلت بيا يجى 3 مرات تطلب تعديل فى الشغل
آخر مرة قفلت السكة فى وشها ... اينعم عملت كده ... اعصابى فلتت منى وقلتلها ارحمينى بقى خلينى اخلص اللى ورايا ....
طبعا طلعت قرار مدخلش معملى نهائى ونزلتنى فى المصنع تحت ... انا روحت يوميها وانا مش شايفة قدامى وفضلت اعيط زى الاطفال بصوت عالى فى الاتوبيس ومكنتش عهارفة اسكت نفسى
وبقيت فرجه فى الشارع كأن متلى ميت
قعدت آخر اسبوعين من رمضان وانا فى مناحة لا عارفة اصلى ولا انام ولا آكل
ضيعت احلى ايام ممكن ربنا ينعم بيها على مسلم ومبترجعش تانى.
شفته هبل اكتر من كده ؟؟ وكل ده عشان ايه شغل ... طظ
القصة انتهت بعد العيد ورجعتنى معملى لأنها ببساطة متقدرش تستغنى عنى فى الشغل
انا بس بحكيلكم عنى عشان ماتحسبونيش المرأة الحديدية ... انا جواية طفلة صغيرة
ممكن تعمل مناحة على لعبة صغيرة اتكسرت فى ايدها ....
بقلوكم كده عشان تعرفوا كل واحد فينا فيه عيوب ومزايا ...