ام زوجي تتكلم عن اخواتي .... كيف ارد عليها واسكتها ؟؟؟ ابغى وحدة شخصيتها قوية وحقانية
بأختصار ...انا عندي اثنين من اخواتي غير متزوجات وثلاث اولاد شباب
وطبعا امي عندها شغالة بالبيت .... وام زوجي كأنها مقهورة انه امي عندها شغالة واخواتي موجودين
ودايم اسمع انها تتكلم عند سلايفي او اي احد ... انه امي بيتها من شغالة لشغالة واخواتي موجودين <حسد يا كافي>
المهم ... في موقف ... زوجي جاب لأمه هدية شغالة اندنوسية من برة ... لكن ام زوجي كانت تخاصم الشغالة
وتسبها وما كملت الشغالة اسبوع الا وهي تبكي وتقول ما ابغى اشتغل عند ام زوجك... على طول زوجي زعل
لانه امه كانت تسب الشغالة ... وقال لي : شوفي اذا امك تبغى تشتري الشغالة وتاخذها <لأنه امي وقتها كانت بتقدم>
المهم قلت لأمي عليها ... وقالت طيب اوكي والحق يتقال الشغالة مرة نظيفة وكويسة ....
وصار لها عشرة ايام عند امي .... صارت ام زوجي كل شوي تجي عندي وتقول ابغى فلوس عشان اقدم على شغالة
تانية قبل رمضان ... وانا قلت لها طيب امي بس تجربها اسبوع واذا كويسة بتديكي فلوس
صارت تتكلم عند سلايفي .... وتقول ما اعطوني فلوس ولا شيء ....
وانا زوجي قال خلاص اخرجي من الموضوع انا اتفاهم مع اخوكي على نقل الكفالة وكل شيء وراح اخذ الفلوس من
اخوكي .... لكن ام زوجي رجتني شكلها تبغى الفلوس بيدينها ما تبغى زوجي ياخذها .. وصرت اقولها خلاص الرجال
هم بيتفاهموا ...
اللي قهرني مررررررررررررة امس ام زوجي قاعدة تتكلم عند وحدة من سلايفي ... وتقول عني ... اني مو راضية
اكلم اهلي على الشغالة وما كلمت اخوية وانا مستهترة... مع اني قلت لها زوجي كلم اخوية وخلاص ...
وتقول .. وهنا اللي فقع قلبي ..... تقول الشغالة لها 10 ايام عند اهلها وعندها اختين الوحدة من هنا لهنا .... تأشر بيدها
على الكنبة يعني قصدها من تخنهم ... انا هنا ولعت مرة
كلة كوم موضوع الشغالة ..... وكلامها عن اخواتي كوم ثاني .... وكنت بروح لأم زوجي اكلمها بس سلفتي حلفتني
بالله ما اتكلم ... وقلت لها خلاص بجيب طريقة ثانية المح لها ما تجيب سيرة اخواتي ....
بس يا بنات اعطوني رد او كلام يسكتها ويحرجها بنفس الوقت بصراحة الا اهلي ما تتكلم فيهم ... تتكلم فيني براحتها
بس لا تتكلم عن اهلي ... ابغى رد يخليها تسكت طول عمرها .. ما ابغى قلة حيا او مضاربة لا رد قوي يسكتها
لأنه اليومين هذي بروح لها .... وموضوع الشغالة خلاص عم يسوا اوراقها لنقل الكفالة بس والله قهرتني كلامها عن اخواتي
واللي تجي تقول ... نقل الكلام والفتنة وسلايفي ... بليز هذا مو موضوعنا ... خلاص الكلام وصلني وانتهى الموضوع
ابغى رد لكلامها عن اخواتي