مرحبا ...كيفكم ؟؟؟
ألف مبروك للي ولدو والحمد لله على سلامتهم ... وعقبالنا يارب..
الليله بسولف لكم عن قصتي مع القيصيريه الاولى اللي صلحتها قبل 6 سنوات وكانت بمستشفى الحرس الوطني اللي بخشم العان طبعا بالرياض..
طبعا ماأتذكر منها أشياء كثيره ,,بس من قرأتي لبعض القصص تذكرت أشياء كثيره صارت لي ...
أولا ماأتذكر أنا خلصت التاسع أو لا بس جاني الطلق قبل مايجي الموعد اللي حددوه لي علشان الولاده ,والطلق ياساتر كان جامد جدا ماأقدر أنسى المعاناه اللي عانيتها خصوصا أنو كان الوقت شتاء وبرد وأبوي الله يرحمه كان متوفي من أسبوعين بس..
رحت للمستشفى وكشفوا علي قالوا لسى مافيه ولاده روحي وأذا أشتد الالم تعالي ...طبعا رحت البيت واليوم الثاني رجعت لهم لاني ماتحملت الالم خصوصا أنو الطلق يتسلط عليك وقت النوم ..ويرجعوني لان مافيني ولاده ...والالم مستمر ماأقدر أنام منه أبد واليوم الثالث رحت لهم وأنا كارهه نفسي ..ولما قالوا أرجعي قلت لهم بيتي بعيد من المستشفى وأنا تعبانه ..نوموني عندهم ليلة عيد الاضحى والالم مازال جامد ومستمر بس أتوقع مو منتظم ..
دخلوني غرفة الولاده وقالوا بيعطوني طلق صناعي وزاد الالم كثيروأنا نشفت خلاص بموت من الالم ...كان معاي ممرضه فلبينيه الله يذكرها بالخير لابسه النقاب ورحمتني وتمسح على ظهري وتقرأ وتقول أقري ...
المهم أعطتني الحقنه الشرجيه (أعزكم الله )...طبعا ماخلوا أبرة ورك ألا وأعطونيها غير المحاليل اللي رايحه وراجعه ...الله يعظم الاجر ..
وقالوا بيعطوني أبرة الظهر لاني مو متحمله الالم وطولت وأنا أطلق والرحم ماأنفتح غير 5 سم ..ووقف ..أعطوني أبرة الظهر طبعا الطلق موصل حده وأنا مثل اللي مغمى عليها مره أحس فيهم ومره لا ..جلسوني على طرف السرير وخلوني أتكي على طاوله الاكل..وطبيب التخدير كان أجنبي ..وماأحس الا بألم أقدر أتحمله مقارنة باللي قاعده أمر فيه ..وأحس بشي بارد مره يمشي بالعمود الفقري يطلع على فوق الى الرقبه ..
على بالي أنو الابره مطلعينها ...أثاريهم يخلونها مثبته بالظهر ..طبعا ماحسيت بالابره أبد ..شوي الا وأتبنج من وسطي الى أخر أقدامي ..ولا عاد حسيت بشيء ..وركبوا لي القصدره .. صحصحت وكلمت على أهلي الساعه 6 الصبح ..قالوا ماشاء الله ولدتي صوتك زيين قلت لا باقي ...هذا الكلام كان يوم العيد ..
وبعدها نقلوني على غرفة العمليات طبعا بعد ماوقعت على أوراق العمليه..ورحت وأنا أحس مره أنو فيني نوم بسيط بس أحس فيهم ..طبعا قرروا لي عمليه لان البيبي تعب ..والرحم ماأنفتح غير 5 سم ..
حطوا بيني وبينهم حاجز من القماش ويوم أطالع فوق الا وأشوف اللمبه عاكسه بطني والدم وتجيني رجفه قويه وحسيت بالبرد ..وأرجف قالوا وشف بك قلت بردانه ويحطون على يديني لحافات دافيه مره وعقبها وأنا أهدى ..
حسيت فيهم وهم يشقون بطني ويقولون بتحسين بضغط شوي وشوي الا وأسمع بنتي حبيبة قلبي تبكي ويحطونها عند وجهي وتقول النيرس شوفي بنت ...
وشكلهم قعدوا يغسلونها ويلبسونها ...وجلس الدكتور والدكتوره يخيطون الجرح ويسولفون ..بعدين أنا يجيني النوم ويروح يعني مو صاحيه ومنتبهه مره ...وخلوني عندهم بالملاحظه ماأتذكر كم جلست ..بس ماجات الساعه 9 الاوأنا بغرفه التنويم ..
طبعا جلست نايمه كثير ..وقومني علشان أمشي والمشي بعد العمليه صعب مره تخافين تطيحين ويادوب أخطي ...وقالوا روحي للحمام ..وبالكاد وصلت له ..شوي صعبه الحركه ومع المسكنات ماأحس بألم كثير ..بس الخوف من أن الجرح ينفك ...ويعطوني حاجه أنفخ فيها يقولون علشان الالتصاقات وكل شوي أنفخ فيها وأمشي ألين أوصل حد معين بعدين يقولون تمام ..طبعا جابوا لي بنتي بالليل وقالوا رضعيها ...
وأكلت وشربت بس تحت ملاحظتهم ..كل شيء أسويه يجلسون يناظرون فيني ..هاه ماما كويس مافيه ألم ؟؟
طبعا أتعذب لما أبغى أكح أو أعطس الله لا يحرمنا الاجر وظهري أنكسر من نومة السرير ماأقدر أنام على جنبي ..
جلست عندهم أربعة أيام وقبل ماأطلع جاتني ممرضه وشالت الدبابيس ...لان عمليتي كانت كبس ..طبعا كنت متخوفه من شيل الغرز لان وحده الله لا يسامحها هبلت فيني تقول أشد منه مافيه ...بس والله يابنات يوم بدت تشيلهم ماحسيت الا وصقع الدبابيس بالعلبه اللي معاها وشوي تقول خلاص ..وأنا أحمد ربي على الصحه والعافيه ...وصرفوا لي مسكنات وحبوب منع الحمل ..وطلعت يارب لك الحمد ...
ألحين عندي موعد الاسبوع الجاي ولاده ...وأصريت على دكتورتي تسوي لي عمليه ...لاني خايفه من الالام الطلق الصناعي وأخاف يصير لي مثل ولادتي الاولى طلق وطلق وبعدها.. عمليه ...
وأستخرت الله ..والله يستر يارب ..
{{{{{{{{{{{{{تجمع القيصريات الثــــــــــالث }}}}}}}}}}
متابعة النقاش، صفحة 174