تجمع مستخدمات الروكتــــآآآن 1431هـ .. الجزء(2) [الرجاء فتح تجمع جديد]

الله يسعدكن بنات على الرد

انا يمكن مسافرة بعد كم اسبوع بر واخاف على الحبوب مع السفر تخرب<<مدري وش اسوي؟

وطبعا مع الحر وطلعة الشمس راح احتاج الواقي وراح اشوف اللي قلتو عليه

وافكر بمرطب للبشرة<<اخذ استافيل وش رايكم؟؟

لأن الفازلين راح احطه اذا جاني جفاف حول فمي فقط وباقي وجهي يبيله مرطب بس مو دهني حسب ما قريت من ردود البنات
وطبعا من كثر ماقريت نسيت وش اللي يصلح وايش ما يصلح <<مدري علامي صرت انسى

انا اليوم نزف خشمي(انفي) بقوه وكل يوم اذا نظفت خشمي ينزف خفيف وفيه تشققات من داخل وحلجي (فمي) متشقق يعني دمار شامل وصرت استخدم كل انواع الفازلين .. فازلين طبي من الحكومه , الفازلين البني اللي بزبدة الككاو والفازلين العادي والفازلين الخاص للشفايف شاريته اليوم من boots وانا حاليا بالشهر الخامس توني باديه واذا استمر معاي النزيف احتمال اوقفه ..

واتوقع النزيف والجفاف الزايد من الجو لاني بلندن واحيانا بارد الجو يعني من البرد تشققت الشفايف بزود

^^

يابعد قلبي انتي

مثل ماقلتي شكله من البرد اللي عندكم

الله يشفيج يارب

بنات أنا انتهيت من الروأكتان تقريبا من شهر وشوي

وأحب أقولكم مثل دايم يقال " اللي يبي الدح ما يقول أح "

وثاني شي ، تأثيره عليك من ناحيه جسدية و نفسيه يختلف من حاله لحاله ، يعني مو كل كلام تقرينه في النت يخوفك وترتاعين ، انتي قبل استخيري وادعي ربك يكتب لك الخير وتوكلي على الله

طبعاً أعراض الروأكتان أثناء العلاج ماراح أتكلم عنها لأنه مستهلكة وأهمها الجفاف اللي راح يزول تدريجيا أول ما تتركين الحبوب ..

بس باقولكم نتايج الروأكتان غالبا مرضيه وكثير بنات أعرفهم فرق كبير قبل وبعد مثلي أنا ما كنت أتوقع تطلع بشرتي كذا والحمدلله هو بيده كل شي وهذي بس كانت سبب ..


أهم شي بما أننا فصل الصيف كثروووو مااااااااء وخلي جنبك دايم جيك المويه واشربي لأن الجفاف يحتاج ترطيب ..


وأي سؤال أنا حاضره يا حلوات


دعواتي لكم تمر فترة العلاج بأسهل مما تتوقعون وتكون النتايج مرضيه لكم ()

هذا موضوع قريته

&

&

&


يا بنات هذا ردي على احدى الاخوات اللي كانت تستفسر عن حبوب الروكوتان

و ارسلت لي اكثر من اخت يطلبون مني افرد له موضوع خاص فيه لأن كثير من اللي استخدموا الروكوتان ما يعرفون هالمعلومة الخاصة بالجرعة التراكمية و المكتوبة باللون الاحمر رغم اهميتها الشديدة عشان ما ترجع لكم الحبوب مره ثانية بإذن الله ( مع الاخذ بالاعتبار انه ممكن تنوجد حالات شاذة الله اعلم )

و هذا ردي على الأخت كما كتبته في موضوعها ..

اقروه زين و اي سؤال انا حاضرة بإذن الله





المشاركة الأصلية كتبت بواسطة بت جدعه
يا قلبي عليكي

اول شي مبروك على استخدامك للحبوب و صراحة تستحق التهنئة كل من فكرت باستخدامها ( طبعا مع احتياجها الحقيقي لها ) لانها راح تحصل بالنهاية على بشرة اقل ما ينقال عنها رائعة

ثاني شي باختصار كل اللي ذكرتيه جزء لا يتجزأ من هالعلاج

الجفاف جسم و شفايف و عيون

دم الانف بالشهور الاولى و بعدها بترتاحين

الم العظام و المفاصل و ما ادراك من الم العظام و المفاصل والله العظيم اني كنت يوم اطول بالجلسة على وضعية معينه اكثر من ربع ساعه اجي اتحرك و كني قطعة خبزة يابسة هههههههههه
لدرجة ما اقدر اقوم بلحالي لازم احد يجي يفكفكني هههههههههه
بس برضو طبيعي لن هذا فيتامين أ يوم يترسب في العظام و المفاصل يسوي كذا
و ان ما قدرتي تتحملين اكثر خلي الطبيب يخفض لك الجرعة شوي

بس حطي في بالك كل هالشغلات مالها علاج غير بالموية ثم الموية ثم اموية اشربي موية قد مافيك و بترتاحين مره باذن اللله

مو اقل من عشر كاسات باليوم كامل

و جفاف الجسم عن تجربة قطي كل المرطبات اللي عندك و روحي اي صيدلية و اشتري كريم فازلين لوشن المثبت للرطوبة علبته بيضا و غطاها ازرق اشتري اكبر حجم اللي فيه ضغاط سعره 30 ريال و ربك ما نفعني غيره و لا ارتحت غير عليه و الا بقية المرطبات بهذلتني و جابت لي حساسية بجسمي و حكة فظيعه من الجفاف و ابعدي عن كل شي غيره

خشمك و شفتك الفازلين لا يفارقهم خذي باصباعك فازلين و دخي بداخل خشمك و امسحي جدرانه الداخليه مسحه و بترتاحين كثير في الشهر الرابع

حطي فبالك لازم كل شهر تسوين تحليل للكوليسترول و انزيمات الكبد لن الكوليسترول ارتفع عندي من العلاج فلازم متابعة شهرية

الدورة بالفعل تلخبطت شوي عندي و صارت تقدم و تأخر بالايام لكن مع كذا الحمد لله مرتاحة

العلاج قال لي الطبيب انه راح يفتح جسمي كله بس ما احس التفتيح و التوحيد كان بذيك النتيجة اللي بغيتها ( اتكلم عن الجسم ) عشان كذا اعتمدت على شغلات ثانية لهالموضوع ( مقشرات و سكرابات و أملج و حمامات مغربية و ساونا و كريمات تفتيح ) و كذا يعني و الحمد لله وصلت لدرجة مرضيتني جدا جدا جدا

بس اتركي كل هذا و تعالي اقول لك على موضوع مهم جدا

كثير من اللي استخدموا هالعلاج فرحوا بنتيجته سنه و الا سنتين و بعد كذا رجعت الحبوب لبشراتهم صح مو بنفس الدرجة السابقة بس انها رجعت

تدرين ليه ؟

لن كثير من الاطباء يغفلون او يتغافلون عمدا ( بيكسبون اكثر يوم ترجعين لهم تتعالجين مره ثانية ) عن موضوع الجرعة التراكمية !!

وش هالجرعة التراكمية ؟

لو قراتي الروشته الجاية مع العلاج بتلقينهم مشددين على موضوع انه لكل كيلو جرام من وزن الجسم يحتاج له ما لا يقل عن 120 ملجرام من هالعلاج خلال فترة العجلا كامله عشان يحصل الشخص على النتيجة المضبوطة

كيف يعني ؟

يعني الحين مثلا لو كان وزنك 60 كيلو جرام يوم اجي احسب الجرعة التراكمية من العلاج اللي تحتاجين لها راح اسوي التالي ..

60 × 120 = 7200 ملجرام من الروكوتان

و تعال وزعي هالجرعة على استخدامك اليومي اللي اشوف انه مره مرتفع و لا قد شفت احد من كل اللي مروا علي يستخدم كل هالجرعة ( 80 ملجرام ) مره عالية و هي السبب في آلامك الشديدة اتوقع عشان كذا احرصي على انها ما ترفع لك الكوليسترول و تصيرين مريضة كوليسترول لا سمح الله

بس نكمل ..

7200 قسميها على نوع حبوبك اللي هي 20 ملجرام عشان تعرفين المفروض تستخدمين كم حبة خلال فترة العلاج = 360 حبة من ام 20 ملجرام
يعني بالعلب تساوي = 360 قسمة 30 ( اللي هي عدد الحبوب في كل علبة ) = 12 علبة روكوتان

هالـ 12 علبة تقدرين توزعينها على ست شهور او على سبع شهور او على 10 شهور مو مشكلة حسب قدرة تحملك اهم شي انه في النهاية يدخل جسمك و يترسب فيه كل هالجرعة و الا ما راح تستفيدين من العلاج الا كم سنه بس و بعدها بترجع ريمة لعادتها القديمة

طبعا في حال لو سويتي التحليل و لقيتي الكوليسترول عالي لازم تخفضين الجرعة و تخفيضك للرجعة يعني زيادة عدد الشهور
و لو بيوم نسيتي تاخذين الحبة فمافي مانع انك مع الجرعة الثانية تاخذين الحبة حقت امس مع الحبة حقت اليوم لن مثل ما قلنا هالعلاج ماهو دوا يعتمد ع الوقت ولا على المدة كل المهم في الموضوع ان يترسب في جسمك هالقدر المعين من الفيتامين أ و مشتقاته الموجودة بالعلاج عشان تحصلين على النتيجة المرغوبة


و آخر شي بالنسبة للحمل لا ابدا حكاية السنة مبالغ فيها جدا

هم يقولون شهر بس انتي احتياطا خليها شهرين اضمن لن فيتامين أ يسبب تشوهات للأجنه و ربك يكتب لك اللي فيه الخير


ادري بربرت واجد بس ادري قديش انتي بحاجة لكل معلومه مثل ما كنت انا و لا ابي منك غير دعوة فظهر الغيب ان الله ييسر اموري



بالتوفيق غاليتي و اي سؤال انا حاضرة بإذن الله