شوفوا ولد عمي وش يقول عني

السلام عليكم ورحمه الله وبركاته
اليوم الظهر خالتي اتصلت على امي وقالت بتجينا فلانة وتعالي انتي والبنات , هذا امر طبيعي لانه دايم يكلمونا ونكلمهم بالزيارات والعلاقة مثل ما قلت لكم جدا قوية , المهم ان هذي الزيارة كنت خايفة منها امي تقول لي ولاخواتي تجهزوا وانا كنت مترددة بالروحة وكنت ابي اشاوركم اروح والا لا بس للآسف ما قدرت لاني تجاوزت 3 مشاركات باليوم وانا كنت دايم اروح مع امي عندهم بس هذي المرة كنت ابغى اتحاشى بنت عمي وكنت منحرجة اجيهم لاني متأكدة انها كلمت اخوها .
امي قالت وش تسوين بالبيت لحالك ياللا معاية قمت ورحت مع امي واخواتي . والحين تونا جينا وعلى طول حبيت احكيلكم باللي صار .
كنت طبيعية زي كل مرة سلمت على خالتي وبناتها وبنت عمي اللي كلمتكم عنها اخذتني بالحضن احرجتني الله يهديها وطول الجلسة تغمز لي بعينها وانا مطنشة .
بعد السفرة والحلى اخذتني بنت عمي لغرفتها وقالت لي ما ودك تعرفين وش صار سويت نفسي بلهاء قلت في ايش قالت فلان يمدحك وقال لي عن موقف حصل بينكم وانتم صغار قلت وشهو قالت انا حكيت له عن الزواج وقلت له لازم تتزوج وش ناقصك حتى اخوي اللي اصغر منك تزوج وبعد شهر بيصير اب وانت بعدك قال لي كل واحد حر بحياته بعدين كلمته فيك وهو ساكت بس ما رضي اني اوصفك قال حرام ما يجوز وبعدين قال انا اذكرها وهي صغيرة اذكر مرة فشلتني ( زعلت وقلت لها في ايش فشلته ) قالت يقول مرة كنت العب معاها وخبطها على خشمها وانا ماكنت قاصد هي نزفت وصار وجهها كله دم وراحت تبكي وافضحتني مع عمي وخالتي وانا اصلا ما كنت قاصد وكنت منحرج من عمي يقول لي ليه يا فلان وانا اقول بس ويزعل مني هو يحسب اني قاصد ويوم رجعنا بالسيارة مع امي وابوي يقولون ليه تسوي كذا اقول لهم بس وانا معرف معنى بس هم يفكروني عدواني واني قاصد وبعدها مرة جونا وكانت معاها حلاوة مصاص ومعها اكثر من وحدة وطلبتها تعطيني وهي عيت وجلست اشحد فيها وهي رافضة وجلست ابكي ورحت لامي وخالتي وقطعت عليهم الكلام ويسألوني وش فيك قلت ابي حلاوة ويطلبون من فلانة تعطيني وهي رافضة يقول كني اشوف رأسها وهي تهزة وتقول لا هو ليه يضربني قالت خالتي سامحيه قالت لا وعيت تعطيني يقول انك كنتي نذلة .

انا جلست اسمع واضحك بغيت اموت قالت لي ما تذكرين قلت والله ناسية الحلاوة بس الدم اذكر زي الحلم . وجلست اضحك هههههههههه
بعدين كملت تقول هو متقبلك ويمدحك وتقول انا احس اني حببتك في اخوية عشان كذا ابغى احببه فيك وتقول انتي هلالية تمام قلت ما فهمت قالت اخويه مرة قلت له نبي نخطبلك نصراوية قال لا قلت ليه قال البنت اللي تشجع النصر اكيد فيها بلى الاحسن انها ما تحب الكورة واذا كانت تشجع تكون هلالية احسن ,
النصر فريق الرجال والهلال فريق النواعم تقول استغربت منه وتقول هو دايم يتريق على واحد من اخوانها عشانه يحب الهلال .

ملاحظة / انا ادري من زمان انه يحب النصر بس ما تلاحظون انه متعصب بالحييييل يعني واحد بسنه المفروض ما يكون كذا صح والا لا .

في نهاية الجلسة قلت لها اني مترددة في الخاطب اللي جاني قالت ليه مو انتي تقولي رفضتيه قلت ايه بس ابوي ما رد عليهم للحين وهم جالسين يقنعوني اوافق .
( انا اصلا ابوي رد عليهم اني مو موافقة بس حبيت ابين لها اني انخطب )
قالت لي والله هذا مستقبلك بس نصيحة لا تستعجلين اللي في بالك بتاخذيه بس اصبري . اخوي والله مافي مثله مو عشاني اخته بمدحة لا حتى انا اعطيتك سلبياته حتى ما تزعلين مني بعد الزواج .
وبعدين قالت انا كلمت امي اننا نخطبك لفلان امي قالت كلمي اخوك بالاول واقنعيه بالزواج بعدين كلميه فيها . وتقول انا ممكن اني غلطت يوم كلمتك عن اخوية قبل اعرف رايه بس والله هو يمدحك وتقول هو في البداية مايبي طاري الزواج الحين يوم اكلمه صار يسمعني ويركز معي .

وش رايكم يا بنات تكفون طمنوني