السلام عليكم يا بنات دى اول مشاركه لي معاكم انا دايما متابعكم بس من غير كتابه وانهارده قررت اشارك -----ان شاء الله تقبلونى معاكم
انا بقالى خمس سنين متزوجه وحالتى ان عندى مرض بطانه الرحم المهاجره اكتشفتها بعد 6 شهور من الزواج وعملت عمليه لانه كان عندى كيس حجمه 8.5 وشلته الحمد لله بس بعمليه فتح بطن مش منظار والدكتور قالى ان فى التصاقات كتير على الانبوب الشمال مكان الكيس وممكن يحصل حمل طبيعى بس ربنا ما ارادش الحمد لله على كل حال
انا عملت عمليه اطفال الانابيب مرتين المره الاولى فى مصر قى شهر 10 سنه 2009 والمفاجأه انه كان فى تبويض كويس ولكن يوم السحب فوجئت بالدكتور بيقولى بعد ما فقت ان مفيش ولا بويضه سحبها لانه السائل اللى داخل الحويصله فاضى مفيش فيه خلايا وقالى انتى ممكن تكونى حاله نادره بيحصل عندك تبويض كويس بس مفيش خلايا وطبعا عشت فى رعب انى مقدرش اخلف خالص
بس الحمد لله عدت العمليه مره تانيه فى شهر 5 بس فى الكويت البلد اللى انا عايشه فيها الحين
والف حمد وشكر لله نجحت العمليه وانا حامل فى تؤام ان شاء الله حادخل الشهر الرابع بكره
تقريبا من الاسبوع الثامن للحمل نزل عليا دم بنى وظل ينزل الدم مرتين فى الاسبوع على فترات مثلا الاحد والاربعاء وهكذا الى يومنا هذا وتقريبا كل اسبوع او عشره ايام بعمل سونار علشان اطمن والحمد لله بطمن على نموهم وبسمع النبض وتابعت مع دكتور ودكتوره سوا والى الحين مش عارفه ايه سبب نزول الدم الدكتور قالى انه ممكن من المشيمه والدكتوره قالتلى انه دم موجود فى الرحم بس بره كيس البيبهات زودولى المثبتات مع التحاميل حقن وبعدين وقفوا التحاميل ودلوقتى حقن ودافستون وربنا يستر
المشكله اللى انا فيها ان الدكتوره قالتلى انا شايفه عنق الرحم عندك كويس ومقفول بش خلينى استشير زملائى فى عمليه الربط بالنسبه لك وبعد يومين اتصلت عليا وقالتلى انى المفروض اعمل ربط وقائى ورشحتلى دكتوره مشهوره هنا اوى علشان اعمل الربط عندها
لكنى رحت لدكتورى الاصلى اللى انا بتابع عنده وهو دكتور كبير ومشهور واخدت رأيه فى عمليه الربط ولكنه قام بعمل فحص داخلى بيده وقالى انسى انتى عنق الرحم عندك مقفول ومش محتاجه ليه اعملك خياطه واعرضك لالتهابات انتى فى غنى عنها
انا دلوقتى فى حيره انصحونى اعمل ايه خايف اروح لدكتور تالت واذبذب نفسى زوجى بيقولى بلاش تعمليها بس انا خايفه الوقت بيعدى ولازم اخد قرار بسرعه قولولى اعمل ايه ؟؟؟؟؟
سورى طولت عليكم
₪ ₪ تجمع يخص الحوامل بعد إجرائهن عملية أطفال الأنابيب " التجمع الثاني " ₪ ₪
متابعة النقاش، صفحة 316