تجمع المتوكلات علي العزيز الوهاب (خبرات متبادله حول مراكز تأخر الحمل بمصر)الجزء 17

ربنا يقدر لك الخير
والله انك عسل وانا قريبه جدا اطلعي علي مصر الجديده واول طياره تقابلك رايحه السعوديه اركبي فيها ولو لقيتها زحمه اوعي تتشعبطي :) استني اللي بعدها
بقي فيه حد يحمل الجنسيه المصريه مبيحبش السمك؟

يارب
والله انا اصلا اتكسفت من مها:)بتقولي جربي الاكل اللي انت متقنها وهي متعرفشي ان الاكل بتاعي كله بيقي اول اكشن او تاني اكشن يعني اول ما تزوجت قليت السمك ودي كانت تاني مره اقليه يعني قليت مره كام سمكه عند ماما
المهم تخيلي اتفه حاجه معرفتش اضبطها غير بعد عذاب وهو اني اطلع السمكه بعد ما تبداء تحمر ومعليه النار علي الزيت طبها السمكه شكلها مستوي ولكن من جوه:09:حاجه استغفر الله
اللي يضحك بالموضوع ان زوجي كان بيحاول يجاملي ويقولي جميل خخخخخخخخخخخ وانا اللي كنت بتقرف تخيلي واحده بتتقرف من اكلها
بس الحمد لله الحياه تجارب
ودي نتيجه الدلع في بيت اهلي :)

متابعة معاكم من فترة بس في صمت ..


لو تسمحوا لي اشارك ومعليش بقى لو دخلت سخنة كده على طول ..





انا مجربتش الحجامة قبل كده بس واحده صاحبتي بثق فيها حكت لي ان اخواتها الاثنين جربوا الحجامة عند دكتورة برضه ( يمكن هي نفسها الي بتحكي عليها ) ووحده منهم حملت من ثاني شهر مباشرة والثانية ( كان عندها مشاكل في الحمل ) حملت بعدها بشهرين تقريبا..

هي بتجزم ان الحجامة كان لها الفضل بعد ربنا في حدوث الحمل ..

الي فكراه من كلامها قالت برضه لها ايام محدده بس من الشهر مش من الدورة الشهرية على مااذكر .. انا مش فاكرة اوي بس اظن قالت في منتصف الشهر العربي .

كمان قالت ان لازم جدا بعد الحجامة تتدفى كويس اوي ومتتعرضش لاي تيارات هواء وكمان متقومش بمجهود ..

قالت بانك لازم تكوني موقنة من داخلك ان الحجامة دي هتفيد عشان تجيب نتيجه .. كمان قالت ان البعض بيخاف منها وكلام زي كده ولو خايفه متعمليهاش ..

اذكر اني كلمت الدكتورة وقتها وكان عندي ايامها نزيف فهي قالت لي لما تخفي من النزيف وتعوضي الدم الي فقدتيه ابقي تعالي لان مينفعش تعمل حجامة لحد عنده انيميا .. الكلام ده كان من كذا سنة ونسيت من وقتها ومرحتش ..





ربنا معاكي بس مش عارفه لو اخترتي حاجه غير المأكولات البحرية كان يبقى اسهل ..

على العموم من دلوقت ابدئي جهزي للعزومه وهقولك على بعض نقاط ممكن تساعدك ..

اكتبي ورقة بكل الاكلات الي هتقدميها حتى العصائر والحلويات وكله .. اكتبي مثلا هقدم الاول ساعة الافطار عصير كذا وبعدين السفرة هيكون عليها اكلات كذا ومقبلات كذا ثم اخيرا هنحلي بكذا ولو القعده طولت بنقدم كذا ..

هتكتبي بعد كده لسته بمكونات الاكلات دي كلها عشان تلحقي تشتري الاشياء المطلوبة .. وطبعا تفقدي كل المخزون الي عندك يعني محتاجه دقيق متعتمديش ان عندك منه كفايه لاه روحي بصي وتاكدي ان الكمية كويسه عشان متتفاجئيش .. والافضل تشتري كل الي لازمك وان فاض حاجه فكله في البيت ..

بعدين اكتبي قائمه بالترتيب هتطبخي ايه .. مثلا .. لو فرضنا انك عامله عزومه فيها فراخ مشوية ومكرونة بشاميل وبطاطس..

هتكتبي سلق الفراخ .. سلق المكرونة .. عمل العصاج للمكرونة .. عمل البشاميل .. تقطيع البطاطس ...الخ


متتصوريش الطريقة دي مفيده قد ايه في توفير الوقت في العزائم لانك بتعملي الاشياء المتشابهة في وقت واحد مثلا لو محتاجه عصاج لحاجتين مع بعض هتعمليه مرة وحده وكمان مش تتفاجئي على آخر لحظة انك نسيتي شيء ..

اي حاجه تقدري تعمليها قبلها بيوم اعمليها ... العصاج مثلا لو في اي وصفة اعمليه وحطيه في اكياس في على شكل الواح في الفريزر بس اقفي الكيس كويس بلاصق واستخدميه ثاني يوم مجمد على طول ..

برضه لو في محاشي او ماشابه جهزي الخلطة قبلها يوم وهكذا ..

ترتيب الشقة بيكون قبلها بيوم ..

مش عارفه ليه مش محبذة السمك في الصيام خاصه والسمك ميتاكلش غير سخن يعني بينقلي على آخر لحظة فمش عارفه هتلحقي تعملي الكمية كلها قبل الفطار ولا لاه ..

بس عامه لو ناوية تعملي سمك فاحسن طريقة للسمك المقلي :

نظفيه واعملي حزوز في كل سمكه من الخارج اثنين او ثلاثه خطوط بالسكين .. هاتي ثوم وفلفل اخضر وملح ودقيهم في الهون كويس اوي مع بعض او لو الكمية كبيرة افرميهم في المفرمه . .

تبلي السمك من جوا ومن برا بخلطة الثوم بعدين تكوني مجهزة توابل سمك ترشي شويه من برا ومن جوا ..

سيبي السمك يشرب التتبيله في الثلاجه وطلعيه على القلي ..

جهزي الدقيق وحطي عليه رشة ملح صغيره والسر بقى حاجتين.. اولا متحطيش السمكه في الدقيق ابدا غير قبل وضعها في الزيت بثواني .. يعني مش تغطي السمك كله بالدقيق بعدين تقلي لاه .. الي هتنزل الزيت حطيها في الدقيق وفورا على الزيت ..

السمك مش بيتقلب غير مرة وحده وعلى نار متوسطه واول مايبقى لونه ذهبي من جهة اقلبيه لغايه مايتحمر الجهة الثانية بعدين طلعيه على ورق نشاف ..

السر التاني بقى ان اول ماتطلعيه وهو لسه سخن رشي عليه كمية مناسبة من توابل السمك ..


=========

لو هتعملي رز الصيادية في كذا طريقة بس احسن حاجه هاتي كمية بصل كتير اوي وحمريها في زيت ـ يفضل زيت سمك ـ لغايه مايبقى لونها بني ..

حطي الرز المغسول وقلبي كويس مع ملعقة كبيرة قرفة وملح ..

حطي شوربة او ماجي بكمية مناسبة وسيبي الرز يستوي بعد ظبط الملح ..

عن نفسي بضيف لما سبق ملعقة او اثنين سكر محروق كراميل .. وبيطلع تحفه ..

=========

صينية السمك القراميط ..

هاتي سمك قراميط وقطعيه جزل بعدين حمريه بالطريقة العادية في الزيت بعدين هاتي كمية كبيرة من البصل والكسبرة والشبت والبقدونس .. حمري البصل وحطي عليه صلصة والشبت والبقدونس وقلبي لما تحسي ان بقى عندك تسبيكه .. طبعا بنضيف الشبت والبقدونس قبل مانرفعها من على النار بدقيقة .

متنسيش الملح والتوابل ..

هاتي صحن بايركس وصفي فيه قطع السمك وحطي عليها تسبيكه البصل ( اسمها كسبرية ) ودخليه الفرن ..


طعمه جريمه ..



بس ياستي واي خدمه ولو غيرتي رايك وخليتيها عزومه مفيهاش سمك قولي لي عشان اقولك قائمه تانية مقترحه ..

وبالهنا والشفا ..

أم عتريسة...

أهلا بيكى يا حبيبتى....منورانا يا قمر...
وأنتى خلاص من لحظة دخول بقيتى واحدة مننا...
وعلى فكرة عجبتنى اوي البداية الحامية ديه...ربنا يجازيكى كل خير على المعلومات القيمة اللى كتبتيها...وأنا اتفائلت كتير اللى كتبتيه عن الحجامة لتوتا....ومش محتاجة افكرك....أوعى تترددي فى كتابة أي كلمة أو معلومة لأي حد مننا.....
ويلا بقى عرفينا عليكى اكتر...