تجمع المتوكلات علي العزيز الوهاب (خبرات متبادله حول مراكز تأخر الحمل بمصر)الجزء 17

ماما

على فكرة علاج الامساك زى البنات ماقالوا كترى من الخس والخيار واشربى حليب ساقع

وان شاء الله ربنا يشفيكى ويعافيكى



توفى

اهدى ياحبيبتى

النسبة دى كويسة مش وحشة وبعدين القلق اللى انتى فيه ده هو اللى وحش جدا

حاولى على قد ماتقدرى تهدى اعصابك
انا عارفة ان القلق والتوتر هيفضلوا معاكى على الاقل اول 3 شهور وبعدين هيقل شوية مش هينتهى ولا حاجة لان ده احساس طبيعى لللى اتاخروا مثلنا

بس النسبة فعلا كويسة وعشان تطمنى بعد يومين عيدى التحليل وان شاء الله النسبة هتلاقيها زادت وبعد اسبوعين تسمعى نبض البيبى على خير ان شاء الله

وربنا كريم يابنتى معقولة يعنى انتى لسة خايفة وربنا اسمه الكريم؟؟؟؟

زوزو

اخبارك ايه ياحبيبتى
معلش انا مقصرة معاكى فى الردود

بس انا عاوزة اقولك ان نسبة البروجيسترون ماشاء الله كويسة بس هو دكتور عادل ماعلقش على نسبة البرولاكتين انا مش عارفة هو متاخد باى وحدة دولية عشان كده مش عارفة هو يعتبر عالى شوية ولا ايه

انتى حاولى على كل حال تاخدى دوستنكس شهرين ورا بعض عشان تظبطى النسبة على فكرة انا البرولاكتين كان بيبقى مظبوط وبرضه الدكتور بيصمم يدينى دوستنكس

والبروجيسترون لما بيزيد عن حد معين ممكن لاقدر الله يكون اندو ربنا يبعده عنك يارب عشان كده ممكن الدكتور يكون عاوز يتأكد بالمنظار

بس بصراحة انا مع فكرة ان زوجك يعيد التحليل وده ضرورى جدا عشان تطمنوا من ناحيته

وبعدها تبدأى تفكرى فى الخطوات الصحيحة ان شاء الله

وبإذن ربنا تكونى حامل قبل نهاية السنة ان شاء الله

اودى والله كانك بتوصفى حالتى بالظبط انا تقريبا كان جايلى اكتئاب بسبب الموضوع ده
بس ماتستعجليش ياقمر على الوحم واعراضه

انا عاوزة اقولك انى دلوقتى فى الشهر الخامس الحمد لله ولغاية دلوقتى بشك انى حامل ومش بطمن غير لما بروح للدكتور ويعمل لى سونار

انا عارفة ان الوحم مهما كان رخم بيطمن وبيحسس الواحد انه فى حاجة جواه هى اللى مسببة ده
بس سبحان الله ربنا عارف انتى تعبتى فى موضوع الحمل وانتظاره قد ايه عشان كده مخفف عنك اعراض الحمل شوية بس بلاش تقلقى ومش كل حاجة تربطيها بالتحربة اللى فاتت انسيها خالص او حاولى تتناسيها لاننا مش عاوزينها تأثر عليكى ولا على تفكيرك عشان نفسية البيبى بتتأثر بأى قلق انتى بتعشيه

وكده كده الاعراض هتظهر هتظهر انتى هتلاقيكى مالكيش نفس وعندك دوخة اول ماتصحى الصبح بس ده يمكن من اخر الشهر التانى وده كل اللى حصل لى الحمد لله

انتى بس حاولى تاكلى كويس جدا وتشربى حليل لانى لغاية دلوقتى بعانى من انى مش بحب الحليلب وعندى تقلصات وشد عضلى فظيع واول ماتحسى بالدوخة الصبح كلى موزة على الريق دى مش هتحسسك بالدوخة وبلاش تقومى من على السرير اول ماتصحى بسرعة استنى شوية فى السرير وقومى ودايما خلى جنبك بسكوت مالح عشان الدوخة بتاعة الصبح

وكل ماتقومى تعملى حاجة او تتحركى شوية ارجعى بسرعة نامى على ظهرك حتى لو حاسة انك كويسة
وكلى خس وخيار واشربى حليب بارد عشان تتجنبى الامساك والغازات فى بداية الحمل

وبلاش تقفى ادام الفرن او البوتاجاز فترة طويلة وبلاش تمشى فى الشمس او تتعرضى لحرارة
وبلاش تاكلى اى حاجة فيها مايونيز او لانشون او اى حاجة فيها لحوم مش مستوية قوى وبلاش الكبدة دلوقتى

انا قولتلك كل النصايح اللى كان مديهانى الدكتور فى بداية الحمل
وان شاء الله لو افتكرت حاجة تانى اقولهالك انتى وتوفى
وكل ماتحسو بتوتر او ضيقة اجروا على المصحف واقروا قرآن هتلاقوا النفسية الحمد لله اتطمنت وهديت
الا بذكر الله تطمئن القلوب؟

قوليلى يا اودى انتى فى الاسبوع الكام؟

ريمو

برافو عليكى كفيتى ووفيتى ماشاء الله عليكى

مفيش ولا كلمة تتقال بعد كلامك ده

طمنينى عليكى وعلى انوس حبيب قلب خالته

وياريت لو تعرفى اخبار شوشو ونيفو تطمنينى عليهم وتوصليلهم السلام امانة

دوعة

البقاء لله معلش انا لسة شايفة رد البنات عليكى بس مش عارفة مين اللى اتوفى مش لاقية مشاركتك خالص


توتا

انتى رايحة الحج ان شاء الله؟

انا لقيت ريمو بتباركلك

ان شاء الله ربنا يكرمك وتتبسطى فى الحج ويكتبلك دعوات مجابة هناك ان شاء الله وبجد دى حاجة كويسة جدا وهتفرق معاكى جامد ان شاء الله