تجمع المتوكلات علي العزيز الوهاب (خبرات متبادله حول مراكز تأخر الحمل بمصر)الجزء 17

كلامك صح مقدرش اقول فيه حاجة
بس برده متنكريش ان الزوجة من غير طفل لاتملك الا انها ضيفة في الدنيا دي
يبقي اه
تعيش اليوم واللحظة والسعادة وتسيب بكرة علي الله
ولما تجيلها واحدة تشاركها في عيشتها اللي تعبت في تكوينها او تلاقي حد بياخدها منها رغم انفها لانه حقه يبقي عادي جدا
فانا رايي انها متتعبش اصلا ولا تيجي علي نفسها في اي حاجة

هوه الكلام حقيقي ياريمو
بس الغلط فيه هو اني للاسف وربنا يسامحني بقدر البلاء قبل وقوعه
والصح ان الواحد يعيش يومه بما يرضي الله ويحاول يرضي اقرب الناس ليه ويحتسب وايا كانت النتيجة نعدها شكل من اشكال الابتلاء
وخصوصا ان ممكن ربنا يخلف ظننا واللي يحصل يكون احسن من توقعاتنا
واللي قلتيه علي نظرة الناس للي مسافر صح تماما
محدش بيحس بيه وفوق كل ده ممكن يطالبوه بتمن حرمانهم من طلته وكانه مسافر عشان يتهني لوحده بالعند فيهم
وزي مبحس اني مغفلة علي اي تنازل اتنازلت عنه قبل كده بخاف اكون مغفلة بدرجة اكبر علي اي تنازل تاني اقدمه
فعشان كده سالت الاسئلة العبيطة دي رغم اني عارفة الاجابات عليها

"بس برده متنكريش ان الزوجة من غير طفل لاتملك الا انها ضيفة في الدنيا دي
يبقي اه
تعيش اليوم واللحظة والسعادة وتسيب بكرة علي الله"
لا طبعا انكر .. ده كلام مش مظبوط اطلاقا .. ربنا لما خلق الناس قال وَمَا خَلَقْتُ الْجِنَّ وَالإِنسَ إِلاَّ لِيَعْبُدُونِ
فا لو رجعنا للأصل هتلاقى ان ربنا خلق البشرية كلها لحاجه حددها فى القرآن
لكن خلينا نرجع تانى لموضوعنا .. مين قاللك انها ضيفه فى الدنيا هى الست ربنا خلقها علشان تخلف للراجل ولا علشان تكون سكن ليه ؟؟ ها ردى على السؤال
ربنا قال "وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً "
وخلى بالك من كلمة لتسكنوا اليها .. ربنا ما قالش انه جعل ازواجا علشان نخلف منها
يعنى الراجل من غير الست ميقدرش يحس بالمودة ولا الرحمه الا مع الزوجة لان هى المصدر لده ولو هى مش موجوده مينفعش الراجل يعيش دى طبيعه ربنا خالقنا بيها يابنتى .. يعنى من الاخر ميقدرش الراجل يستغنى عن الست حتى لو كانت مش بتخلف ..
الراجل يابنتى محتاج يشعر بالحنان اللى ربنا وضعه فى الست علشان كده ربنا جعل الرجل ينجذب للست .. الموضوع مش متعلق بحمل ولا فلوس ولا غيرة المسألة مسألة ان الاتنين بيكملوا بعض بحاجات همه عايزينها من بعض وميقدروش يعيشوا من غيرها ..
وربنا خالقهم كده كل واحد بيكمل التانى علشان يقدروا يعيشوا مع بعض وميستغنوش عن بعض سواء بقه كان فى اطفال او لا ..

"
ولما تجيلها واحدة تشاركها في عيشتها اللي تعبت في تكوينها او تلاقي حد بياخدها منها رغم انفها لانه حقه يبقي عادي جدا
فانا رايي انها متتعبش اصلا ولا تيجي علي نفسها في اي حاجة"
سؤال بس .. هو انتى زوجك ناوى يتجوز عليكى علشان كده بتقولى الكلام ده ولا عقلك بيصور لك انه هيعمل ده فى يوم من الايام علشان كده انتى بتفكرى من دلوقتى علشان تعملى حساب يوم زى ده !!!!!!!!!!!!!!!!!!!!
مين دى اللى هتيجى تشارك مين فى عيشتها بالظبط يا وداع انتى مخك راح لبعيد اوى
فهمينى تقصدى ايه

0مش قصدي انها ضيفة في دنيا ربنا قصدي دنيا زوجهااللي هي الحياة الزوجية يعني
0موضوع الزوجة للسكن تمام بس مش كفاية
عشان كده برده ربنا حلل التعدد لانه حرام يبقي في ايدينا نكثر امتنا
ومننفزش وخصوصا انه متاح يعني لو مبتخلفيش المفروض تسهلي لجوزك انه يتجوز عشان تكوني مؤمنة بجد
0 ههههههههههه ومخي ياستي راح لانه المفروض انا اللي اخليه يتجوز عليا مخنقوش بالحب والوفاء واحرمه من شئ مهم زي ده

حاسة اني طلعت العك للي جوايا بصورة زايدة عن اللازم
وياريت محدش يتخض مني زي ريمو كده
انا مش وحشة والله ومش يائسة ولا ايماني ضعيف
بس هو شيطان بيقلب علي الواحد اسوا ظنونه وينفد صبره
بس ده لان بجد الواحد مش مستطعم اي حاجة ومش بسبب تاخر الحمل
ده اكيد
بس هو حاجة من حاجات كتير
حستازنك ياريمو عشان جوزو علي وصول
ومتشكرة ليكي وربنا يجازيكي عن التجمع ده كله خير الجزاء يارب