تجمع المتوكلات علي العزيز الوهاب (خبرات متبادله حول مراكز تأخر الحمل بمصر)الجزء 17

نانوسه .. أهلا بكى يا حبيبتى و قرار إنك تروحى لدكتور عادل هو خير قرار إن شاء الله ..
و هرد عليكى لحد ما باقى البنات ينوروا
بصى أعتقد إنك من الأفضل تأجلى الميعاد للدوره القادمه لعده أسباب ...


1- ميعاد الحجز خلص لأن الدكتور بيوصل 6 تقريبا لكن الحجز بيكون من الصبح .. يعنى بتحجزى و بعدين ترجعى على ميعاد الكشف
( روتين الحجز سخيف ومجهد بس صدقينى مش هتندمى أبدا أبدا على مرواحك بالعكس هتعرفى رأسك من رجلك وترتاحى إن شاء الله )

2- أى منشطات فى الغالب وقتها خلاص راح
3- السبب الأهم بقى إن دكتور عادل بيعتمد فى تشخيصه للحالات على أهم شئ وهو تحاليل تانى يوم الدوره .. علشان كده بيطلب من المريضات إنهم يروحوا تانى يوم الدوره العياده علشان يعملهم التحاليل اللازمه عنده فى العياده ( بتروح بعد كده معمل بجوار العياده ) و أول ما بتوصل النتايج بتدخلى تكشفى .. وطبعا النهارده مش تانى يوم فصعب تحللى

ملحوظه .. حتى لو كنتى عامله التحاليل ده قبل كده ممكن تضطرى تعيديها لأنه مش بيثق غير فى معامل معينه


و إن شاء الله يكون الخير معاه و على إيديه

السلام عليكم
ازيكم يا بنات
وحشتوني اوي والله وعلي طول كنت معاكو بس مش كنت قادره اكتب

انا الحمدلله الجنين نزل بأدويه عشان طبعا انا عملت عمليتين تنضيف قبل كده وكان مش كويس اعمل تالته
وده كان رأي دكتور هميسه
وانهرده لسه جايا من عنده وقالي الجنين والكيس فعلا نزل بس لسه فاضل بقايا بسيطه لو منزلتش المردي تنزل في الدوره الجايا وان شاء الله تنزل
ولو منزلتش هنعمل عمليه تنضيف
بس قالي ان شاء الله هينزل كله في الدوره الجديده

انا رحت لدكتور هميسه في اسكندريه عشان انا عند ماما
وقالي انا شاكك يكون عندك حاجز رحمي فقالي اعملي
d3

المهم انا كنت مستبعده بس قلت اعمله

وفعلا طلع عندي حاجز رحمي
قالي هو ممكن ميكونشي السبب 100% بس لازم نشيله كده كده بالمنظار الرحمي
عشان هو اكيد بيسبب اجهاض في الشهور الاخيره

المهم طبعاقلت كويس انه يكون السبب
وان شاءالله اعمل المنظار الرحمي ده كمان شهرين واحمل بئه وميقوفشي النبض تاني ووووووو

بعت لدكتور عادل عشان هو اللي يعملي العمليه
رد عليا رد فله
دايما ردوده فله كده

قالي اولا لا يسبب توقف نبض الجنين
وأنا لا اجري عمليه بلا داعي

طبعا مش عايزة اقولكو احساسي وقتها كان عامل ازاي

المهم دكتور هميسه قالي ممكن في الحمل اللي قبل كده البويضه الملقحه انغرست في مكان الحاجز
لسوء الحظ

وبالتالي هذا الحاجز به شعيرات دمويه ضعيفه وقليله لا تكفي لتغزيه الجنين

انا طبعا تايه جدا
بس انا ان شاء الله هستخير ربنا وهعمل المنظار الرحمي عند الدكتور اللي د.هميسه رشحهولي اسمه د.مصطفي كامل تقريبا
وهفضل علي السيدوفاج ومتخنشي والعب رياضه

هعمل ايه تاني؟


انا اسفه انش قلقتكو عليا الفتره اللي فاتت
بس انا والله مكنتش قادره اكتب

مصريه حبيبتى وحشتينى جداا يا أجدع متحديه ..
و معلش متزعليش نفسك أبداااا
بصى رأى بصراحه فى الموقف اللى حصل إنه جميل جدا إن زوجك يكون كتوم مع الناس و مش كل حاجه تتقال ... بس لو حماتك مزوداها معاكى يبقى فى الحقيقه المفروض إنه يكفها عنك وبرضه من غير ما يقولها الحقيقه .. كفايه إنه يحسسها إن كلامها فى الموضوع ده بيدايقه قبل مايكون بيدايقيك ..

وفى حاله معملش كده أو عمل كده وهى برضه ما بطلتش .. ممكن تبقى تردى عليها بكل برود ودهشه فى مره من المرات اللى بتجرحك فيها وتقوليلها .. هو ليه يا طنط حضرتك متخيله إن فى مشكله مأخره الحمل .. ؟؟ و ليه متأكده إن المشكله ده عندى أنا ؟؟ ... وما تقوليش أكتر من كده كلمه واحده ..

كده هتبقى مقولتيش سر زوجك .. وفى نفس الوقت هتبقى رميتى الشك فى قلبها فهتخاف تدور وراكى تانى لحسن تكتشف الشئ الى هيوجع قلبها

وربنا يهديهالك يارب