السلام عليكم .. كيفكم بنات حواء ..
اليوم حبيت اتكلم عن موضوع جدا مهم وكل أم اكيد بتهتم بمستقبل اولادها وبناتها ..
واتمنى تنضم اصواتكم لصوتي عشان نقدر نغير شي عشان مستقبل اولادنا ...
انا عندي بنت سنه تانيه ابتدائي .. تخيلو السنه قربت تنتهي والبنت مهي فاهمه شي .. يعني ولا كانو في درس انشرح .. كم مره خاصمتها وقولت امكن الغلط منها بتلعب او مابتركز مع ابلتها لكن انا باعطيها تمارين واختبها القاها تحل كويس .ز بس تجيني من المدرسه مهي فاهمه شي .. واغلب ايام الاسبوع اجي اشوف كتابها والقاهم ما اخدو شي تقوللي الابله غايبه .. وفجأه القة 3 - 4 صفحات الواجب .. الابله اللي تغيب تجي وماتشرح اللي فات تقولهم واجب .. وانا كل ما اروح المدرسه القى المدرسه جالسه في الفصل ورجل على رجل وتتكلم في الجوال والبنات يلعبو . .ولمن روحت واتكلمت تقوللي بنتك ماتعرف تكتب ولا تقرا , والله العظيم انو بنتي من كتر ما امليها كل يوم ممتازه في الاملاء وجايبتلها قصص تقراها ويوميا نقرا القطعه اللي في الكتاب .. وجايبتلها سبوره في البيت طول الوقت تقعد تكتب فيها وتلعب انها مدرسه .. ودامن تكتبلي رسايل وخطها واضح ومفهوم .. استغربت من المدرسه لمن تقول عنها كده .. قولتلها طيب اذا بنتي ماتعرف تقرا ولا تكتب ليش في التقرير الشهري تاخد ممتاز في كل المواد واسمها في لوحة الشرف !!! اذا بنتي مهي شاطره معناتو انتو منكم صادقين في الدرجات بتدفو البنات دف عشان لا يجيكم الكلام انتو وفي النهايه بيتخرجو البنات من الابتدائيه وهما ماهم عارفين شي ... وتخيلو المدرسات اللي اتكلم عنهم كلهم درسوني ودرسو ناس قبلي بكم سنه .. يعني خلاص المفروض تتقاعد وتدي فرصه للبنات اللي متخرجات دحين حتى عندهم اسلوب جديد للتدريس ويكونو متحمسات للتدريس .. اما مدرسات زمان خلاص مالهم خلق يريت يجلسو في بيوتهم ويدو فرصه لغيرهم من البنات الشابات اللي اتخرجو وعلقو شهاداتهم في المطبخ يا حرام .. انا ماني متخرجه ولا عندي شهاده جامعيه ولا بأطلب الوظيفه لنفسي بس بجد خايفه على مستقبل بنتي .. يعني بنتعب معاهم ومصاريف دراسه ولبس وسواق وفي الاخر ما بيتعلمو الا اللي احنا بنعلمهم في البيت .. اش لزمة المدارس اذا ...
يريت يوصل صوتي للمسؤولين ويريت كمان القى تعاون منكم عشان يتغير الوضع ونتطمن على مستقبل بناتهنا وعيالنا ( يد وحده ماتصفق )
شاركي في النقاش
سجلي الدخول لإضافة تعليق.
التعليقات
1مواضيع مشابهة
تابعي تجارب أخرى من هذا القسم.