إلى من يظنني لجأت لهذا الحل مباشرة..
أولا لست بجاهل بالأصول والطرق المعروفة من حل المشاكل العائلية لكن افهموا بارك الله فيكم ( لم أجد أمامي إلا هذا الحل لتسمع زوجتي صوتي ) يعني في بداية المشكلة كانت تافهه أو بالأحرى كانت كما يقال القشة اللي تطيح البيت فكان مشكلة صغيرة ونتيجتها للأسف أن خالي الحبيب منع زوجتي تكلمني ومنعني أكلمها ورفض هو بعد يكلمني مع أننا كنا متفاهمين على التليفون أنا وهي ثم بعد كذا وأثناء هذي الفترة كبرت المشاكل وزعلت زوجتي وبدأت تطلع مشاكل بيننا وتكبر حتى صارت هي نفسها ترفض تكلمني..
وإلى كل من يقول حكم أحد من أهلكم ويستشهد بالآية (( فابعثوا حكما من أهله وحكما من أهلها )) أقول أولا أرجوا أن تقرأوا تفسير هذه الآية لأن أكثر الناس فاهمينه غلط فالحكم المقصود بالآية ماهو أي واحد لا.. لازم القاضي أو ولي الأمر يختار الحكمين ولهم شروط معينه ثم اذا اتفقا الحكمين على شي يجب ان ينفذ حتى لو رفض الزوجين يعني مثلا اتفقا الحكمين أن يفترق الزوجين فيجب أن يفترقا ويبعث القاضي الحكمين إن لزم الأمر وأما من الباب للطاقة على قولهم فما يصلح لأن العرب من طبعهم الحمية فكلن يميل لابنه وابنته بطبعه أما أننا نحتكم عند شيخ والله هذا ودي بس زوجتي الله يهديها رافضة..
إلى كل من يقول ارسل رسائل خاصة أقول قبل لا أكتب هذا الموضوع سجلت في المنتدى بس عشان الرسائل الخاصة بس مافيه فايده ولا ترد بشي الله يهديها ويفتح على قلبها عنيده ولا ترد وعلى فكره هي ما تبي تتفاهم هي تبي ( الطلاق ) وأنا رافض أطلق حتى نتفاهم حتى ولو على الطلاق لازم أطلقها على الطريقة الشرعية (( فإن أرادا فصالا عن تشاور منهما وتراضٍ فلا جناح عليهما )) يعني قلت لها نتفاهم ونتفق ونشوف وش الأنسب الطلاق أم الاستمرار لكن لابد من التفاهم بس الله يهديها عنيده ولا هي راضية.. ويعلم الله أني أقدر أتزوج وأخليها متى ما راقت وصار ودها تتفاهم معي تتفاهم معي بس يعلم الله أني ما أبي أضرها والله يشهد على مافي قلبي لأن الناس مايرحمون في الظن (( مالهم سنة وتزوج عليها!! )) وأنا ترى فيني عيوب وعيوب كبيرة ولا يغركم تكلمي بالدين واستشهاداتي بالكتاب والسنة تراني مقصر جدا ومقر ومعترف بذنوبي..
جربت معها كل الأساليب بس الله يهديها لازالت عنيدة وتدخل وتطلع وتقرا رسايلي وتطنش حتى غزل غازلتها قصايد كتبت فيها ..
تنازلت لك يا خلي ولا فاد *** ذوقتني مرارة الظلم وذل الاهانة
حبك مذلة وزاد ظلمك زاد *** كنك فارسٍ أشهر على أعزل حسامه
صوب على قلبي واضغط زناد *** خل الرصاصة تحط بقلبي علامة
لا تفرح حبيبي وتذكر قوم عاد *** عقب العز ذاقوا حسرة وندامة
ليتك تطيعني وتترك عنك العناد *** وتدري أنه ماهو من الشهامة
تمنيت أني مواطن وقلبك بلاد *** وأعيش فيه بعز وحشمة وكرامة
وغيرها دفتر أشعاري مليان قصايد فيها بس مافيه فايده ولا هي راضيه تسمع قبل الندم وأنا أقولها والله مع أني أدري أن البلد مليانه رجال أفضل مني بس أقولها والله ان ما سمعت مني الحين تندم بعدين لأن الدنيا دواره ونعرف كيف تمشي هذي الدنيا وخبرتنا فيها ماهي قليلة ونعرف كيف تنتهي القصص وكيف سنة الله في كونه..
يا أخوات وش رايكم في وحدة زوجها رجال طول بعرض ووالله ماهو ناقصني شي ولله الحمد من اللي يكمل الشباب ولا هي مميزة بشي عن باقي الحريم وهي تعرف ومع ذلك يبذل مجهود عشان ((((( يتفاهم معها على الاتفاق او الطلاق ))))) ومع ذلك ما ترد؟ أرجو منكن أن تقدمون نصيحة عامة..
ملاحظة:-
لا يسمح بنقل القصيدة إلا بذكر المصدر لتحفظ الحقوق
محكمة عالم حواء ( الموضوع حساس أرجو المتابعة المستمرة )
متابعة النقاش، صفحة 7
