التجمع الخامس لمجموعة الصفرررررر اسأل الله الشفاااء <<حياكم الله حبيباات قلبي>>>>

امنيه الله يجزاكي خير الجزاء ويارب يرزقك ويرزقني يارب وكل محروم يارب انه سميع عليم

استغفر الله العلي العظيم

عيون دحووم معوضين خير ولا تيأسون الفيتامينات وخلطات العسل وربي يغير الحال للأحسن يارب





سبق ووعدتكم احكي لكم التغيرات اللي صارت لي من 9 رمضان إلى اليوم <<< محد درى عنك

المهم كنت أبي أقول إن ربي يسر أمري وصار عندي محمد ولدي اليتيم

من يوم الأربعاء 15 رمضان وهو بحضني وقتها كان عمره شهرين ونصف والحين صار عمره 4 أشهر وأسبوع الله يحفظه ويجعله حجة لي لا حجة علي اللهم آمين

شحرورة عشان كده سألتك كيف عيدك لأن أنا هذا أول عيد يتغير فيه روتيني السنوي طبعاً عشان عيون حمودي ومن جد اتذكرك دايم اذا صار وقت الرضعة بنص الليل :icon33: ياويلي كم مرة انعس وهو على رجولي زين ماتكرفسنا انا وياه من فوق السرير

أخذته وهو مريض يأخذ دواء للكلى وولكت امري لله وقلت مو ذنبه مرض ووحده بأخذه وبعالجه ولو لا قدر الله بعيد الشر عنه احتاج بنزرع له كلى
وقضيت رمضان كله وانا ادعي له واطلب الله يشفيه نسيت نفسي وزوجي وماكان يشغلني إلا حالته وطبعاً كنا بشكل يومي او يوم عن يوم في المستشفى تحاليل وكشف واشعة وامس بس يابنات تخيلوا من يوم الأحد 19 رمضان وأنا في دوامة المستشفيات امس الاثنين 10 ذو القعدة
الحمد لله اتضح انه سليم والدكتور اللي وصف له الدواء طبعاً في مستشفى حكومي وصفه له بناء على نتيجة تحليل المختبر والنتيجة وقتها كانت خطأ شوفتوا فضل الله ترى انا قدمت اوراقي يوم 2 شعبان يعني المفروض ان قبلي ناس كثير على مايوصلني الدور بس ارادة ربي ان المختبر يغلط وتجي الاخت اللي عليها الدور تشوفه وترفض تأخذه لانه مريض وقبل لا يكملون الدور جيت انا لان أخوي الله يسكنه الفردوس الأعلى من الجنة اتصل على دار الرعاية وسأل اذا في اطفال وقالت فيه طفل واحد بس تعالوا بسرعة وجري سويت اوراقه والحمد لله ثلاث أيام وهو عندي

بنات الكل يظن اني جبته يونسني واتسلى عليه ويقولي ماما لكن انا ابداً ماهو هذا هدفي لان مهما حصل مو مثل حملك فيه وولادته انا جبته لاني ابي كهاتين في الجنة وطلبت الله على هذي النية وجاني بعد الدعاء بيوم دعيت الله الجمعة 9 رمضان ويوم السبت رحت شفته
هذا حلمي من قبل اتزوج اربي يتيم ولا كان في بالي اني مابيكون عندي عيال لكن سبحان الله يمكن فيها خير لانها قالت لي في مكتب الاشراف لو عندك اطفال ممنوع نعطيك طفل
هذا حلمي من 8 سنوات وزوجي ماسك على كلمة لااا إلا اذا صار عندنا اطفال وقتها نكفل يتيم

طبعا زوجي ماوافق لكن انا ادرى فيه عشرة 11 سنه من النوع اللي يرضخ للأمر الواقع رحت في البداية مع الوالد الله يطول بعمره ويسكنه الفردوس الأعلى من الجنة وجبت الأوراق وعطيتها لزوجي وقلت هذي رغبتي وهذا امر واقع سكت 8 سنين بس الحين لا .. ماوافق عن طيب خاطر لكن رضخ واستسلم خاصة لما شاف ان الوالد واقف معي وسوينا الأوراق والحين روحه فيه اول ما أجي من الدوام روحي جيبي حمودي عوده على الشيل طول الوقت واقف فيه ولا على رجوله انا وياه دايم مضاربة لا تشيله لا تعوده على الشيلة حتى النومة اول اذا بنام قال تصبحين على خير الحين لااا بدري اقعدوا معي <<< يقصد لا تنومينه خخخخخخخ

بنات دعواتكم ربي يتم عليه نعمة الصحة والعافيه هو عنده مشكلة في فتحة البول الله يكرمكم نازلة تحت شوي ولازم عملية يعدلون فيها الفتحة موعده مع الجراح بشهر 2 عشان يكون صار عمره أكبر من 6 شهور وغالباً العملية تصير وهو بعمر سنة ونصف إلى سنتين ..... دعواتكم له