الف مبروك لكل اللي ولدوو .. مالحقت للحين اكمل اللي فاتني لكن بكمله وبشوف اخباركم ان شالله
جايتكم بقصه ولادتي يمكن تتحمسون وتولدون خخخخخ
يوم الاحد كنت سهرانه معاكم وقلت ماني مطوله بنام وراي موعد الصباح وكنت شايله هم هالموعد مدري شنو بتقول لي الدكتوره .. استخرت لاني كنت بطلبها تنويم وطلق صناعي ..
مانمت بالليل زين وجتني طلقتين قويات شوي ومغوص عاديه .. صحيت الصباح الساعه 9ونص تروشت ولبست وطلعت لموعدي بدووووووون ماافطر<<كانت اكبر مشكله وقت الولاده :(
قالتلي الدكتوره انتي مطوفه موعدج يومين وبنفحص عنق الرحم ونشوف لو تنويم او لا..بس قالتلي الاغلب راح ننتظر عليج 5 ايام زياده يوم قالتها كنت بصيح من الاحباط وقلت خيره هذي اجابة الاستخاره..قلتلها انا اعرف مصيري طلق صناعي لوتنتظرين شهر قالت نفحص ونشوف
سوت سونار كل شئ تمام..فحصت ماشالله فاتح 3سم..والعنق طري..سوت لي تخطيط فيه طلق خفيف جدااااا بس البيبي نايم
سبحان الله جلست استغفر وادعي جت الدكتوره قالت خلاص تنويم لان العنق طري وان شالله راح يساعدنا واول ماتروحين راح يفتحون الكيس ارتحت ان الفرج قرب
دخلت الغرفه وغيرت ملابسي وبدت اووول معاناة الحقنه الشرجيه :icon33:
جابتلي غرشتين بتفضيهم فيني وجرحتني الخايسه قعدت اصرررخ وقلت لها وخري على نص الغرشه الاولى وحلفت عليها ماتقرب مني وانا اصررخ واصيح<<بدت تشين الاخلاق خخخ
الساعه 2 الظهر جت الدكتوره وفحصتني لقته 4سم فتحت الكيس
راقبت التخطيط مافيه حركه للبيبي لانه نايم ماكلت شئ على عشاي امس..شربت عصير تحرك شوي .. لما صارت الساعه 3 ونص العصر جت امي واختي الله يحفظهم ويخليهم لي .. وجابولي معاهم تمر وموية مقري فيها بزعفران واكلت تمر وشربت من الماي والحمدلله تحسنت الحركه وزاد الطلق ..
الساعه 5 جت الدكتوره فحصت فاتح 5 سم .. وعطتني الطلق الصناعي بالمغذي .. وبدا الالم يزيد .. والكمام خرررررررررررطي مخففينه حسبي الله عليهم مايخدر الا شي بسيط .. احس بس عضلات وجهي تتخدر والا الالم احسه وقت الطلق
طلبتهم ابرة بالعضل تخدر قريت عنهاا وقد قالت عنها نونو الكويت ان ماتحسين بألم طلعة الراس ..
صرفتني الدكتوره وقالت طيب وعطتني ابره بالعضل والظاهر الي تفتح الرحم وتخيلو الالم كل ماله ويزيد
وكل شوي اصبر نفسي الالم بيخف وهو يزيد .. وفحصتني فاتح 7 سم .. والالم بدا يشششششششد
ااااااااااه مو عارفه حتى اسحب نفس بالكمام .. الطلقه من قوتهااا احسها تعصر بقلبي وصدري
((فعلا طلق الولد بالظهر ارررحم من طلق البنت بالبطن والظهر))
وكان الطلق ينزل عالمثانه احسها بتنفجر من الضغط والالم .. الساعه تقريبا 7 حسيت اني بدفع .. قلت لاختي ونادت الدكتوره جت و بكل برود تقولي اصبري لاتدفعين كأنه بيدي يعني .. وتجيني دفعه ثانيه
ويعدلوني وسألتني الدكتوره اغبى سؤال بالعالم كلما اتذكره انقههههر
قالتلي ((تبين اوسعج واخيط..؟؟)) انا شدراني قلت لها ايه
اختي قالت لامي ماله داعي لان ببكري وسعوني بس للأسف اني ماسمعت اختي :icon33: وامي ياقلبي عليها قالت مابي اقول شئ وعقب تتألمين اكثر
ووسعتني ولا خدروني عدل وربي كل شئ حسيت فيه .. حتى وهي توسع الله ياجرني يارب
ودفعت كم مره وطلعت بنوتي فديت قلبهاا نتفه الساعه 8 بتاريخ 18-10-2010 *10-11-1431<<فيه تميز خخخخ .. والقههههههههههر فوق الالم
بغيت ارفسها وانا بهذيك الحاله يعني غباء منها هي الدكتوره مفروض لو يحتاج توسع بدون ماتسأل بس وش اقول غير الحمدلله ع كل حال
وزن بنتي ماشالله 3 كيلوو .. ونتفه مرره صغيره وكل يوم تفش وتصغر فديت روحهااااااااا
وبدت معاناة الخياطه .. طلعت روحي منها طووووووووووووووولت تقريبا ساعه الا ربع وهي تخيط واحس بكككككككل شئ تعبت تعب يارب لاتحرمنا الاجر..عطتني ابره ينقال انها تخدير ولا سوت شئ
وعصرتني ونظفتني وكله صراخ وألم ولاده ثانيه خخخخخ
ولما خلصت قالتلي بحياتي ماشفت وحده مثلج بهالشد ..واني تعبتها مرره بالخياطه ولا ساعدتها وارخيت :(
طيب وش ذنبي وانا احس بالالم وانهم ماعرفوو يخدروني عدل :icon33:
يعني فررررررررررق السما عن الارض ولادتي الاولى والثانيه رغم انها نفس المستشفى بس الظاهر البكريه يضاعفون كمية التخدير ويهتمون اكثر لان من جد ببكري على اني اخذت 11 ساعه بالولاده الا ان الالم كان محتمل مع الكمام والابر التخديريه
بس يالله الحمدلله على كل حال ..شوفة البيبي بخير وعافيه تسوى ألم وتعب وشقا 9 شهور يارب لاتحرمنا هالنعمه واحفظ لنا عيالنا من كل مكروه وأرزقنا برهم وأعنا على تربيتهم
ولدت الاثنين وامس الاربعاء الظهر طلعت..سميت بنتي ديـم ^_^
والحين تعبانه مرره من الخياطه .. ودي اغمض وافتح ألقى نفسي خلصت اسبوعين من النفاس ابي جسمي يقووى شووي يارب رحمتك
ومشتااااااااقه اشرب ماي مثلج :icon33: اشبعووو كروشات من البارد خخخ
بالنسبه للأسم كادي سألتيني خخخخ
سبحان الله فعلاااااااااا الاسم بالسمااااااااااااا
وربي زوجي كان معاااااااااارض ديم من قلتله الاسم تطنز وقال انسيييييييه وحطيت ببالي خلاص ديمه هو كان مقتنع فيه شوي
وعقب ماولدت وودوني غرفتي سألني زوجي قال هااا وش نسميهاا قلتله ديم .. قال على بركة الله ديم حلوو وخفيف وأحلى من ديمه << سبحاااان اللي يغير ولا يتغير هههههه
وهذا كان أكشن الولاده حقي
والحمدلله صارت سوالف والعقبى لكم ان شالله
ربي يرزقكم الولاده السهله والهينه والميسره والسرييييييييعه
وربي مانسيت احد من الدعاء وقت الطلق ..واوصيكم بالاستغفااااااااااااااااااااااااار والدعاء وقت الطلق
كنت اردد وقت الطلق (( اللهم اجعل ولادتي بردا وسلاما كما جعلت النار بردا وسلاما على ابراهيم))
ورددت سورة الزلزله والشرح ومريم ومخليه التلفزيون على قناة المجد
وشغلتلي اختي بالايبود سورة آل عمران
والله يسخر لكم الطيبين من خلقه وييسر لكم الولاده ويبلغكم شوفة اطفالكم بخير وعافيه يارب