بسم **** الرحمن الرحيم
ازيكم يا بنات ويا ستات حلوات
انا عارفة انى اتاخرت عليكم ف الرد لكن غصب عنى انا لسة مشاركاتى مجبتش ال 50 مشاركة
فليا كل يوم تلات مشاركات بس هحاول اكتبلكم كل اللى انا عاوزاة ف مشاركة واحدة علشان اوفر بقية المشاركات لاستفسارتكم ومتزعلوش منى لو معرفتش ارد على كل اسئلتكم النهاردة ودة لان مشاركاتى مش هتسمح
بما ان اول شكوة كنت على الشعر نكلم ف الشعر وبعض الوصفات المهمه وبعدين نبقى نختار حاجة تانية نكلم فيها بعد ما نخلص مشاكل الشعر
نصائح مهمة يا قمرايه منك ليها لازم نتبعها الاول:---
1_ ف فترة علاج الشعر لازم تبعدى عن الصبغات والسشوار سيبى شعرك يرتاح شوية يا حبيبتى
زمانة بيدعى علينا من كتر اللى بنعملة فية اعتبرية ابنك ضناكى هتخافى عليه وتحافظى ولالاالشعر كائن حى بيحس ويتنفس زية زى اى عضو ف الجسم
2_ جربتى تضفرى شعرك وتسيبية يتنفس اما بتلمى شعرك طول اليوم هيطول ازاى محتاج يتحرك علشان يكبرف البيت بدل ما تلمية بتوكة ضفرية يوم ورا يوم هتحسى اانة بيطول لانة كدة مفرود وبيتحرك
3_ ارمى اى فرشة او مشط بلاستيك الخشب احسن
4_ كل تلات ايام كدة زى الشطورة تجيبى حلة وتحطى فيها التوك والفرش مع شوية ديتول كدة وتغسليهم باة وتشميميهم الشمس كدة
5_بلاش حمامات الكريم الرخيصة ام عشرة جنيه دى وعليها عرض لالالالالالالالالالا
كلها كيماويات بتشوفى نتيجة ساعتها لكن بعدين بتحسى شعرك ناشف ومتقصف هاتى كريم نضيف مش مشكلة مش خسارة ف شعرك وهقولك طريقة عمل حمام الكريم ف خطوة لواحدها
6_ حمامات الزيت مفيدة لكن مش معنى كدة انك تغرقى شعرك بالزيت لا يا حبيبتى الفروة هى اللى بتتغذى مش الشعر وهقولك بردة على حمام الزيت دة
7_ بالليل اوعى تنامى وتسيبى على شعرك طرحة لا سيبية ياخد راحته
8_انا مش بفضل الشامبوهات للشعر مش بحبها كلها كيماويات فية صابونة حلوة اوى اسمها نابلسى شاهين بستعملها هى بزيت الزيتون حلوة اوى هتقوليلى طب والقشرة هقولك ليها حل حلو اوى
مشاكل الشعر
طبعا كلنا بنعانى من مشاكل مختلفة للشعر االمشكلة فينا يابنات اننا عاوزين نحط حاجة ونبص نلاقى شعرنااتحسن لا مش كدة الواحد لازم يصبر لحد ما يبان النتيجه انا نفسى بعالج شعرى بقالى اكتر من تلات شهور ولسة بدات اشوف نتيجه ترضينى الصبر يا حبيبى اوك
مشاكل الهيشان :----
اول ا احنا اتفقنا ان احنا هنبتعد عن السشوار اوكلان كل ما بتعملى شعرك بياخد عليه ومبقاش بيجيب نتيجه وبيقصف الشعر ويبقى هايش اكتر واكتر
جربتى وانتى بتعملى وصفة للشعر تحطى عليها حته قشطة هتقولى ياى وبتاع لا لو شفتى النتيجه هتقولى الله ايه الحلاوة دى هتلاقى شعرك طرى وحلو كدة ونايم مش هايش
بعض الوصفات لنعومة الشعر ودى انا مجرباها عننفسى
1 عسل اسود وتحطية ف طاسة لحد ما يغلى كدة مش هياخد دقيقة واطفى النار وحطى اى زيوت عندك زيت زيتون وزيت سمسم زيت خروع وزيت السمسم دة ضرورى اوى لانة بينعم الشعر
ومتنسيش معلقة القشطة اللى اتفقناعليها وزوودى الخلطة شوية مية علشان متبقاش ملزقة
وامسكى يا حبيبى خصلة من شعرك وحطى عليها الخلطة والبسى بونية للشعر اوكيس والبسى ايشارب لمدة ساعتين على الاقل واغسلى شعرك بالصابونة اللى قولنا عليها
2_ زيادى وبيضة والزيوت الى عندكوحطيها على شعرك
3_ جربتى الاملج هتشترى املج من عند العطار وتحطية ف شوية مية وتغلية وتاخد المية بتاعتة وحطيها على شعرك مع الوصفات اوقبل ما تغسلى شعرك بمص ساعه كدة هتلاقى شعرك طرى وجميل
وصفة التقصف:---
الموز رائع للتقصف جربية مرة واتنين هتحسى بالفرق وو**** وانا ماشية بية
هتجيبى موزة وتحطيها بالخرط وتصفيها بالمصفة علشان بقايا الموز متمسكش ف شعرك وتحطى عليها شوية زيوت وحتة القشطة وشوفى وادعيلى
وصفة التساقط والقشرة
هاتى زعتر من عند العطار واغليه وصفية وحطية ف بخاخة كدة ورشى فروة راسك الصبح وبالليل
القشرة هتروح والتساقط هيقل ودة انا ماشية بية على طول واستغنيت عن شامبو القشرة
وصفة لتطويل الشعر:---
جربتى ورق السدر ورق هاتيه من عند العطار واغلية وخدى ميته وحطيها ف بخاخة ودواومى بردة كل يوم رشى منة فروة رايك هيجيب نتيجه لان شاء ****
اهم حاجة ا بنات الاستمرار والنيه لله كدة والصدقة تصدقى بنيه ان ربنا يشفينا ويكرمنا ف شعرنا باذن **** اوك اتفقنا
ومتزعلوش منى لانى مش عارفة اشارك علشان مشاركاتى لسة موصلتش 50 مشاركة
مخطوبة, متجوزة, انسة ادخلى يااوختى انتى لسة بتقرى (( تجميع لكل حاجة عرفتها من النت ))
متابعة النقاش، صفحة 2