السلام عليكم ورحمة الله
عشر مباركه علينا وعليكم .... الله أكبر .. الله أكبر ... الله أكبر لآإله إلا الله
بالبدايه أعرفكم من هي غروب ... أنا معلمه ..غير متزوجه .. على قدر متوسط من الالتزام .....شخصيتي طيبه مررررة وعلى قولتهم فيني طهارة قلب .. ولله الحمد ماأعرف شي اسمه حسد ولاغيرة يمكن تصل لحد اللامبالاة والكل حواليني مرتفع ضغطه مني ماأحس نهائي بالغيرة ولا يهمني من اصله وطبعاً يأثر هذا على حياتي ,, أنا قلت كذا عشان هنا ابقولكم قصتي مع وحده كنت أعتبرها مو بس أخت إلا أغلى من اخت ,,
صديقتي هذي معلمه معي بنفس المدرسه .. نقلت عندنا من فترة .. وبالأول كانت معرفتنا سطحيه ومع الأيام تعرفنا على بعض أكثر ..زميلتي هذي متزوجه لها بنتين وماقدر الله لها تجيب غيرهم عندها مشاكل وتسقط وتعبت من العلاجات وماخلت شي ماسوته بس ماالله كتب بناتها الآن كبار بسم الله عليهم .. المهم بعد تقريبا عشرين سنه زواج ومع البنتين قرر زوجها يتزوج عليها على كلامه يبغى ولد يارثه لأنه مليونير .. وفعلا تزوج وانبسط الرجال حاله حال الرجال .. المشكله بصديقتي طبعا قالت لي الخبر بأول يوم داومنا بعد الاجازة إن زوجها خاطب طبعا انصدمت وانقهرررت ...الخ وهي تدعيله بالتوفيق وتقول حقه ... مرت فيها أيام تدخل عندي بمكتبي بالمدرسه تبكي بكاء يقطع القلب وأنا بس أصبرها وأضحكها .. نحفففففت مررررة بعدما كانت دبدوبه صارت جلد وعظم سبحان الله تحولت بكل شي ...كانت نكتيه حبوبه مجلسها ماينمل صارت بس ساكته كأنها بغيبوبه .. لحد الآن الوضع متوقع .. بدت تكثر بينهم المشاكل وبدت تتذكر سيئاته بعدما تزوج ,.. على كلامها كنت نايمه وصحيت ... تقولي مايعرفنا لاأنا ولابناته لابمصروف لا بسفر لا بمشاوير كل مشاويري مع سواقين وهو مجرد اسم .. هو كان كذا من زمان بس كأنها بدت تنتبه لأخطائه .. المهم مع مشاكلهم المستمرة طلبت الانفصال هديتها وقلت لا كلش ولا الطلاق قالت لا ماأبغاه ياغروب أكرهه .. باختصار شبت نار الغيرة داخلها .. للأسف نفذت رغبتها وانفصلت وطلعت مع بيتها بالبدايه عند أهلها ثم استاجرت دور وسكنت قلت الحمدلله لعلها ترتاح وترجع نفسيتها تزين ... ألي صار العكس .... L صارت بعد الانفصال انسانه ثانيه صارت عدوانيه مرررة وغيوووور لدرجه فظيييعه ..والمضحك المبكي إن عدوانيتها صارت أكثر وحده لها نصيب منها أنا !!
صارت تغلط وتجرح بالكلام وياويلك ياغروب تخطينها !! تجرحني كذا مرة بكلام مادري ليش تقوله ؟!! أنا أرجع أذكركم أنا طيبه وحبوبه مرة ومعها بالذات أخدمها بعيوني لو تبي ...صارت تخربط ويوم بعد يوم حسيت إنها زودتها وبديت أحس بالجراح تتكاثر منها وهي ماكأنها تكلم مع انسانه لها مشاعر أقولكم مواقف ...
قبل كم يوم كنا قاعدين أنا وهي نسولف قامت قالت المديرة طالبه منها تجيب خطاط للمدرسه يسوي شغل تقول لي هي قلت لها لا والله مالي شغل بأحد حتى لو غروب طلبت مني راح أقولها لا!! وتكمل أنا مالي شغل بأحد أنا مو ملزومة بأحد ومن هالكلام رديت عليها قلت من قالك إني أبطلب منك وأنتي عارفه من أنا طوال هالسنين ماقد طلبت منك شي لأن طبعي ماأحب أطلب من أحد إلا بالشديد القوي .. هزت راسها موافقتني وهي عارفه داخلها إني ماراح أطلب منها شي ... للعلم عندها سواق ومرة آخذه راحتها بالمشاوير والطلعات عكسي تماما ماعندي لاسواق ولا أخو ولا أبو أسند عليهم الظهر وماشيه حياتي الله العالم وشلون أتعب عشان أحصل أروح للسوق مرة كل شهرين أجيب لي اغراض ابوي جدا متعسف ومسيطر ولايسمح بالسواقين واخواني كلن مع زوجته ... نرجع لسالفتنا هي عارفه ظروفي ومع كذا تقول هالكلام وكأنها تتباهى بعدم خدمتها لي قدام الناس مع إني عمري ماثقلت عليها ولا طلبت منها شئ من اساسه بس مادري ليه تعطي الناس فكرة إنها هي ألي خادمتني سابقاً والآن راح تقطع خدماتها عني !!! وهذي مو أول مرة تضرب المثل بغروب كل ماصار شي أو شغل قالت لي إني قلت لفلانه والله لو غروب وهي غروب طلبت ماراح أعطيها !!! حاولت بالموقف الأخير أرد شوي من كرامتي بس ماأحس إنها عرفت إنها تجرحني ...
موقف ثاني ... صارت عقب انفصالها معي شبه غريبه ,, يعني ماتتكلم معي نهائي إلا إذا صادفتها على قهوة مع باقي المعلمات فسواليف عامه ... اما زي أول تجي لحد مكتبي وتسولف مستحيل أنا حاولت كذا مرة ادخل مكتبها أسولف مو بحياتها لا هالأمر ماتبي أحد يفتحه وأنا منفذة رغبتها عمري ماسألتها وش أخبار زوجك تصدقون للآن مادري هو طلقها أو مازالت معلقه !! كله أخاف تزعل من سؤالي ومع هذا قلت يالله نفسيتها تعبانه وماراح أفتح جروحها , صارت ماتكلم معي نهائي وكاني السبب بانفصالها ,, كانت تكلمني بأيام الاجازات عالجوال وتعايدني وتبارك وكذا صارت مستحيل بس مجرد رسايل حتى لو تبي شي ضروري للمدرسه ترسل لي رسايل .. أول السنه أرسلت لي رساله بامر مهم يبي أخذ وعطا قمت دقيت عليها وردت ,, قلت بدل الرسايل خلينا نتكلم وانا اضحك قالت لا الرسايل أحب لي ... ومن عقبها عمري مارفعت الجوال عليها ...مع إنها تكلم باقي الزميلات تطمن على صحتهم ومن هالكلام وأنا بس رساله كيفك اليوم وبس !!! والله مادري شتبي حسيت نفسي علة مثقلتها مع إن الواقع مايستدعي كل ردة الفعل القاسيه منها ... يعني مكالماتي خلاص منهيتها من يوم عرفت مالها رغبه تكلم صرت أتعامل معها بالرسايل وغالبا هي ترسلي ياتطلب حاجه ياتسأل عن شي واجاوبها ,, زيارات مابيننا أي زيارات لا قبل تنفصل ولابعد .. مع إنها تطلع لجمعات المعلمات بس ولا مرة جت تشوف أمي المريضه مع إنهم قبل فترة اجتمعوا المعلمات يزورون أمي رفع ربي قدرهم هي ماجت ومو أول مرة يجون وهي لا مع إن عندها سواق !! تعطي المعلمات فكرة إني أتلزق بها وأموت بترابها وهي مطنشتني ...أنا ابعدت عنها بالفترة الأخيرة صرت حتى لما نكون ماعندنا حصص أنا وهي مانجلس مع بعض أنا أروح لمعلمه فاضيه أسولف معها أو أروح لمكتبي أشتغل وهي قاعدة يامع المديرة يابلحالها بمكتبها صرت ماأدخل عندها زي أول ...
هي غيورة مرة من المعلمات تقولها لي بصراحه أنا ياغروب أموت ألف مرة لما أشوف أزواج المعلمات الظهر عند الباب بسياراتهم وأنا مع سواق ... قلت احمدي ربك وضعك أحسن من وضعي مليون مرة قالت بإيش أحسن !! قلت أقل شي تقضين أمورك ماحد يمنعك هذي نعمه اسأليني أنا عن البهذله ألي ألآقي لو أبي قلم مالقيت من يجيبه لي .. ماردت ... قالت مرة أنتي الوحيدة ألي أحس نفسي أحسن منك قصدها إني ماتزوجت والجميع متزوجات !!! طبعا ضحكت وقلبتها تنكيت !!
بالفترة الأخير مصختها مرررة صارت لو أقول السلام عليكم ردت بسرعه وغيرت مكانها ...كأني بآكلها ... ماتبي تسولف معي ولا حتى توقف بجنبي كأنها متفشله مني !!! أنا بعد ماصرت أعطيها وجه .. أنا لو جت ناحيتي وقت كنت واقفه غيرت مكاني نفس حركاتها صرت أسوي لعلها تحس !!
مادري ش الحل معها .. قبل فترة وحده من زميلاتي برا المدرسه اتصلت تبغى رقمها عشان تسأل عن بنتها قمت اتصلت بها أستاذنها أعطيها الرقم أو لا ... وقبل يومين صار العكس وحده من الامهات متصله بها تبي رقمي عشان بنتها قامت عطتها اياه دون استئذان مادريت إلا الرقم الغريب يدق علي قلت من وين جبتي رقمي قالت من فلانه ألي هي صديقتي سابقا ... جينا المدرسه من بكرة بخاطري عليها مارحت أعاتبها قلت يالله هي ماتبغاني أكلمها ... جت هي عندي بمكتبي قالت كلمتك أم فلانه قلت ايه ليه تعطينها رقمي والله بمنتهى الذوق أتكلم ... مادريت إلا زعلت وطلعت ولاعاد كلمتني لين وقت الانصراف مريت من جنبها أمس آخر يوم دوام قلت مع السلامه يا ..... ردت مع السلامه من تحت ضرسها ثم هزت راسها مثل ألي متندم على شي قلت شفيك ؟ قالت مافيني شي .. طنشتها وطلعت .... قلت بقلبي والله ماجرحتها ولا قليت أدبي معها ولا رديت ربع جراحاتها وزعلت !!!!
مادري ش التصرف السليم معها ؟؟ تعبت والله تعبت منها مع اني مطنشتها بس مافكتني من كلماتها المسمومه بين فترة والثانيه مادري شسويت لها عشان تسوي بي كذا !!! أبي أرائكم:06:
شاركي في النقاش
سجلي الدخول لإضافة تعليق.
التعليقات
25- والكاظمين الغيظ والعافين عن الناس خلي هاذا شعارك مع كل من تتعاملين معه واضح انك حساسه تعلمي ماتفكرين في اي مشكله او موقف يقهرك الا وقت حدوثه وتناسيه والله اني اسوي كيذا وارتحت ليش افكر في ناس مافكرو فيني عامليها بالحسنى وكن شي ماكان بعض الناس يستغلون الاخرين في افراغ قهرهم فيهم فلا تعطينها هالصوره عن نفسك
- لحظة لحظة ان فيك الجراة اساليها فيه شي؟ لكن تحسسين نفسك بالذنب دائما هذا غلط وانك لاشفتيها عشان لاتضايقينها غيرتي مكانك طيب ليه؟؟
يمكن يمكن هي غيرت طريقتها معاك لانها لاشافتك تذكرت معاناتها اول وبكاها وفترة هي تبغى تنساها
فترة حست انها مكسورة فيها
لكن نصيحة لاتعذبين نفسك بشي انتي ماسويتيه وغير موجود اصلا - شوفي ياقلبي يبغى لك جلسه مصارحه معاها بس ماينفع بالمدرسه
انا زيك معلمه وماينفع هالكلام بالمدرسه
اتصلي جوال وقولي كل اللي بخاطرك
ماتدري يمكن احد ناقل كلام عنك بالكذب وبعدين اذا قلتي اللي عندك وشفتيها ماتغيرت
اسحبي نفسك والله بترجع لك - اختى طنشيها نهائي ولا تدينها وجه بالمره ولا يبان عليكي مهتمه ولا معبرتهاوسويلك جو مع زمياتك واقلبيها ضحك ةسوالف ولا حتي ثطالعينها واعنبريها مو موجوده ولا يهمك ومع مرور الايم حتحس بغلطتها يوم يتخلي عنها الكل لان مثل هالشخصيلت ممقونه من المجتمع ولما تلقي نفسها وحيده حتراجع نفسها وتعرف غلطها والله يهدينا ويهديهاانتضر ردك بعد السلوب الجديد معها
- الله يكون بعونك حبيبتي
مواضيع مشابهة
تابعي تجارب أخرى من هذا القسم.