شاركي في النقاش

سجلي الدخول لإضافة تعليق.

التعليقات

2,025

  1. @ashtkt_alyk

    أم أنس....
    انتى فعلا يا حبيبتى فى موقف صعب...وربنا يصبركم جميعا...فراق الأم مش حاجة هينة...
    بس برده لازم نفكر بالعقل.....زي ما المفروض تراعى أخواتك يا قلبى...برده جوزك ليه عليكى حقوق...ومهما كان مقدر الظروف مش هيستحمل بعدك عنه كتير.....وكمان أكيد هيحب يطمن عليكى و على حملك....
    وكمان متنسيش انك لو طولتى فى مصر كمان كام شهر ممكن متقدريش تسافري و تضطري تستنى هنا للولادة....

    يبقى رأيي اننا نجمد قلبنا شوية و خصوصا يا حبيبتى إن أخواتك ما شاء الله مش صغيرين...دول زي ما فهمت على وش جواز....
    ولازم نفتكر ان الحزن هو الحاجة الوحيدة اللى بتتولد كبيرة و مع لوقت بتصغر...و لازم الانسان يساعد نفسه....
    فانا بانصحك تسافري علشان متلخبطيش أمورك انتى و جوزك...وخصوصا ان ما شاء الله اخواتك مع بعض و مع والدك أكيد هيقووا بعض....وممكن تبقى تتابعيهم يوميا من على النت صوت و صورة...وربنا يقويكم يا حبيبتى

  2. @ashtkt_alyk

    عيب و انا امك...
    انتى منورانا...[س للأسف يا قلبى معنديش معلومة عن الموضوع ده....
    متهيألى اختنا سارة لما تدخل تقدر تفيدك أكتر....وربنا يوفقك

  3. @ashtkt_alyk

    ماما1983
    ايه يا بنوتات اللخبطه ده كلها في موضوع دكتور عادل بصوا انا قررت اخرج من صمتي واتكلم وكلكم عارفين اني دكتوره صحيح لسه بدري عليا وانا مش حاجه قدام دكتور عادل بس برضوا راي ليه قيمه علميه صح اولا واهم نقطه لازم نفهمها ان الطب مذاهب زي الفقه …
    ربنا يبارك فيكى يا ماما و يفرحنا بيكى عن قريب...
    أنتى طول عمرك يا حبيبتى و أنتى آرائك فى الملف قيمة و لها وزنها..
    واوعى يا حبيبتى أنتى أو أي أخت هنا تترددي فى كتابة أي رأي أو تعليق أو نصيحة حتى لو اتهيألك أنه هيزعل....الفايدة اللى هتيجى من ورا الرأي الأمين و النصيحة المخلصة هتبقى طعمها أحلى و أجمل من أي زعل أو انتقادات...
    وان شاء الله ربنا ميجيبش أي حاجة وحشة و لا أي زعل بينا أبدا....

    تعرفى يا ماما...كلامك عين العقل ...بس فكرنى بحاجة ممكن تكون غايبة عننا....وهى ان فيه ناس طباعهم ان من كتر التفوق و الرغبة فى المثاليه...بيبقى عينهم دايما على العيوب و توقع الأسوأ علشان التحسب ليه...وده للأسف بيخلى الواحد مهما كان الوضع حلو ممكن يبقى خايف من اي احتمال سئ و حتطة قدام عينية....ده طبع صعب و قاسى بس للأسف موجود..وهتلاقوه عند كتير مننا..

    تعرفى ..اللى خلنى اقولك كده علشان نعذر نفسنا و اللى قدامنا,,,ان كلامك فكرنى بنفسى لما كنت فى الثانوية العامة...كان مجموعى 98.6% و بحسابات الأيام ديه و باضافة المستوي الرفيع كان مجموعى معدي ال 100%...وكان يفصلنى عن الاول على الجمهورية 6 درجات فقط....(يعنى اختار الكلية اللى انا عايزاها وا نا حاطة رجل على رجل) ...ومع ذلك تفتكري انى كنت مرتاحة وا نا باحط الرغبات....انا حطيت كلية الألسن فى الأول...ومع ذلك كنت كل ما احط رغبة بعدها احاول اهيأ نفسى انى اتقبلها فى حالة لو الكلية الى انا عايزاها مجتليش...ومش هتصدقى فضلت كده لحد ما وصلت للرغبة ال 20....للدرجة ان اللى كانوا قاعدين معايا اتريقوا عليا لما شبعوا على خوفى ده....

    ده ساعات بيبقى طبع فى الواحد و مش مقصود...خصوصا لما بيبقى التعامل فى حاجة مهمة و مصيرية...
    مش عارفة ليه قلتلك الكلام ده...بس كلامك خلى الموقف ده ينط فجأة قدام عيني....يلا خليتينى افتح الذكريات

  4. @ashtkt_alyk

    إيه ده....انا لوحدي خالص كده ليه...
    يلا سلامى للجميع...وخصوصا الغطسانين.....يلا اظهروا بقى علشان وحشتونا...

    سارة و زينب...انتم فين....واحشنى كتير أوي يا قمرات

  5. @rmal_8

    فاطمة الزهراء912
    طبعا انا مش عارفة انا غلطت فى اية لكن انا عايزة اوضح حاجة مهمة انا يا جماعة لم اعيب فى شخص دكتور عادل او علمة ومقدرش اعمل كدة مع اى شخص لكن من واجبى انى اوضح السلبيات اللى انا لقيتها معاة وقلت ان دا مش تقليل من علمة وان اكيد العيب مش ف…
    ما هو طالما مش شوشو اللى مزعلاكى فى اللى اتلكموا يا طمطم ولا اودى .. يبقى مفيش غير ريمو يافاطمه ولا ايه ...
    بقه تقولى علينا ملقيتيش عندنا الصدر الرحب .. تقولى علينا كده واحنا كلنا بنحبك ولما بتغيبى بنسأل عنك ولما بتقعى فى مشكله بنجرى عليكى ولما بتفرحى بنفرح من قلوبنا ليكى .. تقولى علينا كده وانتى اللى بييجى فيكى كانه فينا بالظبط .... وتقولى علينا الكلام البايخ ده .. صدميتنى فيكى ولاول مرة تزعلينى منك وتوجعينى اوى كده يافاطمه ..
    بس انا مش هعاتب كتير فى الكلام ده لانى عارفه كويس حالتك النفسيه يعنى هقدّر ومش هتقمص منك ولا هصغر عقلى واقول عيب عليها ,, لا هقول يمكن مكانتش تقصد وهحط لك العذر لانه واجب علينا ..
    انا هكتفى بس بإنى اعاتبك بس مش على الكلمه دى لا على الكلام اللى قبلها .. ولو تسمحى لى انتى بقه توسعى صدرك لكلامى وتكونى مثل اعلى لينا فى الصدر الرحب اللى ملقيتيهوش عندنا ... يعنى الزعل مرفوع ماشى ياطمطم
    ولازم تعرفى انى هقول الكلام ده مش لانى هطرشق منك ولا علشان عاوزة الم ادوات التعذيب واركب اسرع تك تك عملته الهند واجي لك ... لا .... انا هقوله علشان هو جوايا وعلشان انا صريحه ومبعرفش اجمل صور مش جميله فا كلامك مكانش جميل وهرد عليه منه اتفقنا ..
    ولازم تعرفى ان شكلى دلوقتى بسبب كلامك كده :mad:
    بس بعد ما هطلع اللى فى قلبى هيبقى كده :)
    يعنى هقول الكلمتين وهبقى صافى يالبن وانتى كمان عليكى تكونى على نفس المستوى

    اولا انتى قولتى .. معرفش انا غلطانه فى ايه .. الحقيقه انا اللى مش عارفه انتى جبتى منين غلطانه دى .. حد قال ياجماعه طمطم غلطانه .. مين جاب سيرة غلط انا مش شايفه اى غلط اطلاقا فى كل الحوار من اوله لاخرة بالعكس انا كنت سعيده جدا ان النقاش كان على مستوى عالى من الحيادية والامانه والصدق من جميع الاطراف سواء اللى قال كلمه ايجابيه فى قصتك او اللى قال بشكل سلبى يعنى كل البنات ماشاء الله عليهم كانوا اخر اخلاق وحيادية وانا احترمتهم جدا ان كل واحد حكى قصته بصدق حتى ام اياد لما اتكلمت قالت انا بقعد لوحدى كتير ويمكن كلامى السلبى يكون بسبب التفكير الزايد يعنى مفيش بعد كده بصراحه .. وتقولى غلط يافاطمه ... طيب بالنسبه ليا انا هتكلم على نفسى افضل .. لما كلمتك فى مشاركتى انا غلطتك فى نقطه واحده بس اللى هى انك سمعتى كلامه فى مسأله اعادة التحليل بنفس العينه ... يعنى حتى مكنتش واخده صفه ضدك مثلا ولا بقول ايوة صح .. لا انا لما شوفت نقطه تستدعى نقف عندها وقفت وقولت فى خطأ هنا ... مش عارفه يافاطمه مين بالظبط اللى عاوز يعرف هو غلط فى ايه ... انا ولا انتى ... بس بالنسبه لى الغلط الحقيقى هو اللى الكلام اللى انتى قولتيه فوق ده

    ثانيا .. انتى قولتى ان فى هجوم ... هجووووووووووم !!!!!!!!!!!!!! اكيد بتهزرى .... مين بالظبط هاجمك يا فاطمه وهاجمك فى ايه ولحساب مين .. كلامك مش مظبوط ومش منطقى .. لاننا كلنا هنا محدش ليه مصالح شخصيه مثلا مع د عادل ولا حد بياخد منه فلوس علشان الكلام الحلو اللى بيقوله فى حقه .. انتى طلبتى الكل يتكلم مش كده وفعلا كل واحد حكى تجربته .. مع العلم انى ولا حكيت ولا قولت حاجه عن تجربتى معاه واعتبرت ان الكل عارف حكايتى فا قولت مفيش داعى للإعاده .. وفى ناس حكت تجارب كويسه وفى ناس قالت تجارب وحشه جدا وكان الله فى عونهم عليها ... يعنى مش عارفه بالظبط الهجوم اللى تقصديه ده فين .. حتى باقى البنات لما ردوا عليكى كل واحد بيسأل فين الهجوم ده ... واضح انه فى خيالك انتى بس لاننا كلنا بنسألك نفس السؤال اللى هو ليه بتقولى الكلام الغريب ده
    (ها قولنا ايه .. الزعل مرفوع)

    ولو اتكلمت تانى عن مشاركتى يافاطمه .. لو انا اللى تقصدينى انى بهاجمك لا سمح الله مكنتش قولت لك انى متفقه معاكى فى قرارك ومكنتش قولت لك كملى على اللى انتى مقتنعه بيه لانى كمان معاكى فيه علاج وخسسان وفيتامين وسيبك من العمليه ومكنتش قولت لك انى مستغربه من كلامه لانه بيتعارض مع نفس الكلام اللى قاله قبل كده ان مينفعش عمليه والهرمونات مش تمام وان فى حالات كتير زيك حملوا بالعلاج وان حالتك مش سيئه اوى كده ... وبعد ده كله تقولى هجوم ... فين يابنت الحلال الهجوم ده ... ! ... ده انا حتى لما قولت لك عرفينا العيوب اللى شايفاها انتى فين علشان نتفاداها لما ننصح واحده انها تروح له نبقى عارفين عيوبه ايه علشان منقولهاش روحى وخلاص .. يعنى حتى لما قولت لك اتكلمى كان من باب التوضيح للكل وانه ممكن جدا اللى فاكرين انه كويس يطلع عكس ده وده قولته لك فى مشاركتى ليكى وكررته تانى فى مشاركتى لبوبا يعنى كلام اكدت عليه مكنتش بقولك متشتتيش البنات وخلاص لا كان كلامى واضح جدا انى عاوزاكى تخرجى اللى عندك بصدق علشان الكل ياخد باله برده ان فى عيوب وان محدش ملاك ...
    طيب انتى بتقولى فى هجوم .. هل حد فينا كلمك كلمه جارحه مثلا خلاكى تقولى كده .. حد فينا صادر على كلامك ولا رايك بشكل مستفذ .. حد فينا لاسمح الله قال كلام مش تمام يعنى او منعك تتكلمى بصراحه .. مانتى فهمينى بالظبط الهجوم والغلط فين علشان مااتجننش وعلشان اعرف ان كلامك مبنى على اساس مش مجرد احساس جواكى

    جينا بقه لموضوع السكوت .. انتى شايفه ان السكوت ده شئ ايجابى يافاطمه ..ماشى ياستى انتى حرة بس لازم تعرفى حاجه مهمه اوى اوى .. ان اى حد من البنات كلف خاطرة وقرأ مشاركتك ورد عليكى ولا اهتم بيكى وبمشكلتك او تعب نفسه وفكر فى حل ليكى ولا نصيحه او حتى كان بيدعى لك فا اكيد اكيد اكيد مكانش هدفه سئ واكيد بيكن ليكى شئ جميل جواه .. الشئ الجميل ده اللى انتى قلبتيه بسوء نيتك لشئ قبيح .. ووصفتيه انه ضيق صدر مننا واننا بنهاجمك ... طيب بالله عليكى ينفع كده .. ينفع حد يبقى بيحبك وخايف على مصلحتك وحب يقولك نصيحه تقومى تقلبى الدفه عليه بالشكل ده وتقولى له بتهاجمنى .. وهل جزاء الاحسان الا الاحسان ... حتى لو النصيحه معجبتكيش قدرى ياستى انه فى النهايه نيته كويسه اومال ايه اللى خلاه يهتم ويسأل عليكى ويتابع اخبارك ايه مصلحته فى ده غير ان جواه شئ جميل ليكى ...
    بصى يافاطمه الكلام اللى شوشو وماما قالوه بصراحه فيه المفيد كله .. وقالوا كلام انا كنت عاوزة اقوله (زمانك طبعا بتقولى هو كان فى كلام تانى ست رمال كانت عاوزه تقوله .. اه كان فى انا واحده رغايه عندك مانع )
    بس حقيقى انتى قولتى كلمه يمكن دى الكلمه الوحيده الحقيقيه فى كل اللى خرج منك ... ان الموضوع اخد اكبر من حقه .. هو فعلا اخد اكبر من حقه ... بس الحد اللى اخده ده كان كله جواكى انتى بس مش معانا ولا على صفحات الملف .. بدليل ان محدش حس بده غيرك وبدليل اننا اتكلمنا فى احداث واتناقشنا فى حاجات تانيه بعيده عنك تماما وان الملف موقفش عند الحديث فى الموضوع ده بالعكس ده اختفى خالص بقاله كام صفحه وكاد ان ينتهى لولا انتى دخلتى قولتى الكلمتين دول ....
    فعلا شوشو كان عندها حق لما قالت انه كان نقاش جانبى وعلى هامش الموضوع واننا كلنا كان كلامنا على خطواتك الجايه وكان يهمنا انك متيأسيش ومتدايقيش ولا كلام د عادل يأثر فيكى بشئ ..

    وفى نقطه برده انا مستغربه لها وياريت توضحيها ياطمطم .. النقاش ده مش هو برده نفس النقاش اللى دار من اسبوع ولا عشر ايام مش فاكرة ... ومش كان بنفس المشاكل ونفس الحوارات .. وانتى وشيمو وام اياد وام انس وكل البنات دخلوا واتكلموا وكل واحد قال قصته مع د عادل ... ليه ساعتها مش قولتى هجوم والكلام ده وليه ساعتها مزعلتيش ... وايه الفرق بين المرة اللى فاتت والمرة دى .. ما كل واحد دخل وقال اللى فى نفسه فى المرتين ... مع العلم انك برده كنتى صاحبه البدء فى النقاش ده المرة اللى فاتت يعنى محدش شن الهجوم عليكى ولا حاجه انتى كنتى صاحبه الموضوع المرة اللى فاتت والمرة دى ومحدش كان زعلان من حاجه وكل واحد بيتكلم بحريه تامه

    وفى حاجه كمان .. انتى بتقولى .. حد يقوللى د عادل نجح مع مين غير شوشو ... لا ستوب هنا بقه علشان انتى مش مركزة يا فاطمه وبتقولى كلام مش لطيف خالص على انسان فى النهايه مش قاعد معانا وميصحش نقول عليه كده .. ان كان على اللى نجح معاهم د عادل فا هم كتير اوى ومينفعش نقول هو نجح مع مين وفشل مع مين لاننا مش فى موقف حكم على حد ونجاح الشخص من عدمه مش شئ نخوض فيه بالطريقه دى اطلاقا بالاضافه الى اننا مجرد فئه صغيره جدا من اللى تعاملوا معاه وفى ناس كتير اوى منعرفش تجاربها ايه معاه ... وان كان على نجاحه معانا على مستوى الملف فا كل واحده دخلت وقالت لك .. حتى اودى وام انس اللى حصل معاهم مشاكل فى طريقهم معاه لسبب او لاخر فا فى النهايه كل واحده بتعترف بالحق وبتقول انه كان سبب فى ان ربنا يكرمها .. يعنى حتى لو اعتبرنا انه فاشل فا كون انه يكون مجرد سبب فى حمل اى واحده فينا ده فى حد ذاته نجاح ليه ونجاح محدش من الاطباء اللى اتعاملنا معاهم قدروا يوصلونا ليه .. وانا شخصيا طبعا طبعا اول واحده حملت بفضل الله وربنا جعله سبب ...
    يعنى فى النهايه طلع ناجح على الاقل على مستوى الملف بتاعنا ولا ايه .. وده الرد على السؤال بتاعك ..
    اتمنى زى ما شوشو قالت لك انك فعلا تراجعى نفسك فى الكلام اللى قولتيه وياريت تبصى لمشاركاتنا تانى وتقولى لنا مين زعلك بمنتهى الصراحه علشان مينفعش تسيبى الكلام كده وكل واحد يفتكر انك بتتكلمى عليه ..

تابعي تجارب أخرى من هذا القسم.