تجمع الموقنات برحمة الله(خبرات متبادلة حول مراكز العقم في مصر)الجزء ال19

ميزو و مهاميهو: ازيكم يا قمرات. معلش انا دخلت وجريت لان مديري جه واحنا مزنوقين جامد في الشغل. يالا الحمد لله.
ميزو: واحدة صحبتي لما ولادها بيغلسوا في الاكل بتحطلهم سيريلاك علي الاكل فبياكلوا او تحطلهم ساعات زبادي بس طبعا مش علي كل حاجة. انتي عارفة ان الاطفال ممكن يشبطوا في الاكل لما يلاقوكي تاكلي ومش معبراهم فبيبقوا عايزين ياكلوا من اكلك. ممكن تعملي معاه كده.
دودو: ازيك يا قمراية.
توفي: عاملة ايه؟
نادية: اخبارك ايه؟
كل البنات: صباح الخيرز

صباح الخير عليكم جميعا

انا شايفة ان توتا رجعت

حمدا لله على سلامتك ياحبيبة فلبى من جوة

معلش ياتوتا انا مقصرة معاكى بس والله غصب عنى مكنتش بدخل اليومين اللى فاتو
نورتى التجمع ياحبيبتى وان شاء الله ربنا يتقبل منك الحق ويحقق لك اللى دعتيه هناك يارب



ريمو

انتى لسة برضه غايبة
غيابك طول ياجميل ماينفعش كده تعالى طمنينا عليكى


نيفو
كفاية غياب بقى الله يخليكى تعالى وخليكى فى وسطنا يمكن تستريحى معانا اكتر من ما انتى مستريحة فى غيابك عننا

انا كنت دخلت من يومين وقولتلكم انى هروح للدكتور ولما ارجع هحكيلكم على اللى حصل خلونى بقى احكيلكم اللى حصل من الاول وقبل ما اروح للدكتور اصلا....



انا يوم الجمعة اللى فاتت طول اليوم ماحسيتش بحركة البيبى اللى انا متعودة عليها وكنت ميتة من القلق ومش عارفة اعمل ايه وزوجى كان برة البيت فى مشوار بعيد اتصلت عليه وطلبت منه يجى بسرعة عشان ياخدنى للمستشفى وفى اليوم ده كان الدكتور اللى متابعة معاه فى الخاص اجازة فمش رضيت اتصل عليه ورحت على طول على طوارئ المستشفى الحكومى ولما حكيت للدكتور اول حاجة قالهالى تعالى نطمن ونسمع النبض وده بجهاز بس لسماع النبض يعنى مش بيقدر بيه يشوف البيبى جوة الرحم زى السونار

والحمد لله اتطمن ان النبض موجود وكويس
بس قالى لازم نطمن اكتر ونعمل تخطيط وسونار وعشان كده طلب يحجزنى يومين فى المستشفى ولما سالته ليه قالى لان انهاردة الجمعة وبكرة السبت ومفيش سونار فنحجزك ليوم الاحد عشان نعمله فانا رفضت اتحجز وقولت انا مش لسة هستنى للحد بكرة السبت وهروح لدكتورى برة يعملى سونار واطمن لانى مش هقدر اصبر للاحد
وفعلا مضيت على اقرار بكده وطلبت بس انه يعملى تخطيط
والممرضة طلبت منى انى اشرب عصير كتير ومية وامشى لمدة 10 دقايق وارجع اعمل التخطيط وفعلا عملت كده وعملت التخطيط لمدة نص ساعة واول 10 دقايق مروا عليا سنة لان البيبى لسة ما اتحركش وبعدين حسيت بحركة خفيفة وبعد شوية حركة تانية يعنى فى خلال النص ساعة اتحرك مرتين بس ....

المهم رجعت لقيت الدكتور بيقولى ده كويس بس لازم نطمن اكتر بسونار فلازم تروحى بكرة تعمليه بس عموما حركة البيبى بتقل فى التامن والتاسع عشان مساحة الرحم بتضيق عليه وبتبقى مش زى الاول

والحمد لله يارب بعد ماروحت البيت حسيت بحركة البيبى الطبيعية واتطمنت
ويوم السبت رحت لدكتورى وعملت السونار وطمنى على كل شئ

بس قبل مايعملى السونار انا وريته التخطيط وحكيت له على اللى حصل وقالى ماتقلقيش التخطيط الحمد لله كده كويس وطالما حسيتى بالحركة بعديها مفيش قلق

بس انا اتفاجأت بكلام هو قاله ومش عارفة بصراحة ليه عاوز يعمل كده

هو سألنى انتى ناوية تولدى فين هنا فى الخاص ولا فى الحكومة
فقولتله انا لسة مش مقررة الصراحة ومستنية اشوف الوضع فى الشهر الاخير هيرسى على ايه ؟

قالى انا لازم اعرفك الوضع هنا وفى الحكومة والفرق بينهم عشان تعرفى تاخدى قرار صح

انتو لو تفتكرو انا كنت اصلا حيرانة فى الموضوع ده من الاول بس ده كان عشان انا عاوزة اولد قيصرى والقيصرى فى الخاص الدكتور بيوافق عليه بسهولة انما فى الحكومة لازم يجربوا طبيعى الاول ولو منفعش بيولدو قيصرى

المهم الدكتور قالى انهم فى ا لحكومة لازم ينتظروا ان الحمل يكمل للاسبوع 40 ولو محصلتش ولادة بيستنوا كمان 10 ايام وبعدين لو محصلش بيدونى طلق صناعى ويدخلونى ولادة طبيعية

وهو شايف انه مش لازم استنى الاسبوع الاربعين فسألته طيب هنعمل ايه قالى انا ممكن اولدك من اول يوم فى الشهر التاسع فسألته انا وجوزى ليه فيه حاجة فى حالتى تستدعى كده او البيبى لاقدر الله يكون فيه حاجة
قالى لا خالص بس الافضل انك تولدى بدرى عشان كل ما البيبى بيقعد جوة بيبقى مش كويس

وطبعا كلامه ده مش مظبوط لانى قريت وسمعت ان كل يوم البيبى بيقعده جوة بتكتمل الرئة بتاعته لانهم هنا مش بيدو حقن الكورتيزون....

فسألته هيولدنى قيصرى ولا طبيعى قالى احنا هنبدأ طبيعى بطلق صناعى الاول وبعدين لو منفعش نجرب قيصرى
طب ماهو كده هيبقى ايه الفرق بينه وبين الحكومة ؟؟؟ بس انه هيولدنى بدرى ؟ وانا اصلا مش مقتنعة باللى قاله فقولتله سيبنى افكر ووقتها يحلها ربنا

وكان عندى موعد متابعة يوم الاتنين فى المستشفى الحكومى وقولت اسال الدكتور هناك على رايه فى الكلام ده وساعتها دخلت وقولتلكم انى هدخل احكيلكم بعد ما اسمع رأى الدكتور ....

لقيت الدكتور هناك بيقولى لا طبعا ايه اللى يخليكى تولدى اول التاسع وانتى والبيبى كويسين احنا بنلجأ كده لما يكون فى مشاكل والحمد لله انتى مش عندك مشاكل فليه الاستعجال

ولما سالته على الولادة الطبيعى والقيصرى قالى انتى اصلا ماينفعش تولدى قيصرى لسببين
انك ماينفعش تاخدى بنج كامل لانك نريضة غدة درقية والبنج الكلى غلط
ثانيا وده الاهم انه كان عندى التصاقات فى الرحم والحوض قبل الحمل وده من اسباب تأخير الحمل
فقالى ان القيصرية هتتسبب لى فى انى ممكن ما احملش طبيعى تانى بعد كده لانها هتزود الالتصاقات دى فحسيت ان الموضوع اتعقد اكتر

انا دلوقتى حاسة انى اتشتت ومش عارفة افكر خالص

انا كده مش قدامى الاانى اختار الطبيعى ولو لاقدر الله حصل اى حاجة تخلينى اولد قيصرى هبقى مضطرة لكده مش بمزاجى طبعا

ولسة مش عارفة اقرر اولد فين عند دكتورى اللى مصمم يولدنى اول ما ادخل التاسع ولا فى المستشفى اللى مش هيرضوا يولدونى الا لما تم التاسع

ان اعارفة ان سبحان الله ممكن ربنا يسهلها من عنده واولد فى اى وقت بس مش قادرة اشيل الموضوع ده من دماغى وابطل تفكير