السلام عليكم
انا كنت جارة لكم في تجمع ديسمبر اللي قبلكم
والحمد لله، الله من علي وصار لي والدة الحين اسبوع :)
حبيت بس انصحكم كم من نصيحة
وخاصة للبكريات مثلي
يمكن ما تضيف اي جديد اليكم، بس قلت خليني اقولها عسى تستفيدون منها
بلييييييييز بنات من الحين وقبل الولادة
اهتموا زيادة بحلمات الثدي
انا بصراحة كنت مب لين هناك مهتمة فيهم
وبشرتي اصلا جافة مع الشتاء والبرد
وفي يوم الولادة ظليت حوالي ساعتين في البانيو لتخفيف الألم
يعني بشرتي وحلماتي صاااااااروا جااااااااافين بطريقة لا تطاق
والحين قاعدة ادفع الثمن
تشققات الله لا يوريكم اياها، واضطريت اعطي بنتي حليب صناعي مع اني ما كنت ناوية ابدا
بليز من الحين دهنوا الحلمات بزيت زيتون، او حتى ابدأوا باستخدام كريمات الرضاعة المرطبة
نصيحة ثانية
وقت الدفع، للأسف القابلة مع انها كانت وااااااااايد طيبة معاي وحبوبة بس احس انها ما ساعدتني بأنها تنصحني بالضبط متى ادفع، والنتيجة كانت اني كنت ادفع مرات لما الطلق يوقف، وبالتالي صار لي تمزق من الدرجة الثانية لأنها اساسا مع سوت لي توسيع!!
حتى الوضعية اللي في الأخير اتخذتها، اني انام على ظهري، مب هي الوضعية المثلى للولادة، بس الألم ما خللاني افكر او اتخذ اي قرار صحيح، وركبي عوروني من وضعية السجود او الوقوف على الركبتين على كرة الولادة، فنصيحة انكم تنتبهون متى تدفعون ووضعية الولادة الصح، وياحبذا لو كان الشخص المرافق معاك يفهم في هذه الأمور ويذكرك
وهذه نقطة ثانية
انا كانت معاي في غرفة الولادة امي الحبيبة، اللي كانت تحس بالألم اضعاف اضعاف ما احس
احسها هي اكثر وحدة تعبت من التجربة وكانت تبكي، وللأسف ما قدرت تساعدني
اختي كمان كانت معاي، بس صغيرة وما متزوجة، تروعت وخرجت برة تبكي
زوجي الحبيب كان معاي وساندني نفسيا، بس ما كان يقدر ياخذ اي قرارات او ينصحني
الحمد لله مرت على خير
وان شاء الله ولاداتكم تكون اسهل ومن غير اي مشااااااكل
نقطة اخيرة
تأكدوا انه عباياتكم معاكم في الشنطة!!!
كنت جايبة معاي عبايتين، بس من الروعة والخوف وبعدين الفرحة اختي بالغلط اخذتهم معاها البيت
واخذت معاها كيسة كان فيها ملابس لي
وتخيلوا الفشلة بعدين!!!
بت الليلة الأولى ببجامة نوم مع شيلة فقط!!
:39:
ان شاء الله لما ارجع بعدين على التجمع اشوف اكثر من تبشيرة ولادة
الله يحفظكم
☁ تجـ14ـمع لتباشير بمواليد أشهر الشتا ء☂ يناير1☂فبـراير2☂مارس3 لأحلى بطات بعالم حواء☁
متابعة النقاش، صفحة 11