الكنافه بالطريقه المصريه القديمه
السلام عليكم ورحمة الله وبركاته
طبعا كلكم تعرفوا الكنافه اكيد
نحضر حوالي نصف كيلو كنافه وتقطع قطع صغيره وتشوح في السمن البلدي وبعد ان تنشف شويه في السمن او تتشرب السمن نضع حوالي نصف كوب سكر عليها سنترفيش وبعدين نحضر صينيه على قد الكميه مدهونه بالسمن مش بالزبده علشان ماتتحرقش منكم ونضع نصف كمية الكنافه المشوحه في السمن ونضع في النصف المكسراب وزبيب وجوز هند وتفرد جيدا وبعدين نضع باقي الكميه وتسوى السطح مع الضغط عليها جيدا باليد علشان ماتفكش منكم وتضغط عليها جيدا هاتكون الكنافه طريه من السمن والسكر اللى فيها وانا بالنسبه ليه انا بضعها فوق عين البوتاجاز من فوق واضع تحتها الشياطه بتاعة الارز وتسوى على نار هادئه ونفضل نلف في الصينية كل شويه لغاية ما نهز الصينيه نسمع صوت خشخه فيها كده نتأكد ان الصينيه استوت وبعدين نحضر صينيه كمان مدهونه بالسمن وتقلب على الناحيه التانيه وتوضع على النار هادئه ونفضل نلف في الصينيه نلف في الصينيه لغاية ماتحمر كمان من تحت وبتكون احسن من الفرن علشان الفرن بينشفها شويه
وبعدين تسقى بالشربات الثقيل شويه لحد ما وهي ساخنه ولا تغطي وبعد شويه تقلب على الناحية التانيه علشان تتشرب السكر من الناحيتين وطبعا موضوع قلب الصينيه ده عايز واحده شاطره علشان ما تتحرقش وتكون الفوطه مبلوله ماء ومعصوره علشان ايدك ماتتحرقش
السكر عباره عن حوالي 3 اكواب سكر + عصير ليمون نصف ليمونه وفانيليا لغاية ما تتسبك السكر كويس ومايكونش طري يكون متسبك شويه علشا ن تتطلع الصينيه كويسه مش طريه ولا ناشفه وبس وبالهنا والشفا
شاركي في النقاش
سجلي الدخول لإضافة تعليق.
التعليقات
9مواضيع مشابهة
تابعي تجارب أخرى من هذا القسم.