والله ذكرتيني بموقف صار لي برضه بالمدينة بس أنا ثاني يوم من موقفك يعني يوم العيد رحنا صلينا العيد أنا وعيالي ال3 وابوهم الله يحفظهم جميعا في الحرم واتفقت معاهم نتقابل في مكان معين بعد خطبة العيد المهم ..كانت شبكة الجوال أسوأ من شيئة هذاك اليوم وعيالي الكبار كل واحد معاه جوال واحد 8 وواحد 11 اللي 8 سنوات ضيع جواله بالسيارة قلت لأبوه خلي جوال أخوه الكبير معاه لأن الكبير الله يحفظه حافظ رقم أبوه وكني حاسة سبحان الله .. طلعت لقيت موكب والعسكر مقفلين الممرات بأشرطة ملونة ومنتشرين في المنطقة وجلست أمشي لقيت نفسي وصلت الفندق وجلست أحاول اتصل بزوجي علشان لاينتظروني وبالقوة مسك الخط وقلت لهم تعالوا الفندق خلاص . لمن قربوا على الفندق مر زوجي البقالة يجيب أشياء بسيطة للفطور ومعاه الصغير وعلى الحظ أخذ الجوال من الوسطاني ورجعه للكبير قال له علشان لا تضيعه وعلى اعتبار انهم خلاص وصلوا الفندق .وراحوا الكبير والوسطاني يتسابقون على باب الفندق لكن الوسطاني لخبط ودخل فندق غلطواخوه لمحه وبعدين ما شافه وصاروا كل واحد يسأل الثاني الأبو والولد الكبير والوسطاني فص ملح وذاب وتخيلو الزحمة بعد صلاة العيد فين ندوره المهم دخل زوجي الكبير والصغير وراح يدور عليه وجاني الكبير مع اخوه الصغير وهو حزين ويقول لي ماما فلان ضاع ما لقيناه هو ما جاك قلت كيف ضاع؟ قالي القصة قلت طيب الجوال حقك مو معاه ليش ما دقيتوا عليه قال لا بابا أخذه منه عصبت عليهم قلت لهم أنا قايلة لكم خلو الجوال معاه المهم البس عبايتي وانزل ادور بس والله يا أخواتي كان بداخلي احساس بسكينة وطمأنينة وثقة برب العالمين لأني محصنتهم ومستودعتهم من لا تضيع ودائعه كنت بداخلي اقول لا ما ضاع انا استودعته من لاتضيع ودائعه لكن والله رحمت فجعته ورعبه وخوفه المهم وانا أدور والاحظ الفنادق كلها تتشابه قلت في نفسي اكيد لخبطلأنه فعلا تشابه كبير بين الفنادق بس حبيبي جلس يبكي وشافه موظف أمن وسأله قاله أنا ضايع قاله ايش اسم الفندق قال له الأنصالر الماسي (واحنا ساكنين بالانصار الفضي) بس قاله امشي من هنا ولأنها متقاربة شاف الفندق وعرفه والا اشوفه من بعيد داخل علىالفندق وانا اللي اروح بسرعة خايفة لا يضيع ثانية ولمن لقيته في مدخل الفندق الا عيونه مليانه دموع سألته فينك قال ضعت يا ماما وكان يقاوم البكا (ما يحب يظهر ضعفه) مسكته معاي وربت عليه وقلت له يلا نتصل على بابا وطبعا ابوه كان بلغ الدورية وقال يا كثر الأطفال الضايعين اليوم غير اللي شافهم زوجي معاهم في الدورية وبعدين ابغاه يفضفض وما يعتبر خوفه ضعف قعدت اسولف معاه قلت خفت قال مو بس خفت يا ماما أنا بكيت قلت عادي يا حبيبي الموقف صعب بس الحمدلله اللي ردك سالم.