افكار عملية لبيتك اصنعيها بنفسك و بتكلفة بسيطة جدا

سلام يا بنات..
عندي لكم افكار حلوة لديكورات بيوتكم.. هي بصراحة مو افكاري بس شفتها في التلفزيون و عجبتني وايد و حبيت انقلها لكم عشان نستفيد كلنا..
الفكرة الاولى... علاقة للجاكيتات او العبايات
كل اللي بتحتاجينه هنا قطعة من الخشب و صبغ (اللون حسب الرغبة) و صمغ و مقابض كبتات او حتى ابواب قديمة و قطع خشب صغيرة لتثبيت المقابض.. و مو شرط تكون المقابض كلها متشابهة .. كلما كانت مختلفة و متنوعة كلما كان منظرها احلى.
تاخذين الخشبة و تصبغينها بالصبغ و بعدين تعملين فيها الثقوب الخاصة بالمقابض. للصق المقابض ادخلي قطع الخشب الصغيرة في المقابض و ضعي عليها الصمغ في الجهة الثانية و ادخليها في الثقوب المخصصة... و تطلع احلى علاقة عبايات عندج....
الفكرة الثانية.... علاقة مبتكرة جدا للمطبخ
نحتاج قطعة خشب و مجموعة ملاعق و شوك (تكوني مستغنية عنها) و ملصقات تحمل اشكال خاصة بالمطبخ و صبغ و عاقفة.
تحضرين الخشبة و تصبغينها باللون المرغوب، و تحضرين الشوك و الملاعق و قومي بعقفها من الاسفل بواسطة العاقف.
نحضر الخشبة المصبوغة بعد ان تجف و نلصق عليها الشوك و الملاعق المعقوفة من الاسفل بواسطة الصمغ. بعد ذلك نحضر الملصقات و نلصقها بين الشوك و الملاعق لاضفاء لمسة جمالية عليها... و علقيها في المطبخ... و صدقيني كل من راح يدش مطبخج بيسالج من وين حصلتي هالتحفة الفنية...
و دمتم