هل هو توحد او فصام او عين والله احترت

السلام عليكم ورحمه الله وبركاته
أخواتي بنات حواء
أنا احترت مع ولدي ما عرفت من شو يعاني
بشرح لكن حالت ولدي من البدايه
ولدي ولد ولاده طبيعيه وعاش حياه طبيعيه نفس اي طفل في عمره
بس المشكله ظهرت عليه يوم كان عمره تقريبا ثلاث سنين
شاف ابوه وهو يذبح الغنم
كنت اقول لابوه للتخلي الولد يشوفك ماسمع كلامي قال خليه علشان يتعود ولا يخاف
بعد ما ذبحوا الذبيحه جاني ولدي يركض وهو خايف يقول مسكينه البعاه ذبحوها حرام
وبعدين عادي. كمل حياته طبيعي وقلت الحمد الله انه نسي السالفه وبعد فتره قام يبكي لاتفه الاسباب ولا يتفاهم الا بالصعوبه في بدايه هذي السنه سجلته في الروضه علشان يندمج مع الاطفال اول اسبوعين داوم هو وولد اختي بعدين ولد اختي كل يوم يبكي ما يبي يداوم وقامت اختي وفصلته وبعدين قام ولدي يسال على ولد خالته وانا كل يوم اقوله بكره بيجي طبعا اكثريه الايام أنا كنت اركب ولدي الباص وهويبكي وانا أجيه في السياره واراقبه من بعيد كان مرات يندمج مع المعلمه والعيال ومرات لا داوم تقريبا اسبوع بعد ما انفصل ولد خالته وكل يوم كان يبكي ما يبي يروح المدرسه وبعدين فصلته وقلت السنه الجايه بسجله كي جي تو
والحين صار له ثلاث اسابيع وهو يقول بعاه يذبح ويدور في البيت وبعاه بذبح والحرامي يأكل اجلس اهدي فيه ومايرضى الا بصعوبه وصار ما ينتبه لأي حد ولا يلعب مع اخواته ولا البنات اللي في البيت ولا حتى عيال عمه اول يوم يجونا يفرح ويلعب والحين ما ينتبه لحد مثل اطفال التوحد يلعب لحاله وديته عند دكتوره نفسانيه وقالت فيه من اطفال التوحد بس لازم نسويله فحص جينات وفحص اعصاب وشي من المواعيد شهر 2 والثاني شهر 4 وكل ماهي حاله الولد من سيئ لأسوأ مرات يكون طبيعي ومرات يصيح ويكلم ناس إحنا مانشوفهم يسير ويأسر بيدينه
ومرات يطيح نفسه كأنه حد طيحه ويتكلم كلام مش مفهوم وديناه عند دكتور نفساني قال هذا مافيه توحد شويه خوف وبيروح مع الوقت وصف له دواء ريسبيدال واحد ملي وقت النوم
بحثت عن هذا الدواء في النت لقيته يوصفونه للأشخاص اللي عندهم انفصام
وكل مره نوديه عن شيوخ يقرون عليه حد يقول مس وحد مايتكلم والثاني يقول سبحوه بماء مقري ومسحوه بزيت زيتون كل يوم قبل النوم اسبحه بالماء وتمسحه بالزيت واقرأ عليه الرقيه كل ليله وطلع في جسمه حبوب صغيره في بطنه وظهره وتحت اذنيه ما ادري هي من الدواء ولا من الرقيه
والنوم طبعا ينام بصعوبه مايرضى ينسدح انومه وهو جالس ولا ينام الا الساعه 2ولا3 ينعس وبعدين يذكر الغنم ويقول البعاه يذبح بيذبحوني
واليوم قبل المغرب يصيح وقال سالفه البعاه اللي ما تفارقه وقال روحي كسري الباص انتي ليه خليتيني اركب الباص وهو يصيح وجلست اهدي فيه واقوله خلاص أنا كسرت الباص ماشي باص وقام مسك يد أمي وطلعها برا وقال لها يالله بنروح انكسر الباص أمي تسحبه تبيه يدخل وقلت لامي فكيه بشوفه وين يروح وراح الحاره اللي بجنبنا وانا وراه وبعدين جا عمه وردنا وهو يبكي يقول
ليش ما خلقتني اروح اكسر الباص
ومرات يطلعني من البيت ويقول روحي خلي الحرامي يأكلك ومرات روحي عند امك
والله احترت معاه ما اعرف كيف اتصرف
وما اعرف هل هذا اللي فيه مرض نفسي ولا شي ثاني
 
 

35 تعليق 8,565 مشاهدة

شاركي في النقاش

سجلي الدخول لإضافة تعليق.

التعليقات

31
  1. @nrgs_alkhtyb

    الله يشفيلك ابنك يارب ويحرسه من كل عين
    الجأ لربك وادعي
    قومي بالليل صلي وادعي ربك
    وكل ماتشوفيه بالحاله قولي حسبي الله ونعم الوكيل اللهم اجرني في مصيبتي واخلف لي خيرا منها
    اشفه انت الشافي
    اذهب البأس رب الناس
    يا حنان يمنان اشفي ابني
  2. @bnty_gn

    اسال الله الذي جلت قدرته ان يشفيه ويحفظه لك اختي الغاليه عليك بالصبر والدعاء له واحرصي ان يكون امامك اغلب الوقت واحرصي ايضا ان لا تتكلمي عن حالته خصوصا امامه اللهم اشفه وارفع عنه
  3. @goood333

    صاحبة الموضوع
    نرجس الخطيب
    الله يشفيلك ابنك يارب ويحرسه من كل عين الجأ لربك وادعي قومي بالليل صلي وادعي ربك وكل ماتشوفيه بالحاله قولي حسبي الله ونعم الوكيل اللهم اجرني في مصيبتي واخلف لي خيرا منها اشفه انت الشافي اذهب البأس رب الناس يا حنان يمنان اشفي ابني
    الله يعطيك العافيه
    مشكوره على المرور
  4. @goood333

    صاحبة الموضوع
    طوق احمر مشكوره حبيبتي
    بس حبيت اعرف كم يوم اشربه عصفر
    وفيه شي بعد نسيت ما اقوله انه الحين مايقول لي أمي يقول انتي مش أمي يوم يبي شي مني يقول لأخته نادي امك
  5. الله يشفيه ويعافيه

    استمري ع الرقيه واذكار الصباح والمساء حافضي عليها
    ورشي جسمه وفراشه بقليل من الماء المخلوط فيها المسك الاسود لان المسك الاسود يطرد الجن والشياطين

تابعي تجارب أخرى من هذا القسم.