بسم الله الرحمن الرحيم
السلام عليكم ورحمة الله وبركاته
أول حاجه ابيك تقرؤن قصتي وتحطون نفسكم بالموقف اللي انا صرت فيه مع الحرمه
انا توني متعرفه على زوجة صديق زوجي حرمه والنعم فيها
المهم انا زرت الحرمه في بيتها ومع السوالف تكلمنا عن العطور وعلمتني عن عطر عندها ذكرى من تجهيزها لزواجها وانه باقي فيه شوي ومحتفظه فيه ماتبغاه يخلص وزوجها يحب هذا العطر مرررره
قلت لها طيب اشتري مثله مره ثانيه قالت انها دورت عليه بالخبر وماحصلته ان هذا العطر انقطع من السوق انا عشان خاطرها وحبيت افرح قلبها قصدت والله اسوي خير قلت لها عطيني العطر ادورلك عليه وعساني احصله عطتني اياه دورته بسوق الجمله الدمام ماحصلته الكل يقول مقطوع ودورت لها با الأحساء وماشفته وهنا الطامه الكبرى وأنا بسوق الهفوف دخلت محل يبيع فيه يمني قال هذا العطر عندنا بالمستودع وقام يزعط ان العطر موجود عنده اكيد الاخ طلع من المحل ورجع بعد 10 دقايق إلا وزجاجة العطر مكسورة بيده قطعه قطعه
وبكل برود اعصاااااب قال العطر مالقيته والزجاجة انكسرت قلت له شلون انكسرت قال عادي مافيها
إلا شوي وانكسرت مت من القهر لولا الحياء كان بقست وجهه
تخيلوا بكل وقاحه اخذ القاعده التابعه للعطر ورماها على الطاولة ولف عني الجهه الثانيه انه خلاص طلعي
حسبي الله ونعم الوكيل فيه
انا الحين بموقف مال امه داعي اولاً:ماحصلت العطر للحرمه وتوني متعرفه عليها
ثانياً :انكسر الباقي من الذكرى لها من زواجها ياويلي ويلاه
بالله عليكم وش السواة؟؟
عشان كذا ابي فزعتكم ابكتب لكم اسم العطر وبالله الي تقدر تفيدني وين احصله وين ممكن القاه لا تبخلون علي وابي فزعتكم وتخيلوا نفسكم بهالموقف
اسم العطررررر
DONNA NAUTILUS
تم انتاجه عااام 2000
شكل العطر ماعندي له صورة بس بوصفه لكم
مثل الكره او الصحون الطائرة الي تجي بالرسوم المتحركه لونه من برا (كحلي) نص الكره قاعده والنص الثاني هو زجاجة العطر منكوسه
ربي يجزاكم الخير العظيم والله ثم والله ان الي بتساعدني ما انساها من دعائي ما حييت
من المواقف الي صارت وأنا ادور هذا العطر بسوق الجمله الدمام واحد من المحلات قال لي هذا العطر مقطوع من زمان وبصراحه الي لسه محتفظه فيه تستاهل شهادة شكر و تقدير
حتى الي تحصل العطر خارج السعوديه بس تكتب لي العنوان وين بالضبط ربي لا يهينكم
أختكم في الله وجدان
الموضوع مغلق
