أختــــي العـــــروس..صـــــارت ماتمشــــي ولاتجلـــــس!!

السلام عليكم ورحمة الله وبركاته
يابنات محتاجه مساعدتكم من بعد الله..
الله العالم بالهم اللي في قلبي وبنفسيتي كيف متدهوره..
أنا متزوجه من سنتين ونص وأختي من 6 شهور تزوجت بالرياض وصارت قريبه مني..لكن أهلي بالشرقيه..
عندي أخت متزوجه من 6 شهور,,بعد شهر من زواجها بدأت تتعب..
راحت مستوصفات خاصه يقولون نتيجه التحاليل تقول عندك سرعة ترسب بالدم..
لكنها بسيطه جدا ماهو للدرجه اللي تشتكين منها..والمفروض العلاج يجيب مفعول 3 أسابيع كحد أقصى..
ومابقى علاج لهذا الترسب ولا مسكن الا أستخدمناه معك..
في البدايه كانت تشتكي من ألم بسيط وشوي شوي بدأت تسوء حالتها..
وصارت تطلع فيها تورمات وانتفاخات عند المفاصل,,وكدمات ملونه كأنها مضروبه.
القهر أن التورمات تختفي لما تروح للمستوصف..
وحاليا وضعها يكسر القلب ويرحمها العدو..حتى أني نزلت وقت الاجازه ومارجعت عشانها..
انا أختهم الكبيره ومتعوده أتحمل مسؤليات حتى أمي تعتمد على حكمتي في تدبير الأمور..
المهم/تأزمت حالتها ونزلت عند أهلي لأنها ماتقدر تقوم بشئونها,,وعشان خواتي يعتنون فيها..
ماتقدر تمشي لازم نسند لها عشان نوصلها أكرمكم الله لدورة المياه وأدخل معها وأنا أروشها..
ومستحيل تجلس دوم منسدحه ونأكلها لأنها ماتقدر ترفع يدينها..
أعرف الرياض فيها مشايخ كثير,,لكن وضعها مايسمح أنها تجلس بالرياض..
وعندنا بالاحساء مافيها مشايخ يقرون..
مختصــــر حياتنــــا:
عشان تكونون على بينه أغلب خواتي فيهم مس من الجن والعياذ بالله..
وعلينا سحر وحسد..
وأبوي للأسف متزوج ثنتين غير أمي يعني ماهو فاضي يودي ويجيب رغم أنه متقاعد..
وزوجها مايقصر بيوديها للمشايخ اللي بعيد بالمدينه أو القصيم لكن ألتزامه بالدوام يمنعه وماعنده اجازه لأنه أخذها للزواج..
وأخواني أثنين متزوجين وعندهم دوام..
الخلاصــــــه:
اللي تعرف شيخ ثقه بالاحساء تدلني عليه..
واللي تعرف طريقه ممكن تفيدنا مثل الاغتسال بالسدر,,أو التبخر بالشبّه,,أو شرب شي معين..
يعني طريقه تنفع للعين والسحر..
لعل الله يجعل فيها الشفاء..
مدري أحس أني ضايعه ومحتاره ماني عارفه كيف أتصرف ولا وين نوديها..
بنت بعز شبابها وماتهنت بزواجها..أكتب وقلبي يتقطع حسره وقهر عيوني تنفخت من كثر البكاء وجافاني النوم..
وماني قادره أركز وأجمع أفكاري رأسي دوم مصدع..أحس بشتات..
ساعدونـــــــــا
ربي يكتب لكم الأجر سواء بارشاد لشخص يقرأ أو بدعاء أو نصيحه أو طريقه..
تكفون طلبتكم لاتخلوني والله أني أعاني ضغوط نفسيه شديده جدااااااا..