ما ادري احس أني انصدمت صدمة حياتي والله أني من الظهر وانا ابجي يالله المستعان الصدمة اذا جاتج من الأهل تحر القلب وما لقيت لها تفسير أنا أمي متوفية وإخواني صغار ما اقول أني ربيتهم علشان تقولون هذي مبالغة لكن اعتنيت فيهم وعندي خوات اكبر مني بس والله ما عطوهم كثر ما عطيتهم من وقت ومجهود وفلوس أنا مو جاية أعدد الي سويتة حتى بعد ما تزوجت ما تغير شي أنا تقريبا يوميا عندهم ما كنت ابي احد يزعلهم او يكسر فيهم او يستغلهم حتى كنت مرات اتهاوش مع إخواني الكبار اذا احد فيهم زعلهم وانا الحمدلله ان أبوي يغليني حيل والله ما يحط خيط في إبرة لازم يقولي وحتى مرات اذا صارت مشاكل بينة وبين زوجتة يقولي ويستشيرني أنا الله مارزقني عيال ليما الحين لي خمس سنين متزوجة كنت اقول خيرة علشان ربي مايبيني أنسى إخواني الحمد لله الحين إخواني كبرو اصغر واحد في ثالث ثانوي الصدمة الاولى ان تقريبا قبل أسبوعين صار فيني التهاب حاد في الصدر وتنومت في المستشفى تقريبا ثلاث ايام تخيلو ولا احد من اهلي زارني باستثناء أبوي جاني اول يوم بس والله أني بجيت في المستشفى لما انفطرت جبدي من البجي حتى اهل زوجي ما زاروني يعني اول مرة في حياتي أنام بمستشفى ولا احد ويزورني يعلم الله أني ما قصرت فيهم قمت ابجي بالمستشفى لا شعوريا وحلفني زوجي كنت ما ابي أتكلم كانت ادمعوي تصب مثل الشلال ما قدرت امسكها حتى هو في البداية كان يضحك علي يقول وين خواتج اذا فيهم وحدة ولدت تقعدين عندها طول اليوم بالمستشفى كنت ما ادري شقولة ما في أعذار لدرجة ان وحدة ما دقت علي بالمرة وعزمت خواتي وانا كنت بالمستشفى وراحو تجمعو عندها والثانية أنا دقيت عليها على بالي انها ما تدري أني في الطبيب كانت تدري بس مادقت علي واختي الكبيرة لما طلعت من المستشفى قامت تعذر بس أعذار ما ادري شلون صايرة
الصدمة الثانية اليوم أنا في بيت أبوي وقلت حق اختي في الجامعة خلينا نروح نرتب غرفتج لانها عفيسة بدال حنا قاعدين فاضين تخيلو شنو ردت علي قالت ماراح أرتبها أبيها وصخة واني أنا بس ادور المدايح من الناس من الصدمة مارديت عليها وقمت عنها بجيت لما قلت بس أنا لو ابي أعدد الي سويته لهم ماراح يكفي المنتدى كلة حاولت العصر أني ما أعطيها وجه قلت يمكن تحس انها غلطت علي وبعدين قاتلها ترى أنا وعلامة عليج قلت خلني انبهها تخيلو شنو قالت يعلم الله ما توقعت الكلام قالت ما ترضين ان شاء الله اصلا انت ماذيتنا من زمان وما يعجبج شي والله أني قعدت ابجي قدامها والله كلامها مثل السهم في قلبي ورديت عليها قلت ماكنت ادري ليش ما قلتولي من زمان ليش ما نبهتوني قمت اعددلها الي سويتة لها لانها راح تزوج الله يوفقها وانا كنت اجهزها ولاوحدة من خواتي كانت تروح معها أنا الي جهزتها كل الأغراض وهي ماردت علي ولا كلمة بس والله يعلم أني ما اذيتها بشي اصلا من غلاتهم عندي ودي أشيلهم من الارض ما خليهم يمشون
ما ادري صغرت الدنيا في عيني حيل هذول إخواني الي ضحيت علشانهم ما ادري والله شقول مرات اقول في حكمة من ربي الله يبي ينبهني لشي بس ما ادري شنو اعتبروها فضفضة لان احس ما عندي احد ولي بنيتة سنين انهدم بدقيقة ما ابي منكم تدعون ان ربي يرزقني الضنا يشيلني اذا كبرت
اللهم لا تذرني فردا وانت خير الوارثين
شاركي في النقاش
سجلي الدخول لإضافة تعليق.
التعليقات
4- الله يكون في عونك يا أختي.. والواحد يعمل الخير لوجه الله.. ولا عليه من أحد لأن الله هو اللي يجازي بالدنبا والأخرة..
ماهو الخلق.. ولا تكونين حساسه بزيادة أعرف أن هالشيء قاسي عليك وعلى وحده مثلك عاملت بالحسنى..
بس الأجر على الله وبما ان نيتك زينه بكره الله يفرجها عليك بس أكثري من الاستغفار والدعاء وقيام الليل
والله بيرزقك الذرية الصالحه.. - الله يهـــــديهم ماعليك آنتي ماخسرتي شيء بالعكس لك الآجر عند الله
بس يـ الغاليه لا تعددين كل شوي اللي سويتيه لهم ، آدري تبينهم يحسون ويقدرون بس هم يحسونك كذآ تمنين عليهم
وأخت تحمليها ماتدرين يمكن عندها ضغوط ذاك اليوم مو تقولين انصدمتي يعني هذي اول مره تعلي صوتها عليك
ويمكن فشلتيها انك قلتي غرفتك عفيسه وخافت يوصل اهل العريس :hahaha:
وانا اشوفها هوشه خوات عاديه تصير بكل بيت
موفقه - يعلم الله اول مرة أتكلم أنبههم أنا شنو بنسبة لهم حتى لما طلعت من المستشفى يشهد ربي علي ما تشرهت عليهم بالعكس كنت في المستشفى أنا أدق وتطمن عليهم والله كنت في المستشفى ويركبون علي الأجهزة كنت ابجي وزجي يضحك علي ويقول انت خائفة من الموت ما كنت قادرة ارد علية وبقلبي والله ما تدري صورة إخواني قدام عيوني وأقول بنفسي اذا مت منو يعتني فيهم لان هم عيالي مو خواني
- الله يعينك ويكتيلك الاجر ان شاءالله
مواضيع مشابهة
تابعي تجارب أخرى من هذا القسم.