$/₪▓Ξ❤Ξ»¯−ـالتجمــــ 15 ـع لتباشير مواليد 4أبريل 5مايو 6يونيو ـ−¯«Ξ❤Ξ▓₪/$

17 أبريل 2011

يوووه يا نظوره اكشن ولادتي كان محززززززززززززززن لاخر درجه

مدري يمكن لاني ما رحت عشان اولد وتفاجأت

او لان بس انا وزوجي وما عندنا ذيك الخبره

تصدقين زوجي جلس ممغوص يومين بعد الولاده ومانام طول اليومين

من كثر ما انه انحط بموقف صعب

>> يلا تحمست بحكيه دحين

شفتو ذاك اليوم كان الثلاثاء لما قلت لكم ان زوجي جاي من السفر ويبغاني اخذ طلق صناااعي

المهم لما جاء انا تضبطت و اصلحت بعض مما افسده الحمل هههههه

ومر عليه ورحنا تمشينا طبعا ما اخذت شنطه المستشفى لاني مرره مستبعده اني اولد قبل موعدي

رحنا تمشينا وانبسطنا ورجعنا البيت نمنا

وصحينا بدري وقللي ها وش ناقصك عشان نروح السوق نكمل باقي الاغراض

>> كان الساعه 9 الصبح رحنا السوق وكملت اغراضي ياقلبي عليه مرره بريئه خخخخخخ

قشيت ام الرضاعات كلها اللي بسنتر بوينت

ههههههه

ولما خلصت قال هيا شدي حيلك وامشي والمجرم تعمد يوقف السياااره بعيد عن البوابه

يعني تكسسسرت روحه وجيه

ومارجعت البيت الا هلكااااااااااااااااانه تغدينا وريحت شوي

والعصر مرت عمته سلمت عليه و جلسنا تونسنا وانا ما فراااااسي ولااده

شويه الا الاخ شايل الشاهي والقهوه وفرشه وطالع السطوح وقال الحقيني فوق

وانا بكل برائه اطلع ويخليني الف السطوح مشي وانا ما اشوف الطريييق هههههههههههه

كل ما جلست جا يسحب فيني عشان امشي ونادى عمته تجي تمشي معايا تسليني

المهم مشيت نص ساعه وانهد حيلي ونزلت

بعدها جو اهله من السفر ونزلت لهم وسهررررررررررره لحد 1 الليل الا انا مو قاادره اجلس وطلعت فوق

تخبرون الالم الشد العضلي اللي كان يجيني باعلى ظهري ؟

جاااني بس الم يموووووووووووووووووووووووووووووووت وربي صرت اصيييح منه

حاولت انام .. حاولت انسدح اريح ظهري بس مافي فاااايده كل ماله يزيد بالذات لانسدحت

المهم لما شافني بمووت من الالم ما تشوفون الا ضروسه من اخر الشارع فرحااان قال يلا جا الفرج شكلها ولاده

قلت وييين ولاده هذا شد عضلي مو طلق

قال طيب يلا المستشفى مارضيت

اصر الا وارووح المستشفى

توكلت على الله ورحت المستشفى طبعا حاسبه حسابي انه بس يعطوني مرهم او مسكن وبرجع

المهم زوجي عااش الدووور مرررررررررررره لما ركبنا السياره شغل الفلشر والبواري ورى بعض

يقالك حاله ولاده هههههههه وانا اللي انقص ظهري من سرعته الله يهديه

وشغل لي قرآن وقال لي ارتاحي حاولي تنامين

وانا استهبل عليه واقهره اقول له مسكين مرره متفائل

وصلنا المستشفى رحت سليمان فقيه وطلب لي عربيه وجابوها ليه للسياره ومارضيت اركب فيها خفت الموضوع يصير جد خخخخخ

قلت لا اقدر امشي

المهم دخلنا وكانت الطواريء مررررررررررره زحمه

ولما دخلنا وسألونا وش الحاله ؟؟ قال لهم زوجي الحرمه حامل قالو بكم شهر قال التاسع

بس سمعو كلمه التاسع قالو فووووووووووووووووق فووووووووووووووق اطلعو قلت لهم لا مافيني ولاده

وسألوني وش تحسين فيكي طلق ؟؟ وانا ارد عليهم لاا انا ما جيت اولد >> منجد اول مره احس اني دلخه هههههههههههه

وجات ممرضه تكمل اوراقي ووحده تقيس ضغطي وتقيس وزني وسابو كل الحالات وتوجهو لي

وجات ممرضه وطلعتنا فوق

طلعنا الا حبايبنا في الله طلعونا كشك الولاده وانا وزوجي زي الاطرش بالزفه جانا هبل ذاك اليوم الله المستعاااان

اول ما دخلنا قسم الولاده الا نسمع اصوات الصياااااااااااااااااااااااااااااح وانا اللي اتجنن وجلست ابببكي

ووالله حتى زوجي بغى ينهبل من الصياح وياقلبي عليه طلبهم يدخلوني غرفه لحالي عشان ما اسمع شي

وهو ماغير شويه يهدي فيني ويحاول يسكتني وشويه يحظني وشويه يخرج وشويه يرجع

يعني مررررررررره باين عليه القلق والتوتر

وزوجي مسكين باين عليه مرررره صغير بالعمر ما كانه عمره 25 اللي يشوفه يقول 19 يعني ينرحم

شافته وحده من الحريم مرررره قلقان وكل شويه يجي عندي يسكتني

قالت له ممكن ادخل عند زوجتك قال ياليت بالله هديها وكلميها عن الولاده

دخلت عندي هالحرمه الله يجزاااااااااها اللللللف خير منجد ما قصررررررررت

هي جايه مع سلفتها تولد دخلت عندي وجلست تهدي فيني وتذكرني بالدعاء وتقول شوفينا كلنا ولدنا وحملنا ثاني

لو الولاده بذا الرعب اللي متصورته ماكان وحده فينا حملت

وقالت لي تكفين هدي شوي ترا زوجك برا مررره يحززززن لا تخرعينه كان جبتو وحده من امهاتكم توقف معاكم >> حسستني ااننا في الروضه انا وزوجي هههههههههههه

وجلست تقول لي يا خببله ما ودك تشوفي نونتك وتحظنينه وزوجك يفرح وترتاحين من هم الحمل وتعبه

جد كان اسلوبها يجنننننننننننننننننننننننننن وحنانها شي خيااالي ربي لا يحرمها اجري

المهم ماخرجت من عندي الا وانا ماشاء الله ساكته هاديه وحاولت استجمع قواي عشان زوجي

دخل عندي وحسيته ارتاح شوي لما شافني ساكته

وبدأ يستضرف كعادته ويتريق عليه لاني كنت مستشوره ومتمكيجه ورايحه فيها ههههههههه

يقول ماشاء الله متشيكه ماتدرين وش مستنيك خخخخخخخخخخخ الدلخ جاء بيكحلها عماها

وانا اللي ارجع لنوبه البكا هههههههههههه

المهم جو حطو لي جهاز الطلق وانا احلف لهم والله ما احس بشي والله مافيني ولاده خلوووني اخرج

مره مارضيو جات الدكتوره سلمت ودخلت وعرفتنا باسمها دكتوره سعاد واول ما دخلت طلت بزوووجي كذا زي اللي تقول وش يبغى ذا البزر خخخخخ

سألتني كم عمرك قلت 24 قالت لاااااااااااااااااااااااااااااااااا تصدقي على بالي في 18

عاد انا دورولي ما تلقوني تشققت من الوناااسه ونسيت ام الخوف والتعب

شافت الطلق ماكان فيني طلق وماشاء الله نبض البيبي تمام انا فرحت على بالي بيعتقوني لوجهه الله

لكن لاااااا مفر ... قالت طيب بكشف من تحت قلت لااااااااااااااا ما ابغى

قالت مو بكيفك يلا خليني اكشف

ومسلسل الدلاخات مازال قائم تخيلو وش سويت ؟؟؟

قلت طيب خرجي زوجي برا ههههههههههههههههههههههه احسها رحمتني

وزوجي مدربي راسه يقالك مستحي وخرج >> اقسم بالله لحد الان اسأل زوجي اقول له وش الدلاخه اللي نزلت علينا ذاك اليوم

مدري هو الخوف .. هو القلق ,, هو الترقب .. هي الورطه اللي خلتنا ما نعرف نتصرف وقتها

المهم قاست لي وياااسلاااااااااااااااااااااام على الكشف جد متعب حاولت استرخي ما قدرت وجلست اصيح

قالت يالله فاتح بس 2 سانتي وحوضك مررررررررررررررررررررررررره ضيييييق

لااازم عملللليه قيصريه عاد انا دوروولي ما تلقوني صياااح باعلى صوتي لدرجه زوجي دخل يجري على باله ولدت ههههههههه

قلت لا والله لو تموتين ما تسوي لي عمليه انا مستعده اتعب واتحمل

واصلا مافيني طلق عشان تستعجلي عليه

قالت لا لازم عمليه يلا بروح اخليهم يجهزون غرفه العمليات قلت لها مو بكيفك مالك دخل القرار قراااااري يلا فكي الجهاز خليني اروح البيت

قالت مررررره لازم عمليه ودحين الاستشاري بيجيك رهو يقرر >> يا برووودها حسبي الله عليها وقتها كانو قبلي وبعدي 6 قيصريات يعني ياسبحان الله كلنا احواضنا ضيقه ؟؟

سياسه عقيييييييمه تتبعها المستشفى عساهم الماحق

المهم اقول لها طيب فكي الجهاز بقوم استخييير ما رضيت منجد حسيييت بظلم وقتها ولا طاوعني قلبي وفكيت الجهاز لاني قاعده اتابع نبض البيبي

وقتها لما شافتني مصررررررررررره على رأيي لاني قلت لها مافي عذر مقنع عشان تقررين لي قيصري

انتي ما اعطيتيني فرصه للطبيعي لما تعطيني فرصه يوم و يومين وتشوفين اني ما اقدر فعلا وتتعسر ولادتي ويقل نبض البيبي ذيك الساعه لك الاحقيه انك تقرري قيصري

اما انك تقرري كذا لمجرد انك مافيك حيل تنتظري فمالك حق

قالت لا هو بس 2 سانتي ومستحييل يتوسع اكثر قال زوجي طيب نستنى لليل خلينا نروح وان شاء الله نفكر بالموضوع ويارب تجيها ولاده من ربي

قالت له يووووووووووووووووووووووه انت تقدر تستنى لحد ما يفتح الرحم 10 سانتي ؟؟؟؟؟؟

فيك حيل ؟؟

ليش ما تحب زوجتك ؟؟ ليش تبغاها تتعب ؟؟

ليش منت مشتاق للبيبي ؟؟

اذا تحبها يلا وقع >> حسبي الله عليها استغلت العواطف لصالحها شافته خايف عليه وبس يهدي فيني قالت يلا من هنا تؤكل الكتف

سكت زوجي وانا ابكي تجننت من البكى اقول له طيب ما احس بطلق يلا نروح البيت الله يسعدك

وهو الدمعه بعيونه مابين كلام الدكتوره ومابين حالتي هو اقتنع من كلامها ومو هاين عليه اتعب

لانها سوت له اغراءات تقول له ياغبي كل الرجال يطلبو زوجاتهم يولدو قيصري عشان ما تتعبك بعدين

وترا العمليه ليزر تجميليه ما كانها وللللدت

انا من قهري خلااااااااااااااااص حسيت بانهيار مع الشد العضلي زاااادني تعب

صرت ابكي زي المجنونه حسيت بظلم وقهرررررر تعرفي لما احد يغبنك شي يذببببح

وقتها قلت هذا جزاء ربي لي لاني دايم اسوي فيها واقول بولد قيصري

صح القيصري مريح ببعض الاشياء وممكن لو كانت ظروفي احسن من كذا وكنت متهيأه نفسيا وجسديا كان وقعها اهووون على قلبي بكثيييييييييييييير من الموقف والوقت اللي انحطيت فيه

يعني تكوني سهرانه ومتونسه مع الناس ومتشيكه ولا هاااااااامك شي فجأه يقرر لك عمليه بعد ساعتين قمه المفاجأه والخوف من المجهول

انا الموقف بحد ذاته خلاني ابكي وما استرد مو خوف من العمليه او الولاده لااا بس تفاجأت وانفجعت

>>>> يعني لاتخافون من العمليه جايتكم بالكلام اقولكم عنها

المهم لما اقنعت زوجي وكسبته بصفها ميه بالميه جااني يقنع فيني ويهديني ويبوس يدي ويبكي يقول عشان انتي ما تتعبين

انا ما ابغاك تصيحين وتطلقين وتدفين ما ابغى اشوف التعب بعيونك

انا لما قلت لك قيصري يعلم الله عشانك انتي بس ولو عليه والله لو خيروووني بينك وبين النونو اختارك

ولو مو واثق باذن الله انه اريح لك ماكان رضيييت شوفي اختك شوفي امك ماشاء الله مافيهم الا العافيه

قمت اصيييييييييييييح قلت طيييييييييب امـــــــــــــــــــــــــي بتنفجع علي خليني اول شي امهد لها

قال لا ماعليك بتفرح لو دريت انك ولدتي ولا يهمك قلت لا انا ما قلت لها اني بولد >> تخيلو مشاعري وقتها ومدى الحززززززن والحيره والالم والوحده اللي عشتها بذيك اللحظاات

انا ابكي وزوجي يبكي لما شافني مره منهاره وشايله هم امي نادى الدكتوره قال لها خلاص ما نبغى عمليه خلونا نستنى يمكن ربي يفرجها دام لسى مافي طلق

يقالك حزنت على وضعنا قالت طيب بس بكشف من تحت يمكن فتح اكثر مع اني ما اظن انه راح يتوسع

هالمره كشفت وانا متمسكه بزوجي وودي احرق الدنيا كلللللللللللللها واموت فحظنه منجد عرفت قد ايش هو انسان راااائع وما اظن راح ارتاح وقتها الا بوجوده جنبي ربي لا يحرمني منه

>>> بدت تقوطر الرومنصيه خخخخخخخخخخخخ ضيعت الدرب

المهم كشفت عليه

والخسيسه تتوقعون وش سوووت ؟؟؟

فتحت مويه الراس حسبي الله عليها ونعم الوكيييييييييييييييييييييييييييييييييييييييل

عشان تحطنا امام الامر الواااقع يقالك بتمسكنا باليد اللي توجعنا اااااه يا وجع قلبي وقتها لكن انا خصيمتها يوم القيامه

قالت زي ما هو 2 سم وفتحت مويه الراس لاااااااااااااااااااااااااااااااااااااااااازم عمليه دحيييييييييييييين يلا وقع والا بتقل المويه ويموت الجنين

طبعا زوجي مسكين وش عرفه انه عادي لو انتظرت شوي جاني طلق ربي وولدت

لا صدق كلامها ووقع وخلاني استرخي واريح اعصابي وقال لي مو انتي كل ليله قبل ما ننام تقولي اشتقت لولدي

مو انتي ماتنامين بسرعه من كثر تفكيرك فيه

مو انتي 3 سنين مستنيه هاللحظه

يلا هاااااانت كلها ساعتين بسسسسسس ويكون احلى ولد بالدنيا بحظنك

انا هنا كان ربي نزل عليه سكينه وابتسمت وقلت اللي تشوفه

جو الممرضات اللي تبصمني على اوراق واللي بيدها موس تبغى تحلق بطني واللي تتابع النبض والطلق واللي تلبسني لبس العمليات

وانا ساااااااااااااااااكته بس الدموع تقولون شلال على خدي قاعده افكر لو مت في العمليه وش اكون قدمت لربي اكيد ولاااشي

اكيد مقصره بحق ربي اللللف مره واستحي اموت وانا ماقدمت شي

بدت الهواجس وقربت ساعه الصفررررررررررررر

نقلوني للسرير اللي برا يوديني لغرفع العمليات خلاااااااااص وما اشوف الا دموع زوجي تنقط على يدي وهو ماسكها

دفوني لغرفه العمليات وانا اقول لزوجي باعلى صوتي وانا ابكي يا محمد ساااامحني

يا محمد لو صار لي شي ودي الولد لامي والا امك يا محمد لا تقصر عليه بشي

يا محمد قول له اني احبه وكنت مشتاقه له

وفي الاخير قلت له يا محمد انتبه لا انزل من العمليات متكششششفه

وطبعا دخلت غرفه العمليات وانفكت يدي عن يده وحسيت روحي مع محمد برا وانا ماغير جسد بدون روح بين الاجهزه

>> فاصل بكـــــــــــــــــائي ههههههه

دخلت الساعه 8 و عشر دقايق والدكتوره بيدها كوب شاهي ياعساه مداخيل ماني بقايله بس

جات عندي وقالت لي لييييش تبكين ترا مررررره سهله العمليه كلها نص ساعه واحنا خالصيييين >> مارديت عليها ماني طايقتها ولفيت وجهي عنها

بلحظااات انا ما ادري عن نفسي خدروووني خلااااااااااااااااااااااااااااااااااااااااااص وبدأ العمليه

ومحمد سوا فلم دراما برا لدرجه واحد من الشياب اللي في الممر جاء وحظنه وهداه >> وربي يومها صابتنا خرعه مي طبيعيه

مسك الدكتوره وقال لها شوفي لو زوجتي صار فيها شي والله مسدسي في السياره ماغير اقتلك انا مايخارج معايا ابلغ الشرطه

لو لزم الامر ضحي بالنونو وخلي لي امه تكفين >> بسم الله على ولدي

على الساعه 10 تقريبا ما احس الا الممرضه تضرب بخدي تقول مدام قووووووووووووووم

صحيت وعلى طول استفرغت الله يكرمكم من البنج جات مسحت لي بالمنديل زي الاطفاال اااااااخ بس وقتها صعبت عليه نفسي

المهم بشرو زوجي اني ولدت واني انا والبيبي طيبين ومن فرحته سجد وحمد الله وشكره

شويه الا نزلو له البيبي وراح معاهم ونسيني تهيء تهيء خخخخخخ

المهم نزلوني من غرفه العمليات ومعايا عن يميني ممرضه وعن يساري ممرض

وحسبي الله عليهم كأني كنت حاااااااااااااااااااااااسه تخيلو خرجوني وانا وجهي ويداتي كللللللللللللها برا

وانا لسى ما فقت ميه بالميه بس حسيت اني متكشفه وما اقدر اتكلم صوتي راايح من البنج

امسك يد الممرضه ابغى ااشر لها تغطيني ما اعطتني وجهه

ادق الممرض ابغاه يسترني مافي فاااايده

اطل بيدي كلها براااااا وانا رافعه اصباعي اتشهد من وقت العمليه ومو راضي ينزل خخخخخ

قمت رفعت يدي ابغاهم ينتبهو لي ويغطوني مررررررررررره محد حووولي

تخيلو طلعوني من الدور اللي تحت لفوق وانا متكشفه يالله كم احد شافني يارب اغفر لي ولا تسااامحهم يااااااااااارب

شافني اخو زوجي وهزأهم تهزيء من هنا لبكره وغطاني ودخلوني غرفه التنويم >> وقتها كنت نايمه

جاء زوجي والفرحه ماليه قلبه الحمد لله ومسك يدي وقال لي قووومي انتي بخير قوومي شوفي صورت لك هيما

زي القمر مرررررررررره يشبهك قوووومي >> ازعجني هههههههه

وانا اللي افتح واغمض لسى من تاثير البنج

اخر شي فتحت ولما شفت زوجي بدت الدموع تنزل تصدقون بالله اني جلست يومين دموعي تصب صب كل من شافني بكى

وراني الصور وانا من البنج عيوني صارت حولا هههههههههههههههههههههههههههههههههههههههه وتخيلو مكبرتها ابغى اشوف الصوره زين

وماسكه يده مره اقرب الجوال والصقه في عيووني ومره ابعده شوي واطالع بزوجي وابتسم وانام منظري كان يفطططس ضحك

ومن المواقف اللي تضحك يقول زوجي اي احد يكون جنبي كنت اخذ يده وابوسها مابقيت ولا احد ما سلمت عليه هههههههههههه حشى صرت كاني متسوله

المهم جو امه وجدته ودق على امي بشرها باركت له وقفلت بعد 5 دقايق رجعت اتصلت توها تستوعب حلفت زوجي ان صادق والا مقلب خخخخخخخخخخ وجات هيه واختي

وزوجي راح شرع لي الغرفه وسوا حركتات وسوولي جو حلو مرررررررررررررررره

بس اللي يفشل جدته اسمعها تبشر عمي وعمه وتقول لهم ولدت بعمليه حوضها ضيق هههههههههه ياذولا الكهيل يبغالهم اعاده تاهيل

المهم الحمد لله قمت بالسلاااامه انا وابراهيم والعمليه صح متعبه بس والله 10 ايام وماشاء الله تقدري تمارسي حياتك طبيعي

اول يومين طبعا فيني قسطره وما اقدر اقوم من السرير الممرضات هم يلبسوني ويغيرو لي ويمسحون لي جسمي ولبسوني شراريب

بس اليوم الثالث يارب لك الحمد فكو القسطره ومشوني شوي

واليوم اللي بعده تروشت ومشييييت والحمممممممممد لله على العاااافيه

وتووووووووووووووته توووووووووووووووووته خلصت الحدوته حلوه والا فتفوته

$/₪▓Ξ❤Ξ»¯−ـالتجمــــ 15 ـع لتباشير مواليد 4أبريل 5مايو 6يونيو ـ−¯«Ξ❤Ξ▓₪/$

التعليقات

بكرية بتاخذي من العاشر !! ولادتي :$ <

$$₪▓Ξ❤Ξ»¯−البيـــ 10ـــــت العــاشــر لمواليد الشتاء ◆يناير1◆فبراير 2 ـ−¯«Ξ❤Ξ二₪/$$

انا ×ـالجوري× ابشركمم ولدت $

التواسع تفضلو هنـا $ ....//انضموا للتجمعات الموجوده

استفسار عن مستشفى النساء والاولاده بالدمام .. اللي تابعة وولدت فيه تدخل لو سمحتم :$

بكرية بتاخذي من العاشر !! ولادتي :$ <

$$￼₪▓Ξ❤Ξ»¯−البيـــ 10ـــــت العــاشــر لمواليد الشتاء ◆يناير1◆فبراير 2 ـ−¯«Ξ❤Ξ二₪￼/$$

انا ×ـالجوري× ابشركمم ولدت $

التواسع تفضلو هنـا $ ....//انضموا للتجمعات الموجوده

استفسار عن مستشفى النساء والاولاده بالدمام .. اللي تابعة وولدت فيه تدخل لو سمحتم :$

$$₪▓Ξ❤Ξ»¯−البيـــ 10ـــــت العــاشــر لمواليد الشتاء ◆يناير1◆فبراير 2 ـ−¯«Ξ❤Ξ二₪/$$