سهرتنا اليوووووووووم حركااات ~~~ {السهرة الاجتماعية}

صاحبة الموضوع 3 مايو 2011

بالبداية أنا وقبل سنوات.. ما كنت أنكر ولا أنصح
كنت اذا شفت الخطأ صحيح أكرهه، لكن ما كنت أنكره..

كنت أحس بالذنب بس كان احساس خفيف.. ماكان يؤرقني

كنت أشوف بعض اللي أعرف ينكرون.. إذا شافوا متبرجة، وحدة تغتاب، وحدة متعطرةعند رجال،، ينكرون وينصحون

بديت أغبطهم وأحس إنهم أحسن مني.. وأقرب إلى الله مني

لأن الله يقول في الحديث القدسي " من تقرب إلي شبرا ، تقربت إليه ذراعا . ومن تقرب إلي ذراعا ، تقربت إليه باعا . وإذا أقبل إلي يمشي ، أقبلت إليه أهرول" صحـــيح مســلم

حسيت اني غلطانة
وان انكار المنكر بالقلب ما يكفي

يكفي الانكار بالقلب؛ إذا كان الانسان يخاف على حياته لو تكــلم أو أنكــر.. مو حنا في أمن وأمان، في بلاد الاسلام والايمان،، وما ننكر!

يقول المصطفى صلى الله عليه وسلم:
"من رأى منكم منكرا فليغيره بيده . فإن لم يستطع فبلسانه . فإن لم يستطع فبقلبه . وذلك أضعف الإيمان " صحـــيح مســلم

بعد شوية صراع مع نفسي، وشوية جهاد،
وشوية عزيمة >> شووية وشوية.. هي مقادير خلطة!

الحمد لله بديت.. بس على خفيف.. يالله بالسوق، وأنا متغطية.. أنصح اللي قدامي ما أعرفها ولا تعرفني..

كان يهمني ردها.. وأبي أعرف ردة فعلها

وشوي شوي مع الايام صارت النصيحة في السوق سهلة!

وما صرت أهتم وش قالت، وش ردّت، كيف تكلمت..

صار اللي يهمني إني برّيت ذمتي، وأنكرت المنكر اللي ما يرضى ربي أسكت عنه.. طبعاً أتمنى من الله يهديها،، لكن ردة فعلها الخاصة ما تعنيني

عرفت الاسلوب المناسب للنصيحة للأغلب الناس..

أولاً السلام لااااازم يا أخوااات..!
ما تقولين لها ولا كلمة حتى تسلمين عليها

ثانيّا.. قولي لها كلمتين مختصرة بأدب ولطف

ثالثاً تكلمي بثقة فأنتي على حق!

" ومن أحسن ديناً ممن دعا إلى الله وعمل صالحاً وقال إنني من المسلمين"

فلا تتكلمين بذلة وخجل، فهذا يعطي انطباعاً سيئاً،
ولكن تكلمي بثقة ولطططف أيضاً..

صار النصح في الاسواق سهل ويسير علي.. لأني متغطية، ولا أعرفهم، ولا يعرفوني، ولا يعرفون ملامح خشتي..

لكـــــن

في الأماكن العامة.. التي نطلّع فيها خششنا،،،، صعبة عليّ

ومرّة أخرى بدأ الصراع
وتأنيب الضمير

ثم جهاد النفس؛
فتوكلت على الله.. ونصحت أول مرة

مشت الأمور تمام.. ما صار شيء.. ما انفجر المبنى ولا جاء زلزال..
أقصد قلت لها كلمتين مع ابتسامة؛ ومشينا وخلاص....

ليش كنت خايفة مدري مستحية مدري شايلة همّ...؟؟ لا لشيء إلا تخويف إبليس

بدأ الخوف يتلاشى،، والحياء اللي ماله سنع يتبدد

وشوي شوي صرت أنصح وجهاً لوجه وخشةً لخشة والأمور تمام

في هذا النوع من النصيحة
تحتاجين للابتسامة

يعني أضيفي للمقادير السابقة [شوية ابتسامة]
لأن وجهك الآن مكشوووف.. وعينيك وخديك وشفتيك لازم يتساعدون معك في انكار المنكر خخخخخ

لا تحسبون المراحل انتهت
وصلنا للمرحلة الأخيرة والأصعب جداً بالنسبة لي؛؛

وهي نصح القريبات، يعني لمّا نكون في زواج أو اجتماع عائلي ونشوف منكر،،
ما أقصد بالأقارب الأخوات والاخوان، بل أقصد الاقارب اللي بيننا واياهم مجاملات « يعني اللي مابيننا معهم ميانة»

أوووه هذي الصعععبة،، ما وصلتها بسرعة

لكن كنت اذا رحت لحفل وشفت منكرات من لباس أو نمص أو عباية أو غيرها.. أتألم، أدري انهم بيتعلقون ي رقبتي يوم القيامة،، بس أحس صعبة أقول لهم شي لأنهم أقارب وكل مرة بشوفهم..وإحراج لي ولهم... وغيرها من مداخل الشيطان

لكن اذا رجعت البيت..... أحسّ بتأنيب الضمير.. إذا وقفت أصلي، أحس إني مستحية من ربي.. ليش يعني هُم أَهَمّ من ربي؟!

لا والله، ربي أهم وأولى بالاهتمااام
وانطلقت

ونصحت أول مرّة، وكسرت الحاااجز الأخير... الله يقربني وإياكم من رب العالمين
وبعدها تحررت وارتحت كثيييييييييييييييييير

سبحان الله انكار المنكر يعطيك جرأة.. وثقة...

لأنه إذا الانسان حسّ بعظمة الله، هان عنده أمر المخلوقين..

ومرّة مع مرّة تتكلمين، تقولين رأيك، تقولين اللي تؤمنين به، وما تجاملين على حساب ذمتك ومصلحتك،،،
كل هذا يكسبك ثقة وقوة ما كانت عندك من قبل

لكن أهم شيء،، الله يكتبه في ميزان حسناتنا
ويجعله لوجهه الكريـــــــم

ويالله.. نبي نسمع منكم أي رأي أو إقتراح أو حتى لو فيه نصيحة للآمرات بالمعروف وتوجيه لهن ليتلافين أخطائهن......

سهرتنا اليوووووووووم حركااات ~~~ {السهرة الاجتماعية}

التعليقات

سَرَرتني سرّك الله

سهرتنا السعيده⭐️

سهرتنا السعيده⭐️

سهرتنا السعيده🧚‍♀️دورة فن التجميل🌸

سهرتنا السعيده🧚‍♀️