السلام عليكم
دايما أتمنى يكون عندي أخت أكبر مني أستشيرها في أمور ما ينفع أستشير أمي أو أخواني أو حتى أصدقائي فيها
أنا ما كتبت الموضوع هذا هنا الا بعد ما قرأت الشروط انه يحق للإخوة الرجال المشاركة بشرط انهم ما يتلقفون بأشياء تخص الحريم < بهذا المعنى.
طيب أقولكم القصة و مالكم في الطويلة
أنا طالب طب توني سنة أولى و عمري 20
قدر الله و حبيت وحدة تقرب لي من بعيد و هي بنفس السنة الليق أنا فيها في كلية الطب
ما كنت أعرفها قبل و لا أهلي يعرفونها لكن من نفس قبيلتي
شافتها أمي مره في زواج و أعجبتها و قالت نبي نخطبها لك و أنا رحبت بالفكرة بالعكس انبسطت اني أرتبط بإنسانة بنفس مستوى تفكيري و برضه تدرس نفس اللي أدرسه و حتى الاخبارات موحدة يعني في قسم البنات يعونهم تحديد لو أنا أخذت هذا التحديد في مادة معينة ينفع لأن الاختبار موحد غير انا ممكن نذاكر سوا فترة الخطوبة و بعد التخرج نتزوج.. إلخ
و جلست مرحب للفكرة لحد ان امي و ابوي يقولون هات رقم امها من عند اخوها و أنا أماطل فيهم
احنا عائلة متحفظة و أمي كبيرة شوي و ما تعرف طبيعة عمل الطبيبة في المستشفيات في المستقبل
لكن أخواني اللي أكبر مني واحد يقول دكتوره !!! مستغرب يقول تخيلها انت في بالك كل يوم تختلط بالرجال و تكلمهم و الثاني يقول انتظر للسنين الجاية يعني سنة ثانية و ثالثة لما نروح نتدرب في المستشفى و شوف إذا فعلا الاختلاط بالصورة اللي رسمتها أو لا , و واحد منكر لكن ما تكلم و الأخير ماخذ موقف حيادي...
بالنسبة لي بديت أفكر .. انه فعلا ممكن في يوم يصير بينا مشكلة و ما تلقى الحنان عندي و تدوره عند غيري لأنه متاح , و يمكن في يوم تعجب بشاب يكون وسيم .. و يمكن و يمكن و يمكن
بدأ الشك يجنني
بعد كذا تطورت الفكرة انه المفروض البنت ما تشتغل و مكانها البيت ترعاني و تهتم فيني أكون أنا تعبان من العمل تحطلي الغدا مو تكون تعبانه مثي و تنام بعدي
بعد كذا جاني اختلال و أنا أعترف قمت أحس ان المرأة تفكيرها جدا صغير و ان اللي تشتغل متسلطة و انه حتى المرأة المفروض ما تتعلم و المفروض بس هدفها تخدم زوجها و عيالها!!!!
<< لاحظوا التدرج هذا غلط
كان فيه أسباب لهذا الاختلال النفسي و هو القصص اللي شفتها من زملاء لي بعد ارتباطهم لا شرعيا بفتيات من كلية الطب بعينها و من برا الكلية و قلة الحياء اللي في الأسواق و المجمعات و قصص الخيانة الزوجية اللي صارت هاجسي..
أنا ما همني ظروف العمل ممكن أتحمل أنا متغرب أصلا و عزابي و عايش مبسوط بس أنا خايف من قصة الاختلاط و مداعيه *********يمنع استخدام الوجوه التعبيرية بين الجنسين
آخر شيء بقوله اني أنا و اخو البنت اخوها الصغير دايما أعطيه ملخصات و أقول أعطيها اختك و أساعدها بكل اللي أقدر عليه و مره سألت و جاني من طرفها انها مستعدة تنتظرني العمر كله مو بس لين التخرج ,,, و بعد ما عرفت بمشكلتي قالت مستعدة أترك الطب لو بوقف في طريقنا بس أنا مستحيل أرضى بالشيء هذا لأن ابوها متوفي و ما عندهم مصدر دخل كافي و أملهم في هالبنت اللي ما عندها أخوان أكبر منها ,
أعطوني رأيكم يا اخواتي وش السوات و الله هالبنت ضحت عشاني و انا صعب أتخلى عنها
و حاس اني إذا ارتبطت فيها بيذبحني الشك و لا أقدر أعيش بسعادة و تفاهم معها *********يمنع استخدام الوجوه التعبيرية بين الجنسين
الموضوع مغلق