السلام عليكم
كيكفكم يابنات
انا بدخل بالمشكلة على طول وبحاول اختصرها قد ما اقدر .... انا دائما انزل مواضيع بخصوص المشاكل اللي تحصل معي والحمدلله القى الاستشارة والنصيحه منكم لانكم بالفعل اخوات
مشكلتي هالمره مو مع زوجي مع امه طبعا انا طيوبه معهم ورسمية شوي يعني ازورهم في الاسبوع مره او اقل وقبل ازورهم في الشهر مره بحكم انه احنا ساكنين بعيد في نفس المنطقة اللي يشتغل فيها زوجي اما الحين نزلنا للديره وانا ساكنه حاليا مع اهلي واتوقع الكل عارف القصه لاني نزلتها مرتين يمكن ... المهم بس احس ام زوجي تغيررررررر مني ومن ينزل ولدها اللي هو زوجي على طووووووووووووول مشاوير مع انها حرمه كبيره كيف لها خلق هالمشاوير مادري امي اصغر منها بكثييييييير وماتدل الشارع والا الطلعه
وزوجي ماينزل الا الجمعه بس واحيانا الخميس والجمعه يعني انا اشتاق له وابغاه يجلس جنبنا يشوف طلباتنا يطلعنا يونسنا شوي بنتي مسكينة تطفش كل جالسين مانطلع الا اذا جى ابوها
وهي ماتخلينا على راحتنا على طول اتصالات مع انه عندها اولاد غيره في البيت بس على طول حاطه عليه وتقوله انت بتروح بتقعد في هالغرفه مالك غرض وصلنا احسن يعني وانا مالي حق .... انا اسكت واصبر بس اطفش
مثل امس سمعت انها تعبانه شوي ورحنا شفناها وبعدها زوجي ماراح دوامه يوم السبت عشان يوديها يعالجها مع انه شي خفيف صداع واكثر من مره تروح يودوها عيالها بس لازم هو بعد يوديها للمره العاشرة .... طيب ماقلنا شي وبعدها وداها السوق في الصباح بعد ماطلعوا من المستشفى وشرى لهم لبيتهم غدى وهم ماشاء الله اكثر من 10 اشخاص وهو يشتكي الفقر وماعنده فلوس وتونا بداية الشهر ومصفرين لو اقوله شي تافه لو 5 ريال يقولي ماعندنا واصبري ما اسمع منه الاا صبري واصبري يبخل علي باقل القليل وانا راضيه ومتحملة لاني اقدر ظروفه واخاف عليه واقول بعدين يعوضني بس شكله بيعوض غيري مو انا
يعني انا جالسة بيت اهلي ابوي يصرف علي وعلى بنته وعليه بعد وهو يصرف على اهله والله حاله انا مو شريره وما اقول لا بس لما يكون عنده مو يضيع فلوسه وبعدين يطر ويقسم بالحق احنا مسؤلين منه احنا اولى يلبي لنا طلباتنا
وبعد هذا دقت عليه في نفس اليوم وقالت له اللي شرتهم بترجعهم في الليل الحين تعبانه وكل يوم مستشفى وهي على طول في السوق ... لما جى زوجي بيروح قلت له طفشانه انت كل تطلع وانا ابي اطلع كل محبوسه في الغرفة قالي قومي روحي معنا قلت له لا قالي عادي قومي ولاتنزلي عشان لاتتعبني لاني حامل قلت يمكن مايبوني اروح معهم بس اصر وقمت جهزت بنتي ورحنا ولما مرينا عليهم ركبت السياره وهي ولا كلمه يدوب بس قالت شخباركم بصوت خفيف وطول الوقت ساكته وبس تكلم ولدها وانا ولا كأني موجودة حسيت اني فعلا غير مرغوب فيها ولما وصلنا نزلت بس هي مع زوجي تشتري وانا مع بنتي وحماتي الصغيره نتسوق شوي وهو طول الوقت معها ولو اوقف اشوف يجي يسحبني ويقول ماله داعي وامشي بس طفشت قلت له انا ادري انه ماعندك وانا ماراح اشتري بس عالاقل خلني اشوف ....
وهي تصرخ عليه هذا جزاه موديها اكثر من مره وحالته حاله انت ماينجى وياك السوق وانت تزهق وانا صرت ورى قالي تعالي مرتي صرخت عليه وقالت شلون مرتي ومرتي متى بتهون عن هالكلمة ماتستحي تقول لها كذا احنا سكنا على طول هو يناديني كذا وهي كل مره تسمعه تطب فيه
والماي تدق عليه تعال عبي لنا ماي مع انه بيت اهلي مو في نفس منطقتهم يعني بعيد المشوار ربع ساعه تقريبا وهم تعال وتعال والله استغرب منهم مو لهدرجه يعني انا اقوله ما اقولك لا بس بحدود اذا شي ضروري روح بس شي تافه واخوانك موجودين يكفوا لازم انت
لا والنكته مره توه جاي من الدوام الساعه 8 الصباح والمشوار بعيد ساعتين تونا بنام الساعه 9 تدق عليه اخته الكبيره وتقول تعال البيت ود الفطور لعمي وياهم ساكن في نفس البيت تخيلوا يعني هي ماتعرف توديه وهو عادي عنده الوضع طبعا وهذا اللي يقهرني يشوف تصرفاتهم طبيعيه وكل مره نزورهم يمسكوه يالله بسرعه قوم وصلنا هالمكان كل مرررررررره من جد طفشت
وهذا من اهم الاسباب اللي بتخليني اطلع من بيتنا واسكن مثل قبل في نفس منطقة عمله ونبعد عنهم وعن مشاكلهم
مادري يابنات هل انا غلطانه او لا
اذا انا غلطانه قولوا لي بس بدون تجرييييييييييح والله مو ناقصه وانا حامل وتعبانه وموفاضيه حق مشاكل وانا وحده مسالمه وماعلي من احد عشان ماتقولوا انا اللي غلطانه
بانتظاركم ياعسولات
شاركي في النقاش
سجلي الدخول لإضافة تعليق.
التعليقات
43مواضيع مشابهة
تابعي تجارب أخرى من هذا القسم.